Pawlpi pumkhat si thei nak ding hrang ih thahnak a tuar tu Mithianghlim Josaphat

Pawlpi pumkhat si thei nak ding hrang ih thahnak a tuar tu Mithianghlim Josaphat cu kum 1580, Ukrian ram Vladimir ah a suak asi.

Vilna khua ih sumdawngpa hnen ah hna a tuan laiah sumdawng tlang ding in le a bawipa ih fanu pakhat khat thawn thitaw ding in sawm a si nain Josaphat cun Zateik pakhat tuan dingih a timtuah cia si ruangah a pahnih in a el asi.  1604 kum ah Vilna khua ih Thum kom Pathian Zatheik Tlawng ah a lut ih a rei hlanah Puithiam cannak a ngah asi. A mah cu dingfel zet le pumsa sup zet in a nung ih Orthodox pawlpi le Rome pawlpi an kom sal thei nak ding hrangah nasa zet in thu a sim.

            1617 kum ah Polotsk khua ih Bishop ah a cang hnu ah Pathian thu zirnak cauk a suah. Josaphat cun a hleice in voikhat ai in tam thitum mi Siangbawi pawl kha thlengawk teng teng thei nak ding in thu a kam. (Kan theih tul mi ah, ni suah nak lam, Orthodox pawl ih Canon law ah thitum cia mi pawl Puithiam cannak ngah a theih nan, a nupi a thih hnu cun kutsih nak ngah thei nawn lo). A mah ih Pathian hna tuan nak ih a hlawhtlin nak ruangah Orthodox zum tu pawl an thin a heng ter. An mah pawl in Josaphat cu “thlarau rukru” tin an ko. Josaphat in, kei cu Rome kawhhran thawn pumkhat si thei ding ah le Mithianghlim Peter (Pope) ih aana (thu neih nak) neih thei nak ding ah thi ding in ka ralring zo tiin a ti.

            1623 kum ah Josaphat cu zing thlacam ding in biakinn a feh lai ah thu ruat sual pawl (zum nak a sual mi pawl) ih do nak a tuar ih meithal in an kap that asi.