Fa le pawl thil an fir theu asile ziangtin tuah ding.

Fa le pawl thil an fir theu asile ziangtin tuah ding.

            Fa le pawl thil an fir na hmuh mi cu na hrangah a tha lo bik mi hmuhton mi pakhat asi. Nauhak pawl cu rualpi ih hrawt nak pawl, rukru timi cu thil tha lo ti an theih lo ruangah thil an fir tla a si thei.

Ziangruangah nauhak pawl thil an fir.

Nauhak pawl in nupa pawl, nunau pawl, rualpi pawl, sungkhat pawl hnen ihsin thuhla a phunphun le thil pawl an fir theu, a san bik cu

1. Self-control an neih lo nak

Nauhak pawl cu mah ih umtlandaan pawl a kilkhawi awk thei lo ruangah a hmai ih a hmuh mi tinkim a fir thei.

2. Thil man khung an duhnak

Nauhak pawl cu thilmankhung pa khat khat an duh tikah na tuah thei mi thil asilo tiin a ruat men thei. Cutikcah thil an fir thei.

3. Khukhri pawl ih sawmnak

Nauhak pawl cu tlawngah asilole midang a pehtlaih mi a rualpi pawl ih um daan tha lo pawl a cawng thei. A rualpi pawl ah fifir hmang an um thei. Himi khalin fifir ah a cang ter thei.

4. Ngaihsak nak ngah dingah

Nauhak pawl in amah cu saya asilole nupa pawl hnen in ngaihsak nak ngah dingah thil fir nak vek thil tha lo pakhat khat an tuah ding a tul tiin an ruat.

5. Nuamnak tiih ruahnak

Himi thu cu thil fir hi a tha lo ti thei loin fir nak a si. Amah cu midang pawl lungawi lo nak thuhla pawl ihsin lungawinak ngah nak a si.

Ziangtin felfai ter ding.

            Nupa dinhmun in himi buainak felfai ter  tikah daiten um in tuanvo thei zet in tuah thiam dingah a tul. Na thinheng nak lang ter in nauhak pawl nasa zet in na hrem ahcun ziang tik hman ah an hrangah bomnak a si lo ding. Nau hak ih a ton rero mi thil fir nak buainak cu na felfai ter thei dingmi a si.

1. Nauhak kha ziangtik khalah mawhpuh hlah.

Nauhak thil a fir na hmuh hlan asilole na zum ngaingai mi hnen ihsin na theih lo asile nauhak mawhpuh hlah. Veikhat veihnih ah nauhak a sual tiih puhnak pawl asilole theih thiam awk lo nak a cang thei.

2. Thil sual asilole thil tha lo pakhat a tuah thu thaten sim aw.

Thilfir nak cu kiangkap in a pom lo timi nauhak pawl ih an theih a tul. Thilfir a tha lo. Cuihleiah netaah thil tha lo tampi a um thei thu sim aw.

3. Thinlung daiten ret aw.

Aw kaa hrang, thawinak tivek a hro zawngin tuah hlah. Nauhak pawl in thil tha lo an tuah thu theih thiam dingah a tul. A tih nak ruangah neta fir nawn lo ding timi thawn naa tuk in ti hlah.

4. A sualnak ruangah ngaithiam dil ter aw.

Nauhak in a fir timi a pom tikah thil neitu kha ngaithiam dil ter aw. A harsa mi tuar nak rem thiam dingah laksawng tiin pe aw. Himi in nauhak a ningzak ter ding. Asinan kumkhua hrang thil fir lo dingah a bawm.

5. Nauhak pawl ngaithiam aw.

Cumicu nupa dinhmun in a har nan anmah pawl na duh thotho ih na ngaithiam thu na fa na hmuh ter a tul. Nauhak pawl pom nak le hnam nak na tuah sak thei. Himi cu ngaihsak nak a duh asile hi tuah daan a that lo thu sim aw.

6. A hrampi thuhla hawl aw.

Nauhak ih thil a fir nak na kham duh asile himi a cang ter thei tu thuhla hawl aw. Na fa a rual pi kom mi a sual asile a saya thawn tong aw in thu rel tlang nak tuah aw.

7. Nauhak thawn pehtlaih nak nei uh.

Mobile phone le laptop pawl ret lawk in nauhak thawn kom aw uh. Himi cu nauhak thawn nel aw dingah a lo bawm ding. Cumi cu nauhak thil fir a cawl ter ding ih hleiah an tulmi khal reltlang dingah a lo bawm ding.

8. Thil fir theinak ding ziang vek caan tha khal pe hlah.

Nauhak thil fir thaim timi na theih tikah thil a fir thei nak ding ziangvek covo hman pe hlah. Thilmankhung pawl khal thaten ret aw. Tawh khap aw. Nauhak paisa hmang ter halh. Paisa bawm, bag pawl ah paisa tampi ret hlah.

9. Mai neih mi parah zirnak.

Nauhak cu thil neih mi pawl theithaim dingah zirh aw. Nauhak pahnih asilole pahnih hnakih tam tikah an neih mi pawl then sak aw. Nauhak cu a u pa asilole a u nu ih lek nak pawl dil nak le lek hnuah pek sal ding zirh aw.

10. Nauhak ih an tlaitluangnak lom aw.

Nauhak ih thudik a sim tikah an thusim mi ah na lungawi aw. Na paisa bawm a hlo ih na fa in a hmuh ih a lo pek sal tikah na fa ih a tuahnak parah sunloih aw. Nauhak in na duhdaan vekih thil a tuah tikah porh aw. Candy a fir maw, thilmankhuang a fir maw, paisa bawm a fir maw, ziangvek khal siseh fir timi cu pom ding asilo thu thaten na sim ding a tul.  Hi mi thu cu Chit May May ih tarlang mi thawn pehpar in kan run tarlang mi a si.