Pathian ih zangfah bom nak thawn thlengawk nak sungah um in ruun dam nak thuthangtha a phur tu kan si a tul.

Pathian ih zangfah bom nak thawn thlengawk nak sungah um in ruun dam nak thuthangtha a phur tu kan si a tul.

January 26, 2020

            Zarh tinte zarhpi ni mipi a ton can le Angelus thlacam nakah Pope Francis in mi pi a ton nakah mipi pawl kha that nak thinlung thawn a khat mi pawl cu Pa Pathianih zaangfah lainat nak pawl an cohlangih thiangthlarau ih zaangfah nak in mai nun tu zia thleng aw dingah duh nak neih ding thu kha a zirh a si.

            St.Peter Biakinn pi hmai ih a um mi mipi pawl kha thiangthlarau ih zaangfah nakin lungthleng nak thawn ruun dam nak thuthangtha a phur tu si cio dingah le a zem darh tu si dingah Khrih ih dungthlun tu pawl kha Galilee tipi kapah a hril nak le an nun nak a thleng aw ter tu Bibla Cathianghlim sirh san in thu a sim a si.

            Galilee tipi kap cu Jew miphun pawl lawng si lo in mi polh cawk um nak hmun khal a siih cui hnak in tha deuh mi, hmun dang a um lo, thutha dang khal a um lo ti ih, ti mi hmun a si. A sinan Khrih cu thuthangtha sim nak, a Pai hnatuan tuan nak kha minung pawl ih ziang an siar lo nak hmunah a rak thok a si. Khrih ih a sim mi sungah Vancung uk nak a nai zo, nan sual sir uh ti mi a si. Cui thuthangtha cu that lo nak thawn  a khat mi sual saal sungih a um mi hmun ih minung pawl hrang tleu nak pakhat a si. Veikhat vei hnih kan ni minung pawl cu sual nak, tulforh nak le duhhamnak pawl tan ta in mai nun can thleng dingah a si thei lo tin kan ruat theu. Cui ruah nak cu Khrih ah a si lo, thiangthlarau khal a si lo kan mah le kan mah thlengaw dingin kan zuam nak parah a um sawn a si. Run daam nak thuthangtha kan thei mi kha kan thinlungin kan hmuak ih kan thleng thei a tul asi. Thu dik kan thei nan a sual mi kha kan pom ringring a si ah cun kan thinlung cu kan thleng thei lo ding a si.

            Kan ni Khrihtian pawl cu thiangthlarau ih bom nakin Khrih ih run dam nak thlasuah kan cohlang hnu lawngah thinlung thlengnak leilung pi thlengawk nak kha zumtu din hmun in kan tuah thei ding ti mi thu kha Pope Francis in a forh fial a si. Khrih ih a rak hril mi a dungthlun tu pawl cu Khrih thawn an um tlang laiah an nun ram an thlengih Pathain ram hrangah Palai tha ah an cang asi. Cui hnatuan nak cu sual nak saal sungih a tang mi pawl Khrih ih a rak ken mi a tum zet mi zalen nak ih tleu nak a si thu Pope in a sim theh hnuah zumtu zaten Khrih dungthlun tu Palai tha si thei dingah zuam cio dingin in sawm a si.