Mithianghlim Ambrose ih Thuanthu tawi

Mithianghlim Ambrose (340-397)

December-7

           Milan khuapi kilkhawitu Mithianghlim Ambrose cu kum 340, Germany ram ih Trier khuapi ah a rak suak. A pa a thihhnu Rome ah fim thiam nak a rak zir hnu neta ah Milan ah Pathian hna a tuan. Kum 373 tiang zumtu Khriha a si hrih lo nan, mipi pawl ih lungkimnak in Milan Bishop ah an rak hril. Cuveten tikholhnak le Bishop cannak a ngah. Cui hnu ihsin thok in a neih mi thilri zaten mifarah pawl a pek thehih a thinlung zaten midang pawl hrangah a ap. A nun sung hmuahhmuah ah tluang tlam zet in le zuamzet in a can a rak hmang. A can tamsawn ah Bible sair in le Bible zirhnak ah a thinlung a rak pek. Milan Cathedral biakinn ih Mithianghlim Ambrose ih Pathian thu sim mi ruangah Mithianghlim Augustine a nun nak a rak thleng.

          Ambrose in pawlpiih harsatnak nasa zetin a ton lai ah Pawlpiih tangphawlawng tumpi pawl a zuarih a ngah mi paisa in mifarah pawl a rak bawm. “Pawlpi in sui hman ding a nei si le ret men ding si lo in bawmnak a tul mi pawl hrangih hman ding a si sawn” tiah Mithianghlim Ambrose in pawlpi hnenah ruahnak ttha a rak pek. Thianfainak thawn Pathian hnatuan pawl a lawmh hlei ah amai lamhruainak hnuai ah fala thianghlim tampi a ret. Cui a hnatuannak cu ramsungih minung mal ter dingah a tuah tin an puhmawh tikah,“minung pawl mal ter deuhdeuh dingih a tuah tu cu fala thianghlim pawl siloin raldonak a si sawn” tiah a rak let. Mithianghlim Ambrose cu a kum 57 ah Pathian ih taang sungah a rak cawl. A ruak cu Milan Biak inn hnuai ah cozah mithi phum daan vek in an rak phum.

 

Add new comment

11 + 3 =