Biakinn cu hmun thianghlim

Rev. Fr. Lucas Tha Ling Sum ih Thuthangtha sim mi (November 9, 2019 - Zarhte ni)

Biakinn cu Hmun Thianghlim a si.

Zumtu u le nau, Pathian in thlawsuah lo pe hram seh!

Tui ttum ih Baibal catlang kan ruah khawm ding mi cu Johan 2: 13-15 tiang a si ding:

“Lantaak puai tikcu a kim zik thlangih Jesuh cu Jerusalem ah a feh. Biakinn a thlen tikah cutawkah caw le tuu le laileng pawl a zuartu le tangka a thleng tu pawl an cabuai ih an to kha a hmu. Curuangah hri kha vuak nak hri ai ah a merh ih tuu siseh, caw siseh an zuar mi pawl cu a vuak ih Biakinn sung ihsin a dawi theh. Tangka tleng tu ih cabuai pawl khal a linglet theh ih an tangka nawi pawl a theh darh theh. Laileng a zuar tu pawl cu “hi tawk ihsin nan laileng pawl cu tlanpi theh uh.” Ka pa ih inn cu nan dawr tuahnak ah hmang nawn hlah uh tiah thu a pek.

    Zumtu u le nau, Jesuh in biak inn cu thianghlim te ih ret a duh a si. 

·         Biakinn cu Pathian le milai kan ton awknak hmun a si; 

·         Biak inn cu Pathian hnenih thlawsuah kan dilnak hmun a si;

·         Biak in cu Pathian ih kan sual in thlah nak hmun a si.

·         Biak cu Pathian ih thlawsuah in pek nak hmun a si.

·         Biak inn cu Pathian ih umnak hmun a si.

·         Biakinn cu hmun thianghlim a si.

Curuangah biakinn sungah Pathian upatnak le ttih zah nak thawn dai te ih um a tul a si. Biakinn sungah maih duh poh in tong ding a si lo; Biak inn sungah maih duh poh in laam ding a si lo; Biak inn sungah maih duh poh in mobile phone leh ding a si lo; Biak inn sungah maih duh poh in rawl ei ding a si lo.

Mithianghlim Paul in1Korin 6: 19 sungah hitin in sim bet a si: nan tak sa ruang pi cu a nung mi Thlarau Thianghlim ih biakinn a si, a ti. Phundang ih kan sim a silen Thiangthlarau cu kan sungah a nung tinak a si. Cun Thiangthlarau ih umnak hmun thianghlim kan si, tinak khal a si. 

Duhdawtmi zumtu u le nau, kan biakinn cu Pathian ih umnak a si ruangah thianghlim tein re cio uh si. Kan ruang pumpi khal Thiangthlarau umnak a si ruangah thianghlim tein re ciau uh si. 

Thuthangtha ngai tu nan zaten Pathian in thianhlimnak laksawng lo pe hram seh.

 

 

 

Add new comment

11 + 8 =

Please wait while the page is loading