Thukamnak

"Thukamnak" timi thu luu thawn Rev. Fr. Joseph Pa Ro ih thuthangtha sim mi (April 2, 2020 - Nili ni)

 

Leitlun hmun le tinkip ih a ummi nu le pa, u le nau pawl, “Thlarau Thianghlim in hnangamnak lo pe hram seh” tiah cibai ka run lo buk hai. Tuihni cu 2020, April thla nihnihni, Vua tikcu caan Kar nga nakih Tlawngkai nilini asi. Tuihni ih kan siar dingmi Bible pawl cu Semtirnak 17:3-9 le Thuthang Ttha sung ihsin cun John 8:51-59 pawl ansi pei. Tuihni ih kan ruah khawm dingmi cu “Thukamnak” tiah asi pei.

Thukamnak timi cu contract timi lungkimnak saachoh phunkhat asi. Saachoh kan ti tikah amalbik ah phuai-hnih an um ttul. Thukamnak timi cu Mirang ttong in “Covenant” tiah asi. Covenant timi Thukamnak cu thlarau lam thawn a seng aw mi lungkim awknak saachoh pakhat asi. Pathian le a minung pawl ziangtin thukamnak an tuah timi pawl ruat khawm uhsi. Cumi thukamnak sungah thlun dingmi pawl siseh, hrial dingmi pawl siseh an tel ttheu asi. Bible sungah thukamnak thawn pehpar aw in:-

  1. Pathian in Noah thawn thukamnak a tuah.

Pathian in Noah thawn thukamnak a tuah asi. Ziangtinso a tuah? Semtirnak 9:8-13 =Cuih hnu ah Pathian in Noah le a fapa pawl hnenah “A tu-ah thu ka lo kam; nanmah le nan tesinfa pawl hnenah siseh, nanmah thawn lawng sung ihsin a suakmi ramsa hmuahhmuah, vate le innzuat ttilva le hramlak ramsa zate hnenah siseh, thukamnak ka tuah: ziangtik hmanah leilung parih nunnak a neimi hmuahhmuah tilik in a siatsuah nawnlo pei. Tilik in leilung cu a siatsuah nawnlo pei, tiin ka lo kam” tiah ati. Cule Pathian in “Nangmah le na hnen ih a ummi ramsa hmuahhmuah hnenah kumkhua daih ka thukammi hminsinnak ah mero lakah vangro ka ret, ka thukammi ciinnak ah asi” tiah kan hmu thei. Pathian in hitin thukamnak a tuah nain Noah lam ihsin thlun dingmi pawl a tel hrih lo asi.

  1. Pathian in Abraham thawn thukamnak a tuah. 

Pathian le Abraham cu voithuam tiang thukamnak an tuah asi. 

A). Thukam voikhatnak:- Semtirnak 12:1-3 =Pathian in Abram hnenah “Na ram, na miphun le na pa ih inn pawl cu taanta awla ka lo hmuh dingmi ram ah va feh aw. Tefa tampi ka lo pe dingih miphun tumpi ah an cang ding. Ka lo thlawsuah dingih na hmin ka thanter ding; cuticun thluasuah mi na si ding. A lo thluasuahtu cu ka thlawsuah ve ding. Asinain siat a lo camtu cu ka cam sia ve ding. Nangmah ka lo thlawsuah vekin leitlun mi hmuahhmuah in thlawsuah in dil ding” tiah asi.

B). Thukam voihnihnak: Semtirnak 15:18 =A cuihni ah Bawipa in Abram hnenah thukamnak a tuah; “himi ram hmuahhmuah hi na tesinfa pawl hnenah ka pe ding tiah ka lo kam asi. Egypt tam ih tiva ihsin Eufrates tivapi tiang a si ding” tiah ram pe dingin thu a kam dah asi.

C). Thukam voithuamnak:- Semtirnak 17:2, 4-5 “Na hnenah thukamnak ka tuah dingih tesinfa tampi ka lo pe ding. Nangmah thawn ka fehter dingmi thukamnak cu hihi asi. Leitlun miphun tampi ih cithlahtu na si ding tiah ka lo kam. Na hmin hi Abram si nawnlo in Abraham tiah asi thlang ding; ziangahtile miphun tampi ih pa ah ka lo tuah ding” tiah kan hmu thei. Tuihni kan siarmi Bible a voikhatnak ah kim tein kan hmu thei. Semtirnak 17:10 “Nangmah le na tesinfa pawlin ka thukammi nan fekternak dingah mipa hmuahhmuah in vunzim nan tan thluh pei” tiah vunzim tan dingin Pathian nih a fial asi. Semtirnak 17:12 “Himi cu Keimah le nanmah kar lakih thukammi langternak asi” tiah ati. Vunzim tanlo mi pawl cu hlon an tuar ding tiah tla cang 14 ah asim bet. Semtirnak 17:15 achun “Cule Pathian in Abraham hnenah “Na nupi hi Sarai tiah na ko nawnlo pei, A tu thok ihsin a hmin cu Sarah tiah asi pei” tiah Sarah hmin ah a cannak thu kan hmu thei.

  1. Pathian in Moses hnenih Israel pawl hrangah thukamnak a tuah. 

Pathian in Israel miphun pawl hrangah Moses thawngin thukamnak a tuah asi. Moses cu Pathian le Israel miphun pawl kar lakah palai a ttuantu asi. Suahlannak bung 19-24 tiang pawl cu Pathian in a minung pawl hrangah Thukham pahra a peknak thu le thukamnak a tuahnak thu pawl kan hmu thei asi. Pathian ih thupekmi hmuahhmuah cu Moses in Israel mipi pawl hnenah a va sim tikah mipi pawlin Pathian ih thupek hmuahhmuah cu kan thlun ttheh ding tiah an ti ih Moses khalin lungawi zetin raithawinak a tuahih rai thisen a hrekkhat cu mipi pawl a thehih a hrekkhat cu raithawinak a peknak hmun biakttheng parah a theh asi tiah Suahlannak 24:3-7 ah in sim asi. Suahlannak 24:8 “Himi thisen cu Bawipa in nanmah thawn thukamnak a tuahih a thupekmi hmuahhmuah nemhngetnak thisen asi” tiah a ti. Thisen thletmi thukamnak tiah kan ti thei asi. An tuah mi thukam pawl cu Israel mipi in an thlun suak ringring asi ahcun Israel mi pawl cu Pathian ih miphun ansi dingih Bawipa cu an Pathian asi ve ding. Israel miphun pawlin an siatbal asi achun Pathian in a siatsuah ve ding asi. 

  1. Pathian in siangpahrang David hnenah thukamnak a tuah.

Pathian le siangpahrang David te cu thukamnak an tuah asi tiah 2Samuel 7 ah kan hmu thei. Siangpahrang David thawn lawng si lo in a tesinfa pawlih san tiangin hi thukamnak pawl cu hnget ringring dingah Pathian in thu a kam asi. 

  • Kannih zumtu Catholic Christian pawl hrangah Jesuh Khrih in a netabik zanriah ei puai ah a Thi le a Sa a serhsiamnak ah a thisen thletmi cu “a kumkhua in a hmunmi thukamnak thar asi” tiah Bawipa Jesuh nih in zirh asi. Cumi thukamnak ah kan tel ve theinak dingah kanmah le Jesuh Khrih pehtlainak hrambik asimi baptism kan ngah a ttul asi. Baptism kan ngah tikah Bawi pathum Pathian pakhat cu ka zum asi kan ti ih Satan siseh, satan ih hnattuannak hmuahhmuah siseh ka hlon ttheh asi tiah thu kan kam. Kum tintein cumi thukamnak cu a tharin kan rak tuah sal. Cutin cu Chrihfa kan cangih Bawipa thi le sa kan saang thei. 
  • Bawi Jesuh cu thukamnak hlun le thukamnak thar pehzomtu asi. A thisen a thletnak in thukamnak hlun lai ih rai thisen luangin thawinak pekmi cu a cemter ih thawinak thar cu a thok asi. Cumi thawinak thar cu Melkhizadech puithiam vekin sang le sabitti thawn thawinak pek hi asi. Cumi cu kumkhua in a hmunmi thukamnak thar ih thawinak asi. Hebrew 10:9 ah “Curuangah Pathian in raithawinak hlun pawl cu a hnongih a cuih ai ah Khrih ih raithawinak cu a nemhnget asi” tiah in zirh asi. 
  • Pathian thawn siseh, Jesuh Khrih thawn siseh, Thlarau Thianghlim thawn siseh, Kohhran thawn siseh kan tuahmi thukamnak pawl cu fek tein kan thlun suak ringring theinak dingah zuam uhsi. Cumi cu Pathian thawn kumkhua nunnuamnak kan co theinak hrangah asi. A bikbik ah Bawipa thi le sa cu thukamnak tharih thawinak asi. Baptism le Chrisma thapeknak kan lak lai ah tla thukamnak kan tuah. 
  • Kan tuahmi thukamnak vekin fel zetin kan thlun suak theinak dingah Pathian nih in run thluasuah hram seh.

 

 

 

Add new comment

1 + 0 =