“Cite le Tleunak”

Fr_peter_lal_zin.png
Fr_peter_lal_zin.png

2020 Feb 9, (Sunday)                 

“Cite le Tleunak”

    Bawi Khrih ah duhdawtmi u le nau pawl, Bawipa ih daihnak nan hnenah um hram seh. Tuni February 9, 2020 (Zarhpi ni) ih kan siar ding mi cathianghlim pawl cu veikhat siarnak ah Isaiah 58: 7-10, veihnih siarnak ah 1 Cor 2:1-5, le Gospel cu Matthai 5: 13-16 tiang pawl an si. A tu thuthangṭha siarnak kan nei ta hrih pei.

 

Mt 5: 13 – 16 

13. “Nannih cu mi phunkip hrangah cite nan si. Sihmansehla cite cu a alnak a ziam asile altersal a theih nawn lo. Ṭhathnemnak zianghman a neih nawn lo ruangah hlon ding le pal men ding lawng a si.

14. “Nannih cu leilung pumpi hrangah tleunak nan si. Tlang parih tohmi khua cu thuh a theih lo.

15. Zohman in mei-inn an van tikah khengkuum an khuh dah lo. Mei-inn vannak tung parah an vang. Cutiin inn sungih a ummi zate hrangah tleunak a si.

16. Cubangtuk in nan tleunak cu mi hmaiah tleuter ding nan si. Cuticun thil ṭha nan tuahmi cu mi in an hmu dingih van ih a ummi nan Pa kha an thangṭhat ding.

(Bawipa ih thuthangṭha a si.) 

 

        Duhdawt mi nu le pa, u le nau, kan Bawipa Jesuh Khrih in nan nih cu ‘mi phunkip hrangah hrangah cite nan si, leilung pumpi hrangah tleunak nan si’ in ti. Leilung tlunah cite le tleunak ih a thupit zia hi kan thei cia mi a si. Cu ruangah tuni ah cite le tleunak ih a thupitnak cu ka sim lem lo dingih ziang tin mihrang ah cite kan si thei ding, ziangtin mihrang ah tleunak kan si thei ding ti sawn lam kha mal lai kan ruat tlang dingah ka duh. Cite le tleunak hi kan zoh asile an hnaṭuannak  asilole an hnaṭuan daan a bang aw lo. Sihmansehla an pahnih in an bang awnak cu mi hrangah ṭhatnak an peknak hi a si. Jesuh Khrih in cite le tleunak nan si in ti mi hi kan nih in leilung tlunah mi hrangah ṭhatnak a pe tu kan si dingin in fial mi a si tin a tawi zawng in kan ti thei. Tuni Bible a vei khatnak ih kan siar mi Is 58:7 ah ziang in sim a si tile “nan tirawl cu rilrawngmi thawn ṭawm aw uhla nan inn tla cu inn nei lo mifarah hrangah ong uh. Hnipuan hruk ding nei lomi hnenah hnipuan pek uhla nan sungkhat bawm ding tla el hlah uh! a ti. Cun ziang a sim bet a si tile (9) “Mi nan hremnak hi nan hlon ṭheh ih mi nan hmuhsuamnak le nan ṭong ṭha lo pawl nan cemter lawng si loin, (10) rilrawngmi an pum nan puarter ih mitlasam pawl an ṭulmi nan pek a si ahcun a lo kulhtu khawthimnak hi sun nitleu ah a cang ding,” a ti. Leilung mi pawl hrang ah cite le tleunak kan si thei ding ah cun mi hrangah ziang ka tuah thei ding, ziang tin mi ka bawm thei ding ti hi kan ruat ringring a ṭul. Cun cite le tleunak ih mihrang an hnaṭuan nak kan zoh tikah cite siseh, tleunak siseh an mah lam in ngah mi an nei lo, pek nak lam lawng an tuah. Cite in a alnak pek dingah a ti ih tleunak in tleunak in pe dingah siatnak a tuar. Cuvek thotho in kan nih khal in leitlun hrangah alnak le tleunak pek ding ah cun kawlṭong in (a-nit-na-khan-chin) timi kan nei lo a si ah cun kan pek thei lo ding. Cite le tleunak in minung pawl hrangah thilṭha an tuah tikah, alnak le tleunak an pe tikah nuam tete in an hlo vivo, an siat vivo. Sihmansehla kan nih minung cu thlarau nei mi kan si ih, midang hrangah  (a-nit-na-khan) in hna kan ṭuan tikah kan thlarau in lak sawng a co a si. Pathian in a duh a si ah cun leitlun kan nun sung hmanah ṭuanman laksawng in pek a si. Tu ni kan siar mi Gospel a net nak kan zoh a sile, Bawi Jesuh in “Cubangtuk in nan tleunak cu mi hmaiah tleuter ding nan si. Cuticun thilṭha nan tuahmi cu mi in an hmu dingih van ih a ummi nan Pa kha an thangṭhat ding,” in ti. 

        Bawi Khrih ah duhdawt mi u le nau pawl, leitlun hrangah cite le tleunak si in, kan thilṭha tuahnak thawngin vancung ih a um mi kan Pathian kha mi in an thangṭhat theinak dingin zuam cio uh si.

 

Fr. Peter Lal Zin Thang

Hakha Diocese      

Add new comment

8 + 7 =

Please wait while the page is loading