Pathain cahnak dawn kham tu pawl

Fr_pius_5.2.2020.png
Fr_pius_5.2.2020.png

          Pathain cahnak dawn kham tu pawl

Bawi Khrih ah duh dawt mi u le nau pawl, ruangpum le thla rau ih dam cah nak nan parah thleng hram seh. Thlarau tirawl hlawm aw tlang thei ding ih can tha in pe tu kan biak Pathian, a hmin thangthat si ko seh. Tuisun ih kan siar mi Bible ca thiang 2Sam 24:2,9-17 le Mk 6:1-6 sung in "Pathian cah nak dawn kham tu pawl" thu kan ruat tlang hnik pei.

1.      Pathian cah nak lang thei lo ding ih dawnkhaam tu cu minung cah nak asi. 2Sam 24 sungah: Siangpahrang David in a ram sungah mipum siar nak a rak tuah 1San 21 ah kan hmuh mi cu Satan in David cu tuk a forh ih mi pum siar duh nak thin lung a neih ter ti asi. David ih a minung pawl a siar hi, minung paziat kan si ti theih duh nak menmen asi lo. Ralkap ziangzat ka nei, kan tha zang ziangtluk kan cak ti theih duh nak a si. Cazin a rak pek mi khal ah "Ral do thei mipa Israel ram ah thawng 800, Judah ram ah thawng 500 an kim thu" a rak than. Ziang tluk kan cak ti ih, mai cah nak zoh le thlir rero hi Satan tuk forh nak asi ih, Pathian duh lo zawng khal asi. Pathian ih miphun humhim dingah David cun minung tha zang a hawl, a khawl. Cucu Pathian ih a duh lo ruangah minung thawngza pulh naat in an thi. Ka ti thei, ka tha, ka thiam, ka mawi ti awk rero hi Pathian ih cah nak, that nak, mawi nak, dawn kham tu pawl an si. Babel lung dawl, inn sangpi a cim thluh. Pathian ih cawh kuan an rak tuar. Ziangruangah? An mai thiam zia, cah nak langter an duh. Neh hnu san tiang kan hmin thang seh an rak ti. Bawipa ih cah nak tel loih cah le hmin than kan tum pang kei. Tih a va nung ve. Pathian ih thin heng nak pulh nak ih  an thih ciamco tikah ral neh vivo thei tu David le a tingting ih a ral kap pawl ziang tal ah an tha hnem maw. Minung ih kan cak rori timi cu Pathian ih hrangah ziangsiar tlak lo asi. Pathian ih tongkam khat tawk thlangseh ti ih van cung mi a ti veten pulh naat a dai. Kan cah lo nak thei aw in Pathian cah nak zoh sawn uhsi a cah nak a leng sin ding.

2.      Keimah thu te ti ringring khal Pathian cah nak a lang thei lo. David hnen ah, a ral bawi Joab in siangpahrang bawipa tuah duh hlah tiah a don rero nan David in a ngai lo. Ralbawi thu hnak in siangpahrang keimah thu a ti tengteng pan teh. Mai duh nak le mai thu lawng fek zet, khoh zet ih tang ringring. Midang ruah nak la duh lo minung le pawlkom ah Pathian cah nak a lang lo.

3.      Pathian rinsan nak a mal vivo tikah Pathian cah nak a lang lo. Israel thuanthu ih ral tampi an neh nak le David a mah pumpak ih minung ral le sahrang ral phunkim a rak neh nak pawl kan zoh tikah Pathian cahnak nasa zet in a lang. Mi malte le kum note men in tih nungza ral tampi le ral tumpi an rak neh. Bawipai tha zang in kan neh ti thei aw in Bawipa thil ti thei nak rinsan thiam ringring ding hi Israel mipi le David hnenah Pathian in sim fiang a duh rero mi asi. A zirh rero mi asi. Khrihfa nitin kan nun khalah Bawipa ih cah nak, dam nak, huham rinsan ding hi in zirh rero. A luan cia mi thu ah siseh, hmailam kan nun ah siseh, Bawipa ih khawkhan lai rel nak rinsan thiam in hnangam uhsi. Ziangah tile kanmai tumtah hnak ih tha sawn le famkim sawn ah in hruai ringring tu Bawipa asi. Vei hnih khat cu keimah um lo sehla an buai zet ding tivek maw, amah um lo seh la kan cang thiam lo ding tivek maw kan hmang theu. Pathian ih bawm nak, Pathian ih cangvaih nak, a ring thiam tu a rinsan thiam tu si sawn uh si. Minung kan sivek in kan kiangkap ah sung khat maw, neih mi maw kan rinsan can cu a um theu ding. Sihmansehla cuvek in rinsan ding thatha in pe tu in kimvel ter tu cu Bawipa Pathian a sisawn ti thei in Bawipa hnen ah kan rin san nak kha bun aw hram seh. Leitlun buaibai nak kan ton khal ah mitampi cun Bawi upa le sungkhat tha le paisa tha zang tla kan ring theu. Zum tu pawl ih a hmaisabik kan tuah dingmi cu khuk bil in Bawipa a rinsan thiam tu kan si a tul asi. Bawipa a rin san thiam tu cun, Bawipa ih cah nak, nitin nun nak le kiang le kap le inn sung sang ah a lang sin sin ding.

4.      Midang ziang ih va siar lo khal khi Bawipai cah nak a lang thei lo. Tui sun ih kan siar mi Mk 6 sungah Bawi Jesuh, Nazareth khua ah an zum lo ih, an cohlang thei lo, an letkhan thei loih ruangah Jesuh khal in mang bang za tampi a tuah thei lo ti thu kan thei. A nu tla Mary si ko, a nau le pawl tla kan hnenah an um ko si, tiah ziangsiar lo in an rak nautat, an zomtai tikah Jesuh khrih ih cah nak le huham a lang nawn lo. Pathain thu thangtha kan ngainak ah siseh, Pathian hna tuan pawl kan zoh nak ah siseh an tuan thu hlun, an tha mal nak le an famkim lo nak kan zoh ringringah cun an hnen ihsin Pathian ih cahnak thluasuah kan hmu thei lo ding a si. Nazareth mi cun Jesuh ih sung khat le unau zoh in Jesuh Khrih ziang an siar lo. Jesuh Khrih ih mangbangza khal tampi an co lo. Tulai Khritfa mi hrekkhat pawl in cui Jesuh Khrit zum lo tu pawl ih tong kam cu la in, Jesuh in nau tam pi a nei, Mary in fate tampi a nei tiah, Mary parah nautat, ziangsiar lo nak an hmang ciamco sawn. Khai Jesuh zum lo tu pawl ih tong cu ziangah so sung lawi zet ih kan hmang rero. Pathian ih hman mi Bible sungih mithiang pawl ziang siar lo ih kan um nak ah ziangtinso Pathian ih cah nak a lang thei. Kan nih in upatnak, sunloih nak kan nei asile Pathian ih cah nak kan nun ah a lang vivo ding asi.

          Netabik 5 nak ah, zum nak amal nak khal ah Pathian cah nak a lang lo. Zum nak an nei lo mipar ah Jesuh cu a mang a bang. Abraham in a zum ruangah a ruahban loin tlang zimah tuu a rak ngah asi. Jesuh khal in dam nak tampi a rak pek tikah na zum nak in a lo dam ter zo a ral ti theu. A dungthlun tu pawl hnen khal ah, nan zum nak a va mal ve, tiah a rak kawk theu. Curuangah Khritfa kan sinak ah kan kum a upa vivo, Jubilee puai a phunphun kan tuah, kan zum nak fek asile Pathian ih cah nak khal tampin a lang sinsin a si. Pumpak cio ih kan nun nak ah siseh, kan kohhran le kan pawl pom nak ah siseh, Bawipa ih cah nak lang sin vivo hram seh. A thil ti thei nak le, a huham le ziangtinkim a mai sun lawi nak tampin cak vivo hramseh, lang vivo hram seh. Amen.

Add new comment

7 + 3 =

Please wait while the page is loading