Inn sung sang rem daih nak ih thuthup

        Inn sung sang rem daih nak ih thuthup

        Myo pakhat ah nupa tei pakhat cu an inn sang golden Julilee puai an tuah sunah ramsung thu thang hrangah ca ngan thiam pakhat in cui golden Jubilee ah a ra ih thu thang a la. Cui myo sungah cui nu pa tei cu to aw dah lo in an rem awk thu an rel. Cui ca ngan tu in hitivek in kum reipi rem dai ten an um thei nak ih thu thup sim dingah cui nupa hnenah a dil. Cutikah an nu in a tang lam vek in a sim.

        “Kan neih awk pek honeymoon khual kan tlawng nak ih thu ihsin ka lo sim ding. Hmun pakhat ah rang thawn honeymoon kan feh. Lamzin ah rang cu veikhat a tluk tikah ka pasal in rang hna ri in veikhat asizo tiin a ti. Malte a rei hnuah rangcu a veihnih nak a tlu lala. Ka pasal in rang hna kiang in veihnih asizo asi. Neita rang cu a vei thum asi thlang a tiih rangcu thing ro in a vuak that. Himi ka hmuh tikah a mah kha ka hua ih ka dodal. Cutikah ka hna a dir ih ka hna kiangin veikhat asizo tiin i ti. Cumi ihsin thok in a thu ka el nawn lo ih, remdai ten kan um ringring. Thu thup cu hihi asi” a ti.

        Pawl pi ih hmailam caan le mipi pawl ih hmai lam caan cu nu le pa pawl ih an din mi inn sang parah tampi in a bun a si. Mah nupi kha cauk pakhat vek in sir a theih tiin a titu pacang cu ca sir thiam lo mi an si. Duh timi cu pakhat le pakhat zoh awk ngongo thawn ziang hman a sai lo. Asinan a bangaw mi colh hmun pakhat kha zoh tlang hi asi. Pathian ih bawm nak cu minung ih duh dawt awk nak a tum ter ih a thuk ter. Duh dawt nak timi cu sun tleu nak tang ih rinlo poi h a suak mi mithmai ih mawi nak mang bang ih duh men asi lo.A hman mi mawi nak cu bang tak in hawl lo in hmuh a theih lo mi thlarau ih cuang mi a si.

         Kan mah pawl cu pakhat le pakhat ringzet in kawkawk nak tong pawl na colh lai hlanlo, pakhat ih aw cu pakhat in thei thei dingah le pakhat  ih tongfang pawl pakhat in thei thiam dingah tong fang mawi le nem na tong lai hlan lo, pakhat hnen ah pakhat in ziangvek khal a zir thei lo ding.  Rin tlak si nak timi cu ziangvek khal ah lamzin  a sual dah lo ka ti lo. Ziangvek caan khal ah to awk nak a um lo ka ti lo. Rintlak nak timi cu ziangvek caan khal ah tho sal in feh rero hi asi. Rin tlak si nak timi cu hmun khat ten potcat in hril mi lamzin ih feh tlang rero hi asi.Rintlak nak cu thim nak le phen thlam pawl kaan in khat le khat zumawk ih rinsan awk hi asi. Rintlak nak timi cu tum suk nak le naat nak pawl pah in pakhat in pakhat hrang ih pekawk nak asi. Rin tlak nak cu minung ih duh dawt nak kaan in Pathian ih kum khua duhdawt nak ih cah nak ruahsan in ruah san hi asi.