Pathian Zangfahnak thawn pehpar in St. Faustina hnen Bawi Jesuh ih a phuan mi 17

Divine MercyPathian Zangfahnak Zuk

Pathian Zangfahnak thawn pehpar in St. Faustina hnen Bawi Jesuh ih a phuan mi 17

Minung pakhat dinhmun in siseh, ram pakhat dinhmun in siseh, leitlun huap in siseh, tuih san ah Pathian zangfahnak hi kan tul sinsin ko lo maw? Kan thlarau hrang ruat in, St. Faustina hmangin a zangfahnak thuhla kan Bawipa Jesuh ih thu in cah mi hi ziang siar lo in maw kan um men ding? ziang kan tuah ve seh la a tha ke?

Pope Benedict in “Kan Bawipaih St. Faustina hnen a rak phuan mi tongkam hi tuih kan san hrangih a thupi bik pakhat a si. Zangfah lainatnak hi, lei par ih thatlonak namnuainak dingah Pathian ih hmanmi cahnak pakhat a si” a rak ti dah.

A tu rori ah kanmah le mah ralrinnak vun pe aw uh si. Divine Mercy Sunday hi St. Faustina hnen ih kan Bawipaih a rak phuan mi tongkam vun ruahsal nak caan tha a si. St. Faustina hnenih kan Bawipaih a rak phuan mi phun 17 cu a tanglam vek in an si:

  1. Zangfahnak Puaipi ni cu mi hmuahhmuah, ahleice in, sualnak ih nenmi pawl hrangah beunak an hmuhnak ding a si ding ka duh. Cuih ni ah ka zangfahnak thuk zia lang ter a si ding. Ka zangfahnak cerhti a pan tu hmuahhmuah hnenah ka thluasuah pawl tam pi’n ka burh ding. Sualthlahnak Sacrament le Bawipa Thisa Sacrament a sang tu pawl cu sualngaidamnak famkim tein an ngah dingih hremnak khal in an luat ding. Ziangruangah tile, cuih ni ah thluasuah phunkim burhnak sangka kau pi’n on a si. Ziangtluk sualnak tumpi neitu an si hmanah, ka hnen ra pan ding hi zo hman in tih hlah hai seh. (Diary 699)
  2. Ka zangfahnak an pan hlan tiang cu milai pawl in daihnak taktak an hmu thei lo ding. (Diary 300)
  3. Mi hmuahhmuah in ka zangfahnak ih thuk zia hi theithiam hai seh. Himi hi san cemnak ding khihhmuh tu a si. Himi theh ah dingnak ni a ra lai ding. (Diary 848)
  4. Ka zangfahnak sangka ihsin luh a duh lo tu cu ka dingnak sangka in an lut thotho ding. (Diary 1146)
  5. Ka harsat tuarnak a nasa tuk ko nain minung tampi an hloral thotho. Cu pawl hrangih rundamnak an ngah sal theinak lamzin ka on sak mi cu ka zangfahnak Puai ni a si. Ka zangfahnak an cohlang/biak lo a si ah cun, kumkhua in an hloral ta ding si mai. (Diary 965)
  6. Ka Thinlung hi minung pawl, ahleice in, misual pawl hrangah zangfah lainatnak thawn a khat a si. An hrangih Pa tha bik ka si zia le Ka Thinlung ihsin a potsuak mi Thisen le Tidai khal anmaih hrang ih suak mi a si zia an theih ding ka va duhsak so. (Diary 367)
  7. Hi Ka thin sungin a suak mi eng (tleunak) pawl in Ka Paih thinhengnak in minung pawl a humhim. An himnak hmun ih a cawl tu pawl cu mi lungawi an si, ziangruangah tile, Pathian ih cawhkuannak in an luat ding. Thosal Puaipi hnu Zarhpi voi khatnak hi Zangfahnak sunloih Puai ni si dingah ka duh a si. (Diary 299)
  8. Ka fanu, hi mi hi rak ngan aw: mi pakhat in sualnak tum deuh a neih tikah Ka zangfahnak dil dingah a hrangah caan tha a si sinsin. Mi hmuahhmuah hi a thuk mi Ka zangfah lainatnak rinsan dingin fial hai aw, ziangah tile, an zaten runsuak ka duh hai a si. (Diary 1182)
  9. Sualnak a tam sinsin tikah Ka zangfah lainatnak ngen(dil) sinsin ding a si. Ka tuah mi poh in Ka zangfahnak an lang ter. Ka zangfahnak a rinsan tu pohpoh cu an hloral lo ding, ziangruangah tile, an ziangkim ah Keimah in ka tel pi ih an ral pawl khal Ka ke tangah an cipciar theh ding. (Diary 723)
  10. Ka sual bik a ti tu pawl in Ka zangfahnak hi rinsan hai seh. Midang pawl hnak in Ka zangfahnak an tul sawn a si. Ka fanu, harsat a tuar mi pawl hrangih Ka zangfahnak tum zia hi rak ngan hnik aw. Ka zangfahnak a dil tu pawl parah Ka lung a awi ih cu pawl hnen ah an dil mi hnak ih tam in thluasuahnak ka pe ding. Ziang tluk ih misual an si hmanah Ka zangfahnak a dil tu pawl cu ka hrem lo dingih a thuk tuk mi le theihthiam a har zet mi Ka zangfahnak thawngin miding ah ka cawisang ding. (Diary 1146)
  11. Ka Zangfahnak sunloih Puai ni ah Sualthlahnak Sacrament le Bawipa Thisa Sacrament a sang tu pawl cu fam kim te’n sual ngaidamnak an co ding. (Diary 1109)
  12. Ka sersiam mi pawl hnen ihsin rinsannak hi ka hmarngaih bik. Midang pawl hi a thuk mi Ka zangfahnak rinsan dingin tha va pe aw. Mi derdai pawl le sualnak thawn a khat mi pawl hi tih lo te’n Ka hnenah ra hai seh, ziangah tile, an sualnak cu vunnel hnakin tam hman sehla tahthimh theihlo mi Ka zangfahnak in a silhkhuh theh ding a si. (Diary 1059)
  13. Ka Zangfahnak hi sunglawi zet in a Puaipi ni ah puai tuahnak thawn le a zuk suaimi upatnak peknak thawn biaknak nei dingin ka lo forhfial a si. Hi zuk thawngin minung pawl hnen ah thluasuah tam pi ka pe ding a si. Cun, hi zuk hi Ka zangfahnak ih a ngen/forhfial mi pawl mang ter tu ah a cang ding, ziangah tile, a fek bik mi zumnak hman hi tuahnak tel lo cun a lak men a si. (Diary 742)
  14. Ka fanu, Keimah hi Duhdawtnak le Zangfahnak ka si zia mi hmuahhmuah hnenah va sim aw. Mi pa khatkhat in rinsannak thawn i pan tikah thluasuah tam pi ka burh ih cuih thluasuah pawl cu amah te lawngin cen cawk lo’n midang hnen khal ah a luang ter a si. (Diary 1074)
  15. Minung pawl hnen ah Ka zangfahnak cerhti ihsin thluasuah donnak dingah bawm ka ngaihtuah sak ringring a si. Cuih bawm cu “Aw Jesuh, ka lo rinsan a si” timi hminsinnak a tel mi zuk a si. (Diary 327)
  16. Himi zuk upatnak a petu pawl hmuahhmuah cu an hloral lo ding tiah ka kam a si. Ahleice in, a thih zawngah hi leilung parih a ral pawl khal neh dingin ka kam a si. Ka sunlawinak a si ti’n Keimah rori in ka humhim ding a si. (Diary 48)
  17. Ka zangfahnak sunloih upatnak a karhzai tertu pawl cu nu in a fahniang a kilven bangin an nun sung ka kilveng dingih an thih tik khal ah an hrangah thuthentu si lo’n Mizangfahthiam  Rundamtu ah ka cang ding. Cuih neta bik caan ah cun Ka zangfahnak tilo cu mahlemah runawk theinak a um lo. Lei par a nun sungah Ka Zangfahnak Cerhti ih a hnim aw tu pawl cu mi lungawi an si, ziangah tile, an hrangah dingnak thawn thuthennak a um lo ding. Zangfahnak in a zel hai ding. (Diary 1075)

A tlun ih kan run ngan mi hi National Catholic Register (EWTN) Thuthang website sungih an tarlang mi Fr. David Mangte ih theihthiam ol ding zawngin a leh mi a si.

 

 

Add new comment

2 + 3 =