Nu Mary Vancung hruai puai thu (Rev. Fr. Pius Kei Lian Cung)

Nu Mary Vancung hruai puai thu (Rev. Fr. Pius Kei Lian Cung)

Bawi Khrih ah duhdawt mi nu le pa le u le nau pawl RVA thuthan nak in nan kut ka lo kai. Tuisun ni tiang, nunnak le damcahnak in pe tu kan Bawipa kan Pathian cu a hmin thangthat si ko seh!

Kan Bawipa Jesuh Khrih ih zaangfahnak, Pa Pathian ih duhdawtnak le Thiang Thlarau ih pawl kom nak cu, lam hla lam nai ih um mi RVA thuthangtha ngai tu nan zaten par ah a thar in thleng hram in kum khua hmun cam cin hram seh. Amen.

Tuih sun cu August 15 asiih, kum tin kan tuah theu mi Nu Mary Vancung hruai puai, ni sunglawi zet asi. Hi puai ni ah thu hla (3) ruat khawm tlang dingah ka hril.

(1) A pakhat nak ah hlan thuanthu um zia,

(2) A pahnih nak ah, ziangruagah Mary cu Vancung ah a hruai asi tile,

(3) a pathumnak ah, kan zate hrang ti thu pawl an si.

1. Hlan thuanthu um zia kan zoh asi le AD kum Zabi 6 in himi puai hi an rak tuah thok rero zo asi. Kum Zabi 7 cun Rome khuapi le hmundang ramdang ah sunglawi zet in an tuah vivo ih a lar sin sin asi. Hrek khat ih an rel dan le an ngan dan ah cun, Nu Mary a nunnak a cem can ah a ruangpumpi cu a thleu in a thleu ti asi. Dung thluntu pawil ih thla cam nak thawn an vui ih Thomas a rak um ngelcel lo. Thomas cun Nu Mary ih hmel, hmuh ka duh zoh ka duh tuk a ti tik ah, a thlan hmun le a ruak kuang cu an zoh ih Nu Mary cu a ruak a um nawn lo. Pangpar le rimhmui in a khat ih cu ve te cun a ruangpum thawn Vancung ah cawi asi. Nu Mary ih ruak cu leilung ih siatral dingah Pathian in a siang lo. A hnen ah a hruai asi tiin an zum an pon ti khi a rak si. AD 1950 ah Pope Pius XII nak in Nu Mary Vancung hruai nak thu hi lei thlun ram tin ih um mi Catholic pawlpi zate ih kan zum, kan pom ding in a nemhnget ih puai sunglawi zet ih tuah ding khal ih a phuang lang asi.

2) Nu Mary Vancung ih hruainak a co cu, co tlak taktak hrimhrim asi. Ziangruangah tile, thluasuah cuangce co tu asi. Minung humahhmuah cu sual man ruang ah leilung ih cang sal ding, thi ding kan si. “Semtirnak (Gen. 3: 19) ah cun, leidip in tuah mi na si ih leilung ah na cang sal ding in rak ti.”  Minung sual nak ruang ih milai le lei lung camsiat nak le siatsernak cu Genesis, Semtirnak 3:16 ah kan hmu. Nunau le rulpi an doawk nak ding cu, Semtirnak 3: 15 ah kan hmu. Curuangah Nu Mary le Fapa Jesu thuhla cu leilung camsiat a rak si hlan ah Pathian ih ruahnak ah a rak um zo. Curuangah Nu Mary cu sual hram neilo in a sem asi. Nu Mary sual hram a nei asile a hnen ihsin a ra suak mi Jesu tla sual hram a nei ve ding asi. Jesu cu sual hram nei lo a thiang mi Pathian a si ruang ah a Nu khal cu sual hram nei lo leilung camsiat hlan ihsin Pathian ih rem ruah nak ah a rak um zo asi. Lk 1: 26 sung ah vancung mi in Bawipa cu na hnen ah a um, thluasuah tampi a lo pek tiin Mary hnen ah thu a than. Hi mi can te khal ah Nu Mary sungah naute Jesu a sem hrihlo nan, Jesu a sungih a sem hlanihsin thluasuah cuangce co tu nu a si zia a lang asi. Mi hrek khat in, Nu Mary cu Fapa Jesu um lo sehla, zianghman asilo. Nu nau menmen asi tiah an rak ti theu. Sihmansehla vancung mi Gabriel ih a sim than nak kan zoh tha asile, Fapa Jesu, Nu Mary sungih a sem hlan ihsin Pathian ih mithmai tha le thluasuah a cuangce co tu a si zia a lang a si. Curuangah Jesu a sung ih a sem hlan ihsin mithianghlim le thluasuah cuangce co tu a si zia a lang a si. Lk 1:42 khal ah, Elizabeth in ka Bawinu tiah a rak ko. Thiang thlarau thawn a khat mi Elizabeth nih aw ring zet in a rak lawm. A mah nak ih kum no te Mary sunlawihnak a rak pek ti kha a lang. cu mi khal ah, nu nau hmuahhmuah lak ah a sung lawi cuangce na si . Na sung ih a sem mi khal mi sung lawi asi, a rak ti tikah, Nu Mary a sunlawihnak kha a hmai sa asi. Curuangah Thiangthlarau thawn a khat mi, Thiangthlarua a nei mi kan si ka si kan ti awk ahcun, Fapa Jesu lawng thangthat ding kan si lo ih Nu Mary a thangthat thiam tu Nu Mary a sunlawi zia a hmu thiam tu kan si ve tul asi. Nu Mary cu nau a keng tikah Thiangthlarau Pathian ih thawm huham in a sungah nau a vun tikah, cuih Thiangthlarau ih thawm huham um nak hmu thiam tu thlarau kan nei ve asi. Cumi kan thlarau neih mi Nu Mary ih thlarau thangthat tlak a si zia kan hmu thiam lo a si ah cun, kan thlarau neih mi hi ziang tik vek thlarau so a si ti tla ruah ding tam zet a um. Curuangah Elizabeth thawn hmun khat in kom aw in, aw ring zet le thang zet in lungawi zet in Nu Mary sunlawi zia thangthat tlak asi zia kan lawm kan thangthat tikah, Thiangthlarau Pathian kan sung ah a khat asi ti kha a lang fiang asi. Lk, 1:48 ah Nu Mary amah rori nih amah le amah ziang tin a sim aw, San khat hnu san khat thangthat tlak mi nu in ti ding a ti aw aw asi. Curuangah lei tlun mi nung hmuahhmuah Adam le Eve sual nak ruang in mi thi si zo hmannungla Adam thar Jesuh Khrih le Eve thar Mary ruangah minung ah kan cang sal. Adam thar Jesu thih nak ihsin a thosal ih Vancung a kai bangtukin sual hram nei lo Eve thar kan Nu Mary khal Vancung ah a ruang pum thawn cawi so asi. Mihrekkhat in an ti theu mi cu, Nu Mary hi Jesu hring hlah sehla zianghman asilo ding an ti theu. Bible sungih Vancung mi ih simnak kan zoh ah cun nu nau hmuahhmuah lakah thluasuah bik mi, Fapa Jesu a naih bik tu leilung tlun minung hmuahhmuah lakah Nu Mary tluk ih a naih bik tu le a nei bik tu zo kan um thei? Nu Mary cu Fapa Jesu a naih bik tu le a nei bik tu asi. Jesu ih nehnak thawhsalnak khal co hmaisabik tlak tu cu Mary asi. Mary cu sersiam tu Pa Pathian ih duhnung zate Fanu asi. Rundamtu Fapa Jesu Khrih ih a duhdawt a upat mi a Nu khal asi. Thiangthlarau Pathian ih umpi mi innsaang Nupi khal a si fawn. Curuangah Nu Mary ih sunlawi zia a cuangce ih thluasuah a co zia kan zoh tikah a ruangpumpi siatralnak tong lo ihsin Vacung ih hruai asi mi khal cu co tlak hrimhrim asi ti a lang fiang asi.

(3) a pathumnak ih kan ruah ding mi kan maih hrang asi ti thu khal cu, kan ruat sal asile, ruangpum le thlarau kom awkih Vancung ah cawi ti hi zum har le ruah ban lo thu hla asilo. Kan ruah ban mi le kan zum thei mi asi. I Korin, 15: 21-22, kan siar asile, “mi pakhat ruangah thih nak a um bangtukin mi pakhat thawngin thawhsalnak a thleng ve. Adam thawn a peh zomnak ruangah mi hmuahhmuah thihnak kan ton bangtukin Khrih thawn an peh zomawknak thawng in mi humahhmuah nun nak ah thawh ter sal an si ve ding ti hi fiang tein kan hmu asi. Curuangah Jesuh Khrih ruangah a zum tu hmuahhmuah cu thawh ter sal kan si ding mi hi Bible in fiang tein in sim. Kan zate ih kan ton ding mi thawh sal nak cu Nu Mary khal in a ruangpumpi thawn tho sal in Vancung ah cawi asiih kan zate ih kan ton ding mi hrimhrim asi. Curuangah zum har asilo. I Cor 15: 14, “kan zoh sal khat a sile, thih nak ihsin Khrih thawh sal lo asiahcun thu thang phuan ding ziang hman kan nei loih zum ding khal ziang hman nan nei lo” ti kan hmu fiang lala. Curuangah Jesuh Khrih a thawh sal vek in a mah zum tu hmuahhmuah kan thawh sal ding hi Bible nih in zirh mi asi. Rom. 6: 5 khal ah, “A thih nak ah khan amah thawn a thi tlang mi kan si ruang ah thih nak ihsin thawhter asi nak ah khan kanmah khal kan tel ve ding” ti a lang asi. Curuangah Jesuh Khrih thawhsalnak hi minung hmuahhmuah ih kan co ding mi le kan ton ding mi a rak si. Asile ziangtin so kan tho sal ding ti thu kan ruat bet pei. Catholic pawipi ih zum mi le zirh mi cu, ni netabik thawhsal ni ah kan ruang pumpi le ka thlarau kom awk in kan thosal ding ti hi asi. A zate ih a thiam tu thlacam nak sungih kan phuan theu mi zum nak hram pi sungah, “ruang pumpi thawhsal nak, kum khua nunnak, hi thu tla hi ka zum theh asi” tiah ka ti theu. Curuagah zumtu Christian kan zate ih kan co ding mi kan ton ding mi asi. Jesuh Khrih ih kan nu ding ih in pek mi Nu Mary cu thluasuah cuangce co tu asi ruangah tu ah Jesu a taksa ruang pum thawi Vancung ih a um vek in a Nu Mary khal ruang pum thlarau thawn Vancung ah a um. Jn, 19: 26-27, kan siar asile, Jesu in a Nu le a duhdawtmi dung thlun tu pa, cu tawk ih an din kha a hmu ih, a Nu hnen ah cun, a mah kha na fapa asi tiah a ti. Cu le a dungthlunpa hnen ah cun, a nih kha na nu asi tiah a vun ti. Himi Bible cang kan zoh asile, mithianghlim Johan pakhat lawng a sim duh mi a silo. Johan ti mi cu Jesu ih a duhdawt mi dungthluntu a si zia kha vei tam zet kan hmu. Curuangah a mah hi na nu asi a rak ti tikah, Jesu a duhdawt tu zum tu hmuahhmuah ih kan Nu dingih in pek mi asi. Pa Pathian nih Fapa Jesuh Khrih lei tlun ih a rak thlah tikah Fapa Jesu Khrih a co tlak tu ding, a nei tlak tu ding,Nu Mary hi leilung in kan rak nei ih ziang tluk mi vantha kan si. Nu Mary ih ruang pum ah Van le leilung, Pathian le minung, ton awk nak hmun cu a rak si. Curuangah a sunglawibik mi Pathian ih Fapa neih sun Jesuh Khrih le leilung ih kan nei mi a sunglawi zet mi Nu Mary cu hmun khat ih an um nakin, Eden thar, Adam thar, Eve thar, rundamnak a thar kan co thei nak cu a si. Jesuh Khrih ih rundamnak kan ti mi khal, Adam ih sual cawh kuan a tuar mi hmuahhmuah luat sal nak ding le, camsiatnak cu thluasuah thleng ding. Thih nak cu nunnak ih thleng sal ding ah Jesuh Khrih cu a rat nak asi. Cu cu rundamnak kan ti mi asi. Curuangah Jesuh Khrih ih thihnak, Jesuh Khrih ih thawhsalnak a pom tu zum tu kan zaten nunnak ih thawhtersal kan si vek in cuih nun nak ih thawhtersal mi hmuahhmuah ih kan Nu dingah Fapa Jesu in kan hrangah in pek zo asi. Curuangah zumtu kan zate ih kan Nu, Vancung ram ih ni nikhat ih kan ton sal ding mi kan Nu hi, a tu leitlun kan nun lai ihsin, ngam tlak zet le ral tha zet in pawl nel cia uh si. Tu ih sin a maih hnen ah thlacam bawmnak kan dil, upat nak sunlawihnak kan pek tikah Vancung kan thlen tik khal ah kan Nu a si zia ngam tlak zet le lungawi zet in kan tong aw thei ding asi. Hi leitlun kan nun lai ihsin Jesuh Khrih ih in pek mi kan Nu kan pom thei lo le kan ngam tlak cia lo asile, Vancung kan thleng ah teh ziang kan bang ding? Curuangah Nu Mary hi kan nun sung ah kan pumsa hrangah siseh, kan thlarau hrangah siseh, lam tha zin tha in zirh tu Nu a siih kan tulsam mi hmuahhmuah in bawm tu, in kil khawi tu khal asi. A thinlung ruahnak a nun can ziaza in Pathian hna tuan ding in in zirh ih in bawm tu khal asi. Curuangah a mah ih a co mi thluasuah hmuahhmuah khal a maih hrang lawng ah si men loin, a fale kan zate ih kan co ve ding, in duh sak tu Nu asi. A co mi a sunglawi zet mi thluasuah cu Fapa Jesu a neih nak a siih, Fapa Jesu ih thawhsal nak a co nak asi. Curuangah a fale kan zate khal cu Jesuh Khrih nei tu le Jesuh Khrih thawi thosal ding kan si thei nak ding in duh sak tu Nu khal asi. Curuangah kan zaten Nu Mary ih a co mi thluasuahnak cu hrawm kan si ih Jesuh Khrih ih thawhsalnak khal kan co ding ih Jesuh Khrih Vancung ram ih pum le thlarau kom aw ih a kai bangtukin, Nu Mary khal ruang pum le thlarau in a kai ih kan nih kan zate khal ruang pum le thlarau thawn hmun khat in kan tong aw khawm thluh ding asi. Kan ruang pum a thawhsal hnu ah Vancung ah Jesu le a Nu, kan Nu Mary thawn, ruangpum le thlarau kom in, kum khua kan leng tlang ve ding asi. Cui ton awk nak can cu ziang tluk in ngai a va um ve, hngah hlap a um na sa.

Ca a rak siar tu nan zate parah Pathian thluasuah nak um hram seh. Amen.

Vancung ah ruang pumpi thawn hruai mi, Siangpahrang Bawinu, Kan mah hrang ah thla in cam sak aw.

 

Add new comment

2 + 2 =