Jesuh ton na duh le Mary le Joseph hnen pan aw

Rev. Fr. Pius Kei Lian Cung ih Thuthangtha sim mi (December 18, 2019 - Nithum ni)

"Jesuh ton na duh le Mary le Joseph hnen pan aw" (December 18, 2019 - Nithum ni)

          Bawi Khrih ah duhdawt mi nu le pa le u le nau kan Bawipa Jesuh Khrih ih suah cam Christmas puai kan nai cuah co vekin, kan siar mi Bible khal ah Jesuh Khrih ih minung si nak le a suah nak thu hla kan siar, kan ngai ih, kan ruat tlang cio. Puai hrangah timtuah nak phunphun khal kan tuah cio.

          Tuisun ih kan siar mi Mt. 1:18-24 sung in thlarau lam khal ih timtuah nak nei cio tlang ding in ka lo sawm. Pathian in a fapa neihsun Jesuh Khrih leitlun ih a runthlah tikah leitlun minung Mary le Joseph hmang in a run thlah. Curuangah "Jesuh ton na duh le Mary le Joseph hnen pan aw" tiin thu lu ka hril. Pathian Fapa cu Thiang thlarau thawng in minungah a cang ticu Mary nih hmaisa bik a thei. A pahnih nak ah Joseph in a thei. Mary le Joseph cun Jesuh Khrih naute ih a suah hlan, Mary pum sung ih thi hlum in a sem thok ihsin Thiangtharau ih Fa, Pathian ih Fa, a hminah Jesuh a si tin an rak thei veve zo. Lk 1:31 ah Vancung mi in Mary hnen ah "Fa na vun ding ih Fapa na hring ding a hmin ah Jesuh na sak ding" a rak ti. Mt 1:21 ah vancung mi in Joseph hnen ah "a nih in Fapa a hring ding ih a hmin ah Jesuh tiah na sak pei" a rak ti. Pa Pathian in vancung ih a neih mi hmuah hmuah lak ih tha bik le sung lawi bik fapa Jesuh in pek ih, Lei lung pi khal in lei par ih um mi hmuah hmuah lak ih tha bik le sunglawi bik Mary le Joseph cu Jesuh hrang le Pathian hrangah pek ding kan rak nei ve. Pathian le minung kan ton awk nak cu Jesuh le Mary an ton awk nak in a thok. Van le lei an ton awk caan a si.

          Pathian Fapa Jesuh minung sinak la ih leitlun a rat tikah a co hmaisabik tu cu Mary a si ih, a sang tu ih co tu ah Joseph a si. Mary le Joseph ih hmin sak ruangin leilung pi in "Jesuh" timi hmin kan co ve. Mary le Joseph nih Jesuh hmin an rak pek nak um hlah seh la, leilung pi in "Jesuh" timi Pathian cu rundam tu asi, rundam nak timi hi tuisun tiangah kan thei ngah lo ding. Curuangah Jesuh hmin sal thei le hmang thei dingin Mary le Joseph hnen ah pan uhsi. Himi Mithianghlim pahnih tel lo in Christmas, Jesuh suah puai tuah tla kan tum rero pang kei. Ziangkim tuah thei Pathian hman in himi Mithiang pahnih hmangin Fapa a thlah. Zumtu kan zaten himi Mithiang pahnih hmang in Jesuh tong ve uhsi. Mary cu Joseph thawn ham aw cia an si ko nan Joseph a duh dawt hnak in Pathian a duhdawt sawn ruangah Jesuh hrangah a nun a hmang.

          Joseph khal Pathian thu ngai in, Jesuh a duhdawt tuk ruangah Mary kha a then a tum nan a lak, a nei thotho. Curuangah Pathian tihzah le Jesuh duhdawt tu cun, Mary khal duh cih, lak cih uhsi. Joseph khal duh cih, lak cih uhsi. Lk 2: 15-16 sungah tuu khal pawl cun Mary, Joseph le Naute cu an va hmu ti a si. Mt 2:11 khal ah mifim pathum pawl cu Naute cu a nu Mary thawn a vung hmu ih khuk bil in an biak ti thu kan hmu. Mary le Joseph tel lo Christmas puai le Jesuh suah ni tuah hi tih a nung, thelh sual pang a ol te. Herod Siangpahrang le a ralkap pawl cun naute tampi an rak that. Jesuh pakhat lawng thah duh ih mipa naute tampi an thah rero cu a tul lo zet. Thil poi zet a si. Sual nak tam pi a si. Jesuh an ton hlan lo naute dang thah a tul lo. Ziangruangah mipa naute an hmuh mi pohpoh hi Jesuh tiah an ruat? Jesuh ih nu Mary le an mah kilkhawi tu Joseph an theih lo ruangah a si.

          Mary le Joseph theih lo le ton lo cu Jesuh Khrih ton ngah lo si mai. Zum tu Khrihfa tam pi in Mary le Joseph ton tum lo in Jesuh lawng ton kan tum ciam co theu. Herod kan hluan sual pang kei. Jesuh kan tong ngah lo pang kei. Jesuh thawn kan pial aw sual dah kei. Phan a um, tih a um. Mary le Joseph hi Jesuh thei hmaisabik le nei hmai sabik tu an si ti cu Khrihfa tampi in kan hna in a thei theu nan kan thinlung sung le nun nak ah ton kan tum lo, co kan tum lo. Joseph cu mitha asi ih Mary kha mihmai ih ningzak ih um ter a duh lo ti asi. Mitha si cu kan duh cio nan Mary ningzah ter le mual pho ter rero zumtu tamtuk hi a va poi ve.

          Mitha Joseph cun Jesuh a duh ih Mary khal a duh cih. Tuu khal pawl le mifim pathum khal in Mary an tong ih Jesuh khal an tong ngah. Naute Jesuh suah ni lawmpuai Christmas caanah hin "Jesuh ton kan duh le Mary le Joseph hnen pan uhsi." Mary le Joseph sunlawih tu le nei tu pawlpi u le nau, Naute Jesuh tong ngah tu, co ngah tu kan si. Hnangam in lung awi uhsi. Pathian thangthat si ko seh. Amen.                                                    

 

Add new comment

9 + 0 =