Bawipa ih ta kan si ring ring

Rev. Fr. Joseph Ro Nei Thang ih Thuthangtha sim mi (November 7, 2019 - Nili ni)

Kan thi khalah siseh, kan nunglai khalah siseh kannih cu Bawipai ta kan si”

Rev. Fr. Joseph Ro Nei Thang ih Thuthangtha sim mi (November 7, 2019 - Nili ni)

Bawi Khrih ah duhdawt zetmi RVA a ngaitu nu le pa, u le nau pawl, “kan Bawipa Jesuh Khrih hmin cibai ka run lo buk hai”. Tuihni cu 2019 kum, November ni 7 ni, Tlawngkaini li ni asi. Kan siar dingmi Bible pawl cu Rome cakuat bung 14:7-12 tiang asiih a tlangpi thu cu “kan thi khalah siseh, kan nunglai khalah siseh kannih cu Bawipai ta kan si” tinak asi. Cun Gospel ahcun Luka bung 15:cang 1-15 tiang asiih a tlangpi thu ahcun “a hlomi tuu kha tonsal asi tikah siseh, peisa pia kha a thlau ih tonsal asi caan siseh ziangtlukin so lungawinak a um” tinak thu asi. Pathian khal sualsirtu mi pakhat ruangah ziangtluk in so a lung a awi ti thu kha asi. Tuihni kan ruah khawm dingmi cu “Pathian ih lungawinak” tiah gaungsin ttat ning la ka duh asi.

Tuihni kan siarmi thuthang ttha sungah Jesuh in “Pathian ih lungawinak cu a hlo ih ton sal asi tikah tuukhalpa ih lungawinak” thawn a tahtthim asi tiah Luka bung 15:cang 1-7 sung kan siar thei, kan hmu thei asi. Bawi Jesuh ih san lai ah Israel ram ah tuu zuattu an tam hnasa. An vulmi ttilva lakah tuu kha a tambik asi. Tuurual a um vekin tuukhal khal a um ttul asi. Tuurual le tuukhal cu hmun khat tein tlanleng tlang ringring ansi. A pirpaak ih um dingah ansilo. Curuangah tuukhal pawlin tuu pawl hrangah ttuanvo tumpi an nei asi. Tuu pakhatkhat a hlo pang asile tuukhal in fing le tlang kaanin siseh, tiva le horkuam pawl kaan in siseh, a sun a zan in hawl sal dingah ttuanvo a nei. Tuu pawl cu zuatmi ttilva lakah a aabikmi tilva tla ansi. A cancan ah hrampi hring le tidai tamnak kha zawh phah vivo in lam an pialih zinpeng an zawh sual ttheu asi. Lamzin an hlo ih tikah tuurual hnen ihsin an hla tata asi. Cutik ah kiosa, pawpi, cinghnia pawlin an deh that ih thinak an tong ttheu asi. Tuukhal in a hlomi tuu kha a thi zo asi tiah aw-kaa in sim men a ngahlo asi. A hlo mi tuu ih a phaw, a vun, a hmul, a ruh tivek pawl pakhatkhat kha khua sungmi pawl hnenah a hmuh pei ih “ka tuu kha a thi zo” tiah thei ter ding asi. Cun Israel ram sungih khawte ih lam tuu zuatu pawlin anmaih tuu lawng kha an khallo. A bur in an khalter ttheu asi. Khua kha a tum deuh ih tuu zuattu tla an tam asile tuukhaltu kha pa hnih asilole pathum, pali tiang hman ah a ttul dandan in an nei ttheu asi. Tuukhal pawlin ttuanvo tumpi an nei ih an hloter pang asile tonsal tiangin an hawl ding asi. An ton tikah lungawi zetin a hlomi tuu kha an zaang parah an phur dingih lungawi zetin “a hlomi tuu kha kan tong sal zo” tiah khua sungah an au ciamco ding. An hloter mi tuu neitu hnenah tla “hnangam ten um thlang uh maw, kan hlo termi tuu kha kan hmu sal zo” tiah report an pek ding asi. Cutik ah tuu neitu siseh, tukhaltu tla siseh an lungawi dan cu maktarah ansi. 

Tuihni kan siarmi Thuthang ttha sung Tuukhalpa in a tuu 99 kha hramlak ah a tanta ih a hlo mi tuu kha a va hawl asi tiah kan hmu. Tuukhalpa in “99 liangluang ka nei lai ko. 1 te a hlo maanah. Cim seh ziangahsi a vak zok rero” tiah thinlung a nei hrimhrim lo. A hlo mi tuu kha a tong hlan hmuah a hawl asi. A tong tikah a lungawi a awi tuk, a lungawinak tla a innhnen pawl a va hlawm asi. A hlo lo mi 99 hnakin a hlo ih tonsal asimi tuu pakhat ruangah a lungawi sawn asi tiah kan hmu.

Cutiih lungawinak cu Bawi Jesuh in sualsirtu pakhat ruangah vancung um Pa Pathian cu ziangtluk in so a lung a awi ti kha in sim asi. Pa Pathian lawng silo in vancungmi pawl tla an lungawi ve asi. Vancungah lungawinak a khat asi. Sualsir ttullo, mah le mah sual neilo vekin umtu Farisee pawl le daan thiam pawl hnakin misual tiah hnonmi hlawhhlang pawl, siah khawngtu pawl kha an sualnak tlansan in Pathian hnenah an kir sal tikah Pathian cu lungawinak thawn a khat asi. Milai daan in cun misual pawl kha hnon ansi ttheu nain Pathian cun zaangfahnak mithmai ttha thawn thinfual zetin an sualnak pawl sir sal dingah a hngak ringring lai asi.

Cuvek tthiamtthiam in paisa pia hra neitu nunau pakhat in a paisa pia khat a hlo tikah pamhmai zetin a cuih paisa pia khat cu a hawl asi. Israel ramih lothlotu pawlih inn pawl cu niamte’n sakmi pawl ansi. Inn a niam lawng siloin padinpauk tla an tuahlo ruangah inn sung cu thim bembem in a rak um ttheu asi. An inn ah zial donmi ansilo ih ciarbek tlak thawn tappi vekin tuahmi an rak si ttheu asi. Paisa pia a tlak sual asile hmu sal dingah thil ollo zetmi asi. Curuangah meisa an vang dingih hmun tla ttha tein an phiat ding asi. A tonsal tikah a lungawi tuknak ah a innhnen pawl a va ko ding “ka thlaumi paisa pia cu ka hmu sal zo ih in lungawi pi ve uh” tiah a va ti. A thlaumi paisa pia cu nunau nu in a pamhai tukih a hawl vekin Pathian in tla kanmah misual pawl in pamhai ih in rak hawl ringring asi. Pathian ih hawlnak ihsin relh tahratin sualnak sungah nuamnai zetin kan um lai maw? Runtupa ih aw neem, aw thluasuah, aw thlumte kha ngai in amah hnenah kir sal uhsi. 

Pathian in a Fapa neihsun kha hi leitlun ah a run thlahnak cu leitlun misual pawl run dingah asi. Bawi Jesuh amah rori in Luka 5:32 ah “Kei cu miding pawl ko dingah ka ra lo; misual pawl an sualnak ihsin sir dingah ka ra sawn asi” tiah a rat sannak thu in zirh asi. Luka bung 15 cu a hlomi pawl hmuh salnak thu lawngte kan hmu thei si. A hlomi tuu, a hlomi paisa pia, a hlomi fapa nauta tiah asi. A hlomi fapa nauta thu ah tla zaangfahnak thawn a khatmi a pa in a fapa ih kirsal ding cu nitin ten a thlir ringring asi. Luka bung 15:cang 20-24 “Lam hlatpi ih a rat rero lai kha inn ihsin a pa in a hei hmu tikah a zaangfah ngaingai ih va tlan tahratin a fapa cu a kuah ih a hnam. A fapa cun “ka pa, Pathian parah le na parah ka sual zo. Na fapa tiih kawh dingah ka tlak nawnlo” tiah a ti. Sikhalsehla a pa cun a hnen-um pawl a ko ih “zamrang in ra uh! hnipuan tthabik rak keng uhla hrukter uh! a kut ah zunghruk hrukter uhla a ke ah kedam dam sak uh, cule a thaubik cawfate kha that uhla lungawinak puai tuah uhsi. Ziangahtile ka fapa cu a thi dah zo nain a nungsal; a hlo dah zo nain ka hmu sal zo asi” tiah ati. Zaangfahnak thawn a khatmi pa in fapa tlanhlo, fapa zuva a kir sal, a lung thlengnak kha lungawinak tumpi thawn a hmuak asi. Kannih tla kan sual pawl, kan tthelhnak pawl tansan in in zaangfah ringringtu Pa Pathian hnenah a tikcu luan hlan ah kir sal uhsi. Zaangfah lainatnak thawn a khatmi Pa Pathian in lungawi aipuang tein in rak cohhlang ding asi. Cumi cu a lungawinak asi.

Hi Leitlun kan nun sungah Pathian lungawitertu si ringring thei dingin zuam uhsi. Amah Pathian lungawiter ringringtu kan si ahcun Pathian in kanmah tla in lungawiter ringring ve ding asi. Hi leitlun kan nun sungah lei thluasuah kan co dingih kan nunnak a cem tik khalah kan thlarau cu Pathian in lungawinak thawn a khahter ringring ding asi. 

RVA a ngaitu nan zatein Bawipa in lungawi zetin thluasuah lo toih hram seh.

 

Add new comment

5 + 6 =

Please wait while the page is loading