Mithianghlim Pawl Puai Thuhla

Mithianghlim Pawl Puai thu

Mithianghlim Pawl Puai (All Saints day) (November 1)

Mithianghlim pawl puai cu kumtin ten Nov ni khat ni ah sung lawi zetin kan hmang theu a si. A tawi zawng kan ti le kanmah vekin lei parah a rak um dah ih vancungram a thleng zotu pawl an si.

          Mithianghlim pawl cu Paradizu ah Pathian thawn famkim zetin kumkhua nuam zet in a um tlang tu an si. An mah sungih sin a hrek khat pawl cu Pawl pi ih ngamhnget mi an si ih a tam sawn cu Pathian lawngih theih mi an si. Thuphuan 22:5 sungah ''Cuih hmunah zan a um nawn lo dingih; mei-inn siseh nitleu siseh an tul nawn lo ding. Ziangah tile Bawipa Pathian cu an tleu nak a si ding ih Siangpahrang bangin kumkhua in an uk lanta ding"tiah kan hmu thei a si. Anmah sungih a sunglawi bik tu cu vancung mi pawl ih Siangpahrang Bawinu ti ih an upat zet mi a thianghlim mi Bawinu Maria a si.

Kan ni zate khal mithianghlim cang dingah kawh nak a ngah tu kan si. Ahrek khat cu thudik thuhman hrangih thih nak an tuar nak in siseh, a hrek cu cawn tlak mi nuncan ziaza tha thawn nun nak in siseh, a hrek khat pawl cu nitin an tuah an tuan mi parah a cang thei top in tuan vo neh nakin siseh, Mithianghlim cang dingah kawh nak a ngah tu pawl kan si. Curuangah Thuphuan 21:27 sung khalah Cuih khuapi sungah a thiang lo mi zianghman a lut lo ding; ningsinza thil a tuahtu le thuphanpertu khal an lut lo ding. Tuufa nunnak cabu sungih hmin ngan mi lawng an lut ding tin kan hmu thei a si. Kan ni khal hi mi bur pawl lakih kan tel thei nak ding kan tuah kan tuan nakah teimakinhna tuan tlanguh si. Cun Thuphuan 7: 9 sungah ka hnun zoh ih mipi tam zet ka hmu. Zohmanih siar cawk lo miruun pi an si. Annih cu phunkip, hmam kip le hrin kip tong kip ihsin a ra mi an siih  bawi tokham le tuufa hmaiah an ding; puanrang an hrukih an kutah thulhfau hnah an kai fing fing. tin kan hmu thei a si. Cun Thu phuan 7:13 sung khal ah Upa 24 sungih pakhatin Hi puan rang sintu pawl cu zo so an si? Khuitawk ini so an rat tiah a sutih Bawipa ka thei lo nangmah na thei sawn ding tiah a ti. cule an nih in Hi mi pawl cu hremnak nasazet  sungih sin himdam in a ra  suak mi an si. An puan cu Tuufa thisen sungah an sawp ih an vaar ter zo.

Curuangah Pathian ih bawi to kham hmaiah a sun a zanin hna tuan tu an si. tiah a ti. Bawipa cu an himnak a si ding. An ril a rawng nawn lo dingih an ti khal a haal nawn lo ding. Cule an mitthli hmuahhmuah cu Pathian in a hnul sak theh ding a si.tiah kan hmu thei a si. A rak ngai tu Nu le Pa ulenau kan ni Christian nun ah hin kan Christian si  nakih kan tuar nak le Bawipai ram hrangih bang le thlanhri put ih kan tuan mi cu a lak si lo in kan ngah lai ding ti mi ruahsan nak thawn teimak in tuan tlang uh si.  

Add new comment

1 + 1 =

Please wait while the page is loading