Khammi Thingrah Ei Uhsi

"Khammi Thingrah Ei Uhsi"

Rev. Fr. Polycarp Khaw Nei Thawng (Fr. Thawngte) ih Thuthangtha sim mi (December 9, 2019 - Nikhat ni)

            Tuini ruah khawm ding thutlangpi ah "Khammi Thingrah Ei Uhsi" tin sawm awk ka duh. Tuini December ni-9, Hngahhlap Caan sunglawi a simi Advantu-caan zarhhnihnak tlawngkai ni khat ni ah hinImmaculate Conception timi 'Sualhram neilo ih Nau-seemnak Puai' kan tuah ngel cel. Hi puai hi December ni-8 ih tuah a si theu nan tuikum cu Advantu-caan Zarhpi ni a deng ngah ruangah nikhat ni ih in thawn sak mi a si. Himi hi Bawinu Maria puai ti cu kan thei theh ko ding nan theihdaan peng a rak um thei ruangah malte ka ron rel ta ding. Mariology timi Bawinu Maria thuhla in zirhtu kan saya, Siangbawipa rori in 'tu lawngah Immaculate Conception timi le Virginal Coception timi ka thlei dang thiam ih ka thei fiang thei cop lai; hlan ahcun a duhsan bangaw vekah ka rak ruat' tin in rak ti dah. Immaculate Conception timi cu ''sualhram neilo ih a seem mi Siangpahrang Bawinu'' kan ti bangin Bawinu Maria cu sualhram neilo in a nui' sungih a seemnak ti duhsan a si.

            "Sualhram neilo in Bawinu Maria sungih nau a seemnak" tin nganmi ka rak hmuh dah zo ruangah mihrek inkan ruat sual ve pang kei tiah maw. Virginal Coception ti sawn lawng hi Bawinu Maria, fala him in a sungih nau a seemnak a si. Kan laitong cun a seemnak le a painak tin thleidang sehla a fiang vurvi ko. Ziangti lam khal si le December ni-8 cu "Sualhram neilo ih a seemmi Siangpahrang Bawinu puai" kan ti tikah "Sualhram neilo in anui sungih a seemnak ni" ti rorin hminsin tlang sehla thlakua a kimnak September niriat ni ah a Suahni kan tuah mi khal in mang ter sal ding ti sawm awk ka duh hrih.

            Adventu-caan zarhhnihnak tlawngkai ni khat ni ih kan siar dingmi Thuthangtha cu Lk 5:17-26 sung ta a si ih Bawipa in mizeng pa pakhat a damter thu kha a si. Ziangtin a dam ter ti le 'na sualnak cu ngaithiam a si zo' tin damnak a pek. Cumi kha Daanthiam pawl le Farasi pawl cun'Pathian thangsiatnak tong a si; Pathian pakhat lawng sual ngaithiam theitu a si' an ti. Asinan Bawipa in 'Milai Fapa in hi leipar ah sual ngaithiam theinak a nei a si' tiah a ti. Ziangruangah tile Fapa cu Pa Pathian in amai sinak zate thawn, amai aiawh ih a thlahmi a si. Cuvek thotho in Fapa in a dungthluntu pawl hnenah 'ka Pa in i thlah vekin nannih khal ka lo thlah ve a si' tiih a ti tikah amai sinak zate thawn amai aiawh ih a thlahmi an si ruangah sual ngaithiamnak cu tuini tianginhi leiparah in pek dingmi a si.

            Himi kan pom lo a siah cun Daanthiam pawl le Farasi pawl thawn kan bang aw dingih thlahtu Pathian sanglo tu, zumlo tu ah kan rak tel ve pang tinak a si. Cuih sual ngaithiamnak ngah dingin ziang tuah ha tul ke timi ruah tikah sualsirnak a tul kan ti le a sual lemlo ding nan a thupi bik in cun zumnak a tul kan ti thei. Ziangah tile Bawipa in a dam ter mi lakah 'na zumnak in a lo dam zo' tin tla a hmang a si. Curuangah zumnak in sual ngaithiamnak kan ngah ih rundamnak kan co mi a si. Cuih sualngaithiamnak ngah ih rundam mi si dingah sualhram thawhnak a si mi 'Khammi thingrah' kha zumnak thawn kan ei sal a tul tiah tuini, Sualhram neilo ih a seem mi Siangpahrang Bawinui puainiveikhatnak ih kan siarmi Cathianghlim (Seem 3:9-15) thawn talhton in ruah tlang ka duhmi a si.

            Kan semsuahnak, hmaisabik minung Adam le Eva in sersiamtu Bawipai thu pek ngai lo in ei hlah uh timi thingrah an rak ei ruangah Bawipa an hnen a rat tikahan ningzak in an rak relh ti a si. Tuisan minung zumtu pawl kan nundaan thlir sal tikah Bawipai duh lo mi thilsual, thil thalo kan tuah hmanah Bawipai hmaiah kan ti ding maw, mi hmai, mi lakah hngalhngawng zet in kan tlang ngam ih ningzah kan thiam lo hi poi kan ti cio lo maw. Khuitilam sualnak tuah lo ngaipi bangih si zet le si bik reng in kan um kha cu kan ti theu bangin 'si tawp ih si lem lo' santhar Farasi pawl kan si ko. Sualnak hi sual ih kan hmuh thiam nawn lo hi thlarau nun borhhlawh ter bik tu a si ko lo ding maw? Bawipa in ei hlah uh a timi thingrah kha ziang thingrah a si: atha le asia thlendan thiamnak thingrah a si.

Add new comment

7 + 5 =