Kan Thuhla

RVA Falam Service cu Radio Veritas Asia (RVA) kut thuai ih online service pakhat a si ih Falam Khuapi ih toh mi a si. Kan service ih tumtah mi cu, leitlun hmun kip ih a um mi Falam tong  thei hmuahhmuah hrangah, Pathianthu in siseh, theih tul mi thu dangdnag in siseh, khat le khat hlawmawknak dingih tuah mi a si. Himi online service ra tlawngtu hmuahhmuah in Pathian in daihnak lo pe hram seh.

 

Radio Veritas Asia (RVA) Thuanthu Tawi

RVA (Radio Veritas Asia) cang suak nak ding hrang ah FABC (Federation of Asian Bishops’ Conference) Asia Bishop pawl ih hoha nak in 1958 kum thok in Philippines ram Manila khuapi ih um mi St. Thomas University (DSZT) aw thlah nak zung hmang in an rak phuan thok. Radio Veritas Asia (RVA) ti mi cu kan tong in, Radio ihsin Asia ram sung ah Pathian thuhman, thutak simnak le thurel nak asi.

1961 kum June thla ah Philippines Hluatdaw le President Carlos P Garcia tein Philippines ram ih Daan 3129 kha an nam hnget ih Philippine Radio fim thiam zirhnak (PREIC) le Thuthannak zung ah aw thlah thei nak thu an pek.

Aw Thlahnak Zung Sak nak le On nak

Jose Yulu te ih sung kua in Quezon khua sung ah an maih lei ram acre 5 RVA zung pi hrang ah an rak hlu dah. Cui hmun ah RVA aw khom nak khaan pawl, Management khaan le a dang a tul mi tuah nak khaan pawl le RVA Service phun kim ih zung khaan pawl an sak.

Hi mi cu Asia ram sungih um mi Bishop pawl ih thu ruah nak thawn le Pope Paul VI ih lung kim pi nak thawn April 11, 1969 kum in Philippines ram Manila khuapi ah an phuan thok asi. 1969 kum April 11 ni ah Pope Paul VI aiawh tu Cardinal Antonio Samore in Asia Bishop pawl thawn RVA zung thar onnak an nei. Hi Philippines ram in Radio in an thlah ih Asia ram pumpuluk ah tong phun kim thawn Pathian thu an rel nak cu RVA tiin an ti.

1994 kum April 11 ni ah Manila Diocese ih Cardinal Sin le Philippines President Ramos te ih ho ha nak in RVA Silver Jubilee on nak puai an tuah.

1995 kum January thla ah Pope John Paul II ho ha nak in Silver Jubilee theh nak puai le RVA tuan vo nei tu pawl kha Mass Media thiamhleice tuan man laksawng kha Manila Khuapi ih International Hall (Ram tin kim thawn pehpar aw mi thu rel tlang nak inn pi) ah an tuah.

Germany Catholic Pawlpi ih RVA aiawh tu Rev. Fr. Rauh ih zuam nak in 1963 kum ihsin thok in RVA hrang ah bom nak pawl an rak ngah asi.

RVA ah Asia ram sung ih tong phun (18) pawl in nitin thuthangtha an sim asi. Kawl ram sung ihsin Kawl, Kachin, Chin le Karen tong pawl an tel.

            India ram ih um Rev. Fr. Mark Thang Khan Ai le Lairam ih um Rev. Fr. John Om Se te cu Philippines ram ah tlawng an kai ih an ton awk nak in RVA Zomi-Chin Service hmin thawn Radio in Pathian thu rel nak an rak zuam thok. India ih um Bishop Mattathany le Lai ram ih um Bishop Nicholas Mang Thang te thawn India ram ih um Rev. Fr. Mark Thang Khan Ai te an tong awk ih an maih lung kim nak in India ram le Kawl ram sung um Laimi pawl hrangah RVA Zomi-Chin Service cu August 5, 1996 ni in an phuan thok zo asi.

            Hi RVA Zomi-Chin Service a thawh pek nak ah India ram ah Fr. Mark Thang Khan Ai in Director a tuan. Kawl ram in Rev. Fr. Anthony Hem Kho Sei in Director a tuan ih Saya Francis Lian Khan Pau le Mr. Raymond Khampu thawn an rak tuan tlang. India ram in Zo tong le Kawl ram in Tedim tong in Pathian thu rel nak an nei ih Zomi-Chin Service hmin thawn Kaarkhat sung can an rak hmang tlang asi.

Rev. Fr. Anthony Hem Kho Sei in kum 2000 tiang a tuan ih cuih hnu Rev. Fr. Dominic Kung Tial in kum (2000-2009) tiang Director a rak tuan. Cuih hnu in Zomi-Chin Service sung in (1) Tedim-Chin Service (Tedim tong), (2) Falam-Chin Service (Falam tong), (3) Hakha-Chin Service (Halkha tong), le (4) Mindat-Chin Service (Mindat tong) pawl thawn Pathian thu rel thei nak ding in Chin hmin thawn Service (4) bet ding in an rak zuam. An mah ih zuam nak cu Rev. Fr. John Paul Mang Sein Yaw ih Director a tuan sung 2010 kum in Chin hmin in Service (5) an run nei suak asi. Cui sin thok in 2012 a cem tiang Zomi-Chin le Tedim-Chin kom aw in Zarh kaar khat sung an hmang tlang ih Falam-Chin, Hakha-Chin le Mindat-Chin phun thum an kom aw ih Zarh kaar khat sung an hmang tlang. Cu mi sung in ni khat ah Nazi khuai (minutes 30) ciar caan an hmang tlang a si.

            Falam Chin Service cu 2010 in an rak thok. Rev. Fr. Francis Lan Sawn cu RVA ah kum 6 (2010 – 2016) sung Coordinator tuan vo a lak ih Rev. Fr. John Paul Mang Sein Yaw nih Director a tuan. Cu lai ah cun Radio ih aw thlah asi ih Kalay Myo, Bishop Compound, RVA zungah feh in aw khum nak an rak nei theu. Cu lai ih sungtuan pawl cu; Sr. Cecilia Tha Lawng, Saya John Tial Khuai le Saya Noel Tluang Bawi an siih,

A bawm tu pawl cu; Saya Lung Kaar, Saya Sial Kham, Rev. Fr. Dominic Thawm Hlei Hnin, Mai Rasa Van Cer Thluai, Mai Theresa Thuah Sui, Saya Cletus Hrom Lian, Saya No Mang, Saya Nicholas Yan Lin Naung le U Augustine Van Hel Thang pawl tla an si.

2017 kum in san ti luan zir in Radio hman tam asi nawn lo ruangah Online service a thawh thei nak ding in Philippines ram ah (Social Media Communication Training) an tuah ih cu mi sungah Language Service cio in kai hruai tu dingah mi pakhat ciar training an kai ih training theh tu pawl in an maih Service cio ah (Online Service) an thok thlang asi.

Rev. Fr. Robert Thang Lian Sang in 2016 kum in RVA Falam Service ah Coordinator tuan vo a lak thok. A mah cu Philippines ramah RVA Training thla 2 a theh in Coordinator a tuan ih RVA Falam Chin Online Service an thok asi. Asinain 2017 kum cem tiang Radio le Online hman tlang asi ih Pathian thuthangtha sim nak nei asi. 2018 kum thok in Radio hman asi nawn lo nain Radio hman lai vekin Nazi khuai sung Mobile App thawn ngai thei ding in (Audio Program) tuah theh hnu ah Online Service hrang ding ah Program (8) bet asi ih aw lawng si nawn lo in hmelhmuh theih mi Video thawn Online ah Pathian thuthangtha sim nak thlah a si theu. 2018 kum sung in a vei (2) nak le vei (3) nak (Social Media Training cu RVA Falam Service) hmin in (1) Sr. Cecilia Tha Lawng (2) Rev. Fr. David Kap Cin Mang (3) Salai David Biak Lian Thawng te pawl an kai ih Training an theh hnuah (Full time Staff) an tuan ih nitin tein Zung hna an tuan asi.

RVA Falam Service (Online Service) a bawm tu pawl cu; Rev. Fr. Joseph Ro Nei Thang, Rev. Fr. Peter Lal Zin Thang le Sr. Emily Ngun Tlun Thluai, Falam Puithiam Pawl (FPP), Mai Magaret Run Siang Hnem, Mai Clare Ni Tha Sin le Mai Jacinda Siang Lawng Tial an si.

A hlan Radio san ih a rak tuan tu pawl khal in Online Service ah tla an rak bawm phah phah asi.

Please wait while the page is loading