Mithianghlim John Baptist de la Salle (1651 - 1719)

Mithianghlim John Baptist de la Salle (1651 - 1719)

April 7

          De La Salle, tlangval thianghlim tlawng a rak dintu Mithianghlim John Baptist de la Salle cu kum 1651 ah France ram Rheims khuapi ah a rak suak. Ruah nak a sang ih Pathian lam a zuam zet tu a nu le pa in Paris ih Siangbawi tlawng ah an lut ter ih kum 1678 ah cui khuapi ah Puithiam can nak a rak ngah. Puithiam a can hnu kum reiloteah mifarah nauhak pawl ih fimthiam nak hrangah, Rheims khuapi ih Diocese hrang hnatuan nak in a rak cawl. A neih mi thilri pawl a zuar ih mifarah pawl hrangah ca zir nak tlawng a rak din sak. Netabik ah a ca zirh nak ih tha tho zet ih a zuam nak ruangah tlawng saya menmen minung (12) in a dung an thlun ih pawlkom pakhat dinhmun in an um ih, nauhak le mino pawl ih fimthiam nak hrangah an nun ap dingin lungkim nak an rak nei. An mah pawl cu an ca zir nak tlawng pawl in De la Salle Brother pawl tiah an rak ko. Ca zir nak ah tha ten tuan thei dingah zohman Puithiam cang lo dingah an rak rel cat.

          Kum 1698 ah England ram ih a pahnih nak Siangpahrang James ih dil nak ruangah mithianghlim cu upat tih zah tlak pawl le milian pawl hrangah a hmaisabik ca zir nak tlawng pawl a rak din. Cuvek thotho in kutthiam pawl lam a paih tu nauhak pawl hrangah, zarhpi niah "Sunday Academy" timi phunsang tlawng a rak din thok. Pathian ih a kawh nak lam tluan ah hnaihnok nak a phunphun a rak tuar asi. Voikhat ah a leng tlawng saya pawl in Parame khuapi ih um a tlawng phit dingah an rak dil. Cui hnu reiloteah, De La Salle cu a kut tang ih brother pawl in a daan luar tuk mi thawn in uk tiah an rak rel siat. Curuangah cui kaing sung tel mihrekkhat in Parame khuapi ih um Archbishop hnenah De La Salle ih din hmun thlak dingah an ngen. Cui an dil nak cu a rak pom lo. A dang hotu upa pakhat cohlan ding aiin cui brother pawl cu an pawlkom nak in suak ding in ralrin nak a rak pek. Netabik ah cun brother pawl in Europe ram ih Catholic cazirnak tlawng pawl an rak din thei ih Pawlpi ih a sang bik cazir nak kaing ah a rak cang. Mithianghlim John Baptist De La Salle cu kum 1719 ah Rouen khuapi ah a rak thi ih kum 1950 ah tlawng saya, sayamah pawl kilkhawitu tiah an rak nemhnget asi.

          Himi mithianghlim hi Catholic pawlpi in tlawng saya, sayamah pawl kilkhawi tu tin an ret bangin, nauhak pawl fim nak a zirh tu, saya, sayamah pawl khal St. De La Salle bangin teimak nak le duhsak nak thinlung thawn nauhak pawl ca an zirh thei nak dingah thlacam sak cio uhsi.