Khua khat in khua khat a vai tu pawl kilkhawi ih a bawm tu mithianghlim Frances Xavier Cabrini

St. Frances Xavier Cabrini (November 13)

          Khua khat in khua khat a vai tu pawl kilkhawi ih a bawm tu mithianghlim Frances Xavier Cabrini cu Italy ram Sant’ Angelo lodigiano ah kum 1850 kumah a rak suak. Amah cu anau hak te lai ihsin Sister tuan dingah Sister tlawng um nak tam pi ah lut dingin a rak feh nan a mai taksa dam lo nak ruangah an rak sang lo a si. Amai sunmang cu Tuluk ramih missionary hnatuan ding a rak tum mi a si. Curuangah 1877 ah Lodi khua pi ih Bishop pa in khui mi sister-kaing hman in an lo sang duh lo a si le nangmah ten a thar phuan aw tiah a rak a ti. Cu mi tong fang vekin mino pawl ca zirh dingah a tumtah mi a si ih Jesuh thianghlim thinlungih missionanry hnatuan nak cu Codogno, Milan le Rome khuapiah a rak phuan thok.

          Cuihnu kumhra a kim tikah Frances Xavier cu Pope Leo XIII nakih forhfial nak vekin America ramah a feh. Amah cu America ih a vei mi Rome miphun pawl hrangah hnatuan dingin a feh mi a si. New York ih a thlen tikah America ih Bishop in kirsal in tlung dingih a ti tikah Frances in Pope ih hi nah I kuat ruangah hi tawkah ka um ding tiah a rak let. Amah cu tik cu mal te sungah tlawnginn, Sizung le hngaktah um nak tlawng tam pi a rak phuan thei ih tlunah an hnenah a lut tu mi nung tam pi an um a si. Mirang ca le mirang tong zir nakah harsat nak tam pi rak tong hman sehla a mai tumtah mi sunmang hngilh lo in le thlau thla men lo in khua khat in khua khat a vai mi pawl le inntek pawl America miphun pawl karlakih a Pathian hnatuan nak cu tam pi a that hnem pi a si.

          Mother Frances Xavier Cabrini, cu December 22, 1917 ah Chicago, U. S. ramah a nun nak a rak cem ta a si. July 7, 1946 ah Pope Pius XII in Mithianghlim a si thu a hnemhnget a si. A thok ih mi dam lo mi nunau cu thazang nei in hna tam pi a tuan thei a si. Curuangah kan ni khal a mah bangin thlacam nak ih man in zirh aw zangfah dil tlang uh si.