Adventu maw Sweet December timi a thu pi deuh?

Rev. Fr David Mangte ih sim mi Sweet December maw Adventu ti mi thuthangtha

Adventu Vs Sweet December

            Adventu kan timi hi Christmas hlan zarhpi voi 4 le zarh 4 sung caan kan hman mi te a si. A caancaan ah cun, Adventu caan hi December 1 ni in Christmas ni tiang tla a si phah theu. Adventu timi hi Latin tongfang a si ih a sullam cu ‘ratnak’/ ‘ra thlennak’ ti a siih Jesuh Khrih leilung par a ratnak a sawhkhih. Christian zumtu pawl in zarhpi voi 4 le zarh 4 sung a rei mi Adventu caan hi Christmas hngilhlonak dingah le Christmas puai ni hi sunglawi zet le sullam nei zet ih hmang thei dingih timtuahnak thawn kan hman mi caan sunglawi a si.

            Adventu caan sungih zarhpi 4 hi November 27 in December 3 sungah a si theu. Christmas ni hi tlawngkai 3 ni (Wednesday) ih a ciah kum lawngah December ni 1 cu Adventu zarhpi voi 1nak a si theu. Tuikum 2019 ahcun December ni 1 (Kawlram daan in - Sweet December) le Adventu a thok ni (Adventu zarhpi voi 1nak) a rak dengaw ciah. Curuangah Sweet December thawn pehpar aw in Adventu hmandaan te run hlawmawk ka duh mi a si.

            Christian pawl in Adventu caan ih Jesuh Khrih ih ratnak/ a ra thlennak kan ruah tikah ratnak phun 3 in a um. 1). A luan zo mi kum 2000 lenglo ih kan leilung par ih naute dinhmun ih a ratnak; 2). Atu caan, nitin kan nunnak ah kanmah pakhat cio hnenih Jesuh Khrih ih ratnak; 3). Ni netnak ah Siangpahrang le Thuthentu dinhmun ih a ratnak ti’n Jesuh Khrih ih ratnak phun thum in kan ruat.

             Adventu caan hmandaan a rak thoknak a ni le caan hi a cekci ih sim ding a har ngaingai. Asinain, a tlangpi thu cun, AD 567 kum in a rak thok mi a si kan ti thei. Ziangruangah tile, cumi kum ah Catholic monks (Phungki/ Yateh) pawl in Christmas ni tiang December thla sung rawl ul phah le thlacam phah in Christmas an rak hngak thok. 

             Tuisun ni tiang khal ah Jesuh Khrih leipar a ratnak hngilhlonak ih kan tuahmi Christmas paui hi sunglawi zet le sullam nei zet ih hmang thei dingah timtuahnak caan a simi  Adventu kan run nei ta. Zumtu lakah minung tampi cun Adventu a thei lo tu tla kan rak um hrih, mi hrek khat cu a thei nain ziangih siarlo tu khal kan rak um ve. Kan kawlram tla ahcun, Sweet December hi a thupi ih ret sawn  kan tam theu. Sweet December tiih December 1 ni caan hmannak hi Catholic biaknak sungih hman mi a rak sidah lo; tuini tiang khal ah Catholic Calendar sungah a tel hrih lo. Google sung kan hawl khal ah khuitawk ram hmanah thupi zet ih caan hmannak kan hmu lo ding; Kawlram Christian zumtu hrek khat ih phuah cop mi a si. Mi hrek khat hrangah cun, Christmas hrangih timtuahnak caan ti’n biaknak lam zawngih a hmang tu khal kan um men thei. Asinain, a tam sawn cu nomcennak men ah Sweet December hi kan rak hmang theu.

             Zumtu pawl hrangah cun, Adventu caan tha teih kan hman thei lawngah kan Christmas khal sullam a nei ding. Christmas timi hi Pathian le milai tonawknak hrampi, milai hnenih Pathian a ra thlennak ni sunglawi a si. Hi caan sunglawi te ah Pathian thawn kan tonawk taktak ding hi a thupi bik mi a si. Kan biak Pathian cun Emmanuel Pathian a sinak lang ter dingah leipar ah kan hnen thleng tiangin a ra ringring. Asinain, amah tong ngah ding cun kannih khal a hnen kan pan ih kan thlen ve a tul. Cucu, Adventu kan neihnak san a si. Sweet December ti’n December 1 ni cu nomcennak lawngah hmang tahrat in Christmas hrangih timtuahnak caan a simi Adventu caan teah thlarau lam ih zianghman timtuahnak kan neih lo a si ahcun, kan Sweet December khal sweet thei lo in a khasiami Bitter December ah kan can pang ding phan a um nasa. Maw Rualduh, December thla sungih kan Adventu caan teah khui tawk thlen so na tum? Shopping Mall ah maw?, nomcennak hmun lamah maw? Jesuh Khrih ih in nghahnak hmun teh thlen na tum maw? 

            Tui kan dinhmun cio ah kan tlaksam daan a bangawklo vek in Jesuh Khrih hnenihsin a tu rori ih kan tul mi rundamnak khal a dangdang. Kanmah rundamnak pe dingin, lei par a rung tum mi Jesuh Khrih hi Christmas caan te ah tong taktak thei dingin le a tuih in pek dingmi rundamnak co taktak thei dingin, kan Adventu hi tha teih hman kan tum cio pei.

 

 

 

Add new comment

3 + 2 =

Please wait while the page is loading