Milem Biaknak Thu

Catholic zumtu pawl hi milem an biak maw?

“Catholic zumtu pawl cu milem biak an si” ti’n minung tampi in an pomhrih lai. Catholic zumtu pawl in an biakinn sungih milem le zuk tampi an ret theu ruangah, Pathian thukham siatbal tu an si tiah Bible sirhsan in mi tampi in mawh an phurh theu. “Vancungah siseh, Leilung parah siseh, leihnuai tidai sungah siseh, a ummi pawl hmuihmel cuangin nan hrangah milem nan tuah lo pei. Milem nan bia lo pei; a hmaiah nan lu khal nan kun lo pei……………..”(Suah 20:4-5).

Milem biatu pawl hnen ih milem biak lo dingih ralrinnak pek cu a dik mi a siih kan tuah ding hrimhrim khal a si. Asinain, Jesuh Khrih le Mithianghlim pawl ih zuk le milem pawl an neih ruangah Catholic zumtu pawl cu milem biatu an si titu pawl cu milem le zuk pawl hman daan thawn pehpar in Bible ih zirh duhmi taktak a theithiam lo tu pawl an si.

Christian zumtu tampi in biaknak ah milem hman hi Pathian in a kham a si an ti theu. Sihmansehla, Bible sung tha teih kan cek le kan hawl tikah a linglet zawng khal a dikmi thil a si thu kan hmu thei (Jn 5:39). Pathian in milem biak cu a kham ngaingai ko; asinain, biaknak hrangih milem hman cu a kham lo lawng si loin a forh sawn lam a si.

Pathian in Milem Tuah a Fial

Biaknak hrangih milem hman a hrial tu pawl hi Pathian in milem tuah a fialnak thuhla pawl umnak Bible bungcang pawl ziang siar lo tu pawl an si. Tahthimnakah, “A sin ih khat lam le khat lam zim veve ah sui ih sermi cherub timi thlanei ramsa pahnih (himi in sui ih tuah mi Vancungmi lem 2 a tinak a si) nan tuah pei ih, zim khat ah pakhat ciar nan ret pei. Cherub pahnih cu a tlunah an thla an pharh pei ih kuangsin cu an thla in an khuh pei. Cherub pahnih cu an hoihaw pei ih kuangsin cu an zoh veve pei” (Suah 25:18-20).

David in a fapa Solomon hnenih Biakinnpi sak ding daan pawl a cah tik khalah Vancungmi lem tuah ding thu a tel thotho. “Rimhmui urnak biaktheng le Bawipa ih Thukham Kuang tlunah an thla parh in a ummi Cherubim timi pawl an cuannak leng hrangah sui hlir in ziangzat a cem ding tikha fel tein a cah theh. Siangpahrang David in, “Hi hmuahhmuah cu Bawipa amah rori in a kut in a nganih ka hnenah tuahsuak dingih i cahmi an si” a ti (1San 28:18-19).

Cuvek thiamthiam in Ezekiel 41:17-18 sung khalah Ezekiel ih langnak a hmuh mi sungah Biakinn sunglam phar ah Cherubim timi Vancungmi zuk an suai thu fiang zet in kan hmu thei.

Biaknak ih Milem Hmannak

Suahlannak sungah Israel mipi pawl turnei rul tampi ruangih siatralnak an rak ton laiah, Pathian in Moses hnen ah daar rul tuah a fial ih thuam parah a thlai ter. Rul cuk a tong mi hmuahhmuah in daar rul lem an zoh tikah thihnak ihsin an rak luat (cf. Mipum 21:8-9). Rul cuk nak ihsin damnak hmu ding cun, daar ih tuahmi rul lem zoh a tul. Himi in “Statues” kan timi lem pawl hi biaknak hmun ceimawinak lawng siloin, amah Pathian biaknak sungkhalah hman theih a si ti a lang ter. Suahlannak bung 20 sungah cun ziangvek milem hman tuah lo ding ti’n Pathian in a kham a ti nan, Mipumsiarnak 21 sungah le Pathian amah rori in milem tuah a fial lala fawn; Bible a kalhawk teh si pei maw? Pathian in milem tuah a duh lo mi hi ziang vek pawl an si pei? Tha te’n na ruat dah maw?

Catholic zumtu pawl in lem siseh, zuk siseh, kutthiam dangdang siseh, Pathian biaknak hrangih  kan neih le kan hman hi cumi pawl ih an cuanter mi minung pakhatkhat cinken ringring nak dingah tiih tumtahnak thawn a si. Lem le zuk parih zumnak le upatnak kan neih mi si lo in, acuih lem le zuk ih cuangmi pawl kan upat le kan sunloih mi sawn a si. Cucu, kan duhdawt zet mi kan pi le pu, nu le pa, unau sungkhat siseh, mipi hruaitu upat tlak upa pawl siseh, anmah hngilhlonak ah ti’n an lem siseh, an zuk siseh, an ro pakhatkhat siseh, tha te’n kan ui ih kan ret mi vek a si. Ahleice in zumtu hmasa pawl lakih casiar thiam lo pawl hrangah cun, lem le zuk hi zirhawknak khalah a tangkai zet mi thil pakhat a rak si. Tulai san khalah kan fale pawl zirhnak ah Bawi Jesuh zuk siseh, Bible thuanthu sungih zuk dangdang siseh, Catholic zumtu pawl lawng siloin zumtu Christian dangdang khal in kan hmang rero ko.

Pathian ih in kham mi cu milem biaknak a si. Milem tuah hi a kham mi a si lo. Milem kha Pathian dinhmun ah ret ih biak hi a duh lo mi a si. Curuangah misenpi in daar ih tuahmi rul lem cu Nehushtan hmin pe tahrat in pathian biakih an biak tikah mi dingfel zet mi Siangpahrang Hezekiah hmangin Pathian in a rak siatbal sak a si (2Siang 18:4).

Milem Hmaiih Lu Kunnak

A caancaan ah, Catholic dodal tu pawl in Daanpeksalnak 5:9 sungih ‘ziangvek milem hmai hmanah lu kun in (bow down) nan biak lo pei’ timi Pathian tongkam sirhsan in Catholic zumtu pawl in Jesuh Khrih le Mithianghlim pawl ih lem hmaiih lu an kun le khuk an bilh hi a dik lo a si ti’n an ti theu.

Lukun hi biaknak (worship) ih hman theih a si ko. Asinain, lukun hmuahhmuah hi biaknak (worship) an si lo. Khukbilhnak khal cutivek thiamthiam a si. Kan ram alan (flag) hmai ih kan lu kan kun tikah, kan ram alan (flag) kan biak a si lo. Cutivek thiamthiam in kan pi le pu siseh zohthimtlak kan hruaitu pawl lem hmai ih kan lu kan kun tikah an lem kan biak a si lo. Milem ih a cuangtu pawl upatnak kan pek mi a si. Mi pakhatkhat in ram uktu hmaiah siseh, biaknak lam hruaitu hmai ah siseh, khukbil in thil pakhatkhat a dil thei. Asinain, a khuk bil tahratih a dil ruangah a biak kan ti thei lo.

Thukham Pahra Sungih Pahnihnak

Christian zumtu hrek khat pawl ih an ti theu mi cu Catholic zumtu pawl in Thukham 10 sungih 2nak an hnon/thuh ti a si. Ziangruangah tile Catholic zumtu pawl hrangah cun “Keimah cu na Pathian ka si. Keimah siarlo a dang pathian na biak lo pei” ti hi Thukham 1nak a si ih a 2nak cu “Na Bawipa na Pathian ih hmin cu duhdah in na hmang lo pei” ti a si. Curuangah Catholic zumtu pawl in milem an hman mi a sual lo ti langter duhah milem biak lo dingih Thukham 10 sungih a timi an hlon/thuh ti’n mihrek in an ti. Sihmansehla, himi sualpuhnak hi a dik mi a si lo. Catholic zumtu pawl in Thukham 10 an thendaan le Protestant pawl ih thendaan an bangawk lo ruangah a si sawn.

A taktak cun, Thukham 10 thuhla kan hmuhnak Suahlannak 20:2-17 sung kan zoh tikah tuah ding le tuah lo ding ih thupekmi 10 hnakih tam kan hmu thei a si. Thukham 10 tiih kan ti ding cun, hrek khat thupek pawl kan kom a rak tul. Cutiih komdaan khal a dangdang a rak um ve. Khuahlan ahcun Pathian tampi biaknak (Polytheism) le milem biaknak (Idolatry) timi pehtlaihnak nei an si theu ruangah, Judah biaknak pomtu (Jewish) pawl in Thukham 10 an rak then tikah Suah 20:3 ih “Keimah siarlo pathian dang nan biak lo pei” a timi le cang 4 ih “Nanmah ten milem nan tuah lo pei” a timi thupek pahnih cu Thukham pakhatnak sungah an rak kom. Catholic Pawlpi khal in Thukham 10 a then tikah, Jewish pawl ih thendaan te a rak thlun.

Jewish pawl siseh, Christian pawl siseh, Thukham 10 thu kan sim tikah, cinken ol ding te’n a tawizawng in kan sim theu. Asinain, a tawizawngih kan simawkdaan a dang. Jewish, Catholic le Lutheran pawl in Pathian tampi biak khamnak le milem biak khamnak cu “Keimah siarlo a dang pathian na biak lo pei” ti’n a tawizawng in an sim. Himi ruangah, Catholic zumtu pawl in milem biak khamnak hnon/thuh an duh mi siloin, Thukham 10 ol ten cingkeng thei ding tumtahnak thawn an hman mi a si sawn.

Catholic Pawlpi sungah Thukham 10 thendaan le a nambat thendaan thawn pehpar in cu ti’n a si, kha ti’n a si tiih a cekci ih zirhawknak a um lo. Doctrine khal a si dah lo. Ahlan ih thendaan (Tradition) kan thlun men mi a si. Catechism of the Catholic Church timi Catholic zirhawknak CCC cabupi sung ahcun, Thukham 10 thendaan hi a san ih zir in a dangdang a rak um a ti. Tuih kan hmanmi Thukham 10 thendaan hi St. Augustine ih rak hman thok mi a si ih, tui ni tiang hmankel ah a rung cang ta. Lutheran pawl khal in St. Augustine ih thendaan te an pom ve. Christian zumtu dang hrekkhat pawl cun a thendaan dang te an nei ve (CCC #2066).

Pathian Hmuihmel

Pathian in biaknak lam hrangah sersiammi thil dangdang hmuihmel keng milem pawl tuah ding a kham lo thu fiang zet in kan hmu zo (cf. 1Siang 6:29-32, 8:6-66; 2San 3:7-14). Cuti a sile, amaih hmuihmel kengmi milem tuah teh a kham pei maw? Zumtu tampi cun Pathian hmuihmel kengmi milem tuah khal a sual an ti ding. Ziangah tile, Daanpeksalnak bung 4 sungih Bible ih a tivek in, Israel mi pawl in Pathian hmuihmel ziangvek a si ti an hmu thei lo pi; curuangah Pathian hmuihmel kengmi milem khal tuah lo ding an ti theu. Asinain, Bible in Pathian hmuihmel kengmi milem tuah lo lawlaw ding a ti lo zia kan hmu thei.

Hlanlai ahcun, Israel mi pawl cu Pathian hmuihmel kengin zianghman tuah lo dingin kham an rak si. Pathian taktak theilo pawl ih nunphung dangdang lak ih khua a sa mi an rak si tikah, sersiam mi thil dangdang hmuihmel hmangih Pathian biak an rak tum caan khal a um thei. Asinain, nehhnu lam cun, Pathian khal in hmuhtheih hmuihmel kengin Israel mi pawl hnenah a rak lang. Himi thu thawn pehpar in Danniel 7:9 sungah fiang zet in kan hmu. Pa Pathian ih hmuihmel zuk suai tikah Protestant pawl khal in himi Danniel sungih hmuihmel hi an hmang theu.

Thiangthlarau Pathian khal amah le amah a phuanawk tikah hmuhtheih hmuihmel kengin a phuang aw a si. Jesuh Khrih Baptism a ngah laiah thuro hmuihmel keng in a lang (Mt 3:16; Mk 1:10; Lk 3:22; Jn 1:32). Cun Pentecost ni ah lei vek meialh hmuihmel keng in a lang (Tirh 2:1-4). Catholic zumtu pawl siseh, zumtu dang pawl siseh, Thiangthlarau Pathian hmuihmel kan lang ter duh tikah thuro le meialh hmuihmel kan hmang theu.

A thupi bik mi sawn cu, kan Bawipa Jesuh Khrih milai cannak a lak tikah Pathian in amaih hmuihmel hi milai pawl hnenah fiang zet in a lang ter a si. Paul in Jesu Khrih cu Pathian hmuihmel kengtu (Greek in IKON) a si a ti. Curuangah, hmuh theih lo Pathian cu hmuhtheih si dingah Jesuh Khrih ah a rung lang.

Mt 2:11 sungah mifim pathum te Bethlehem khua an thlen ih innsung an luh tikah naute Jesuh cu a Nu Mary thawn an hmu ih an biak a ti. Horeb tlang parah cun Pathian in a hmuihmel a rak hmuh siang lo nan, Bethlehem khua ah cun fiang zet in a rak lang ter ta a si.

Zocio kan thinlung sungih kan theih vekin, kan biak Pathian in hmuihmel phunphun hmangin amah le amah a rak phuangaw. A hleice in minung/milai cannak a laktu kan Bawipa Jesuh Khrih ah Pathian hmuihmel langpang bik in kan hmu thei. Curuangah, Pathian kan theihnak le kan duhdawtnak karh sinsin nak ding ruahsannak thawn cuih hmuihmel pawl hman hi a sual lo a si. A sual lo ruangah Pathian khal in hmuihmel dangdang hmangin amah le amah a phuangaw ih cuih hmuihmel kengmi milem le zuk pawl khal tuah le hman an sinak a si.

Pawlpi ih Hrialmi Milem Biaknak

Dungthluntu pawl san lai ihsi thok in Catholic Pawlpi in milem biaknak hi a rak hnong/hrial ringring a si. The Council of Trent (AD. 1566) ih zirhnak in “Milem pawl Pathian dinhmun ih ret ih kan biak tikah siseh, milem pawl in biaktlak ding khop in huham an nei tiih kan pom tikah siseh, milem biaknak sualnak tuah kan si” a ti (#374).

Zanthing/ lungto/ plastic/ le thil dangdang ih tuahmi milem pawl Pathian an si tiih ruahnak cu thukhat a si ih, Jesuh Khrih le Mithianghlim pawl kan mit ih ra cuang ding duh ih an lem le zuk pawl hman duhnak thinlung cu thukhat a si timi a thleidan daan an thiam lo mi hi Catholic huatu le dodal tu pawl ih an palh theu mi a rak si.

Catholic zumtu pawl hi milem biak an si maw silo ti cu an Pathian biakdaan tha teih a zingzoi tu pawl cun an hmufiang thei ko ding.

Duhdawtmi nulepa ulenau pawl hihmuah nan siar cun, Bible ih milem biaknak a timi hi ziang a si ti nan fiang thlang ko ding ti’n zumnak ka nei.

A dangdang khal hlawmawknak kan run nei theu ding.

 

By: Fr. David Mangte

Add new comment

4 + 14 =