Thudik ihsin Tleunak ah

Jesuh In Mitcawpa A Damter

Jn. 9: 1-41.

¹Jesuh cu cutiih a feh rero laiah a suah ihsin a mit a cawmi pa pakhat a hmu.

²A dungthluntu pawl in, “Sayapa, zo ih sualnak ruangah so mitcaw in a suah? Amah ih sualnak ruangah maw, a nu le a pa ih sualnak ruangah so?” tiah an sut.

³Jesuh in, “A mit a cawtnak hi amah ih sualnak ruangah a si lo, a nu le a pa ih sualnak ruang khalah a si lo. Pathian thil ti theinak hi hi pa damternak ihsin a langnak ding ah a si.

⁴Sun a si sung ahcun i thlahtu ih hna kan ṭuan rero a ṭul. Zan a ra thleng cing ding ih zohman hna an ṭuan thei nawn lo ding.

⁵Leilung tlunih ka um sungah cun keimah hi leilung tleunak ka si,” tiah a ti.

⁶Cutiih a ti hnuah Jesuh in leilungah cil a phui ih cuih a cil in leivut a beekter hnuah cu pa ih mit ah cun a man.

⁷Cu hnuah, “Va feh awla Siloam Tili ah na hmai va phiah aw,” tiah a ti. Siloam timi cu Tirhthlah tican a si. Cuti cun cupa cu a feh ih a hmai cu a phiah, khua a hmu thei sal ih a ra kir.

⁸A innhnen pawl le tuih hlanih rawl dil in a hmu ṭheutu pawl in “Hi pa hi to hmun in tangka a dil ṭheutu kha a si lo maw?” tiah an ti.

⁹Mi ṭhenkhat in, “Amah a si ko,” tiah an ti. Midang in, “Amah a si lo; amah vek midang a si,” tiah an ti. Cupa amah rori in, “Nan timi pa cu ka si,” tiah a ti.

¹⁰Annih in, “Ziangtin so atu-ah khua na hmuh thei sal?” tiah an sut.

¹¹Anih in, “Jesuh an timi pa in ciarbek malte a tuah ih ka mit ah i man hnu ah Siloam ah va feh awla na hmai va phiah aw tiah i ti. A ti vekin ka feh ih ka hmai ka phiah vete in khua ka hmu thei sal a si,” tiah a ti.

¹²Annih in, “Cupa cu khui-ah so a um?” tiah an sut. Anih in, “Ka thei lo,” a ti.

Farasi Pawl In Cuih Thu An Zingzoi

¹³Cule annih in mitcaw dah pa cu Farasi pawl hnenah an fehpi.

¹⁴Jesuh in ciarbek a tuah ih a mitcawtnak a damter ni cu Sabbath ni a si.

¹⁵Curuangah Farasi mi pawl cun a mit khua a hmuhnak thu cu an sut sal. Anih in, “Ka mit ah ciarbek a run hnih, cule ka hmai ka phiah ih ka hmu thei a si ko,” tiah a ti.

¹⁶Farasi mi ṭhenkhat in, “Hi bangtuk thil a tuahtu pa cu Pathian hnen ihsin a rami a si thei lo ding, ziangah tile Sabbath daan a thlun lo a si,” tiah an ti. Midang pawl in, “Misual a si ahcun hi bangtuk hmuhsaknak cu ziangtinso a tuah thei ding?” tiah an ti ve. Cutiin an lakah ṭhenawknak a um.

¹⁷Curuangah Farasi mi pawl in cupa cu thu an sut sal ih, “Na mit a lo vangter sikhawh cupa cu ziangti in na ruat?” tiah an sut. Anih in, “Profet a si tiah ka ruat,” tiah a ti.

¹⁸Judah mi hotu pawl cun mitcaw pa thu cu a nu le a pa an sut ngah hlanah cun mitcaw in a suak ih atu-ah khua a hmu thei ticu an zum duh hrimhrim lo. Curuangah a nu le a pa cu an ko ih,

¹⁹“Hi pa hi nan fa a si maw? Mitcaw in a suak tiah nan ti; cuti a sile ziangtinso atu-ah khua a hmuh thei?” tiah an sut.

²⁰A nu le a pa cun, “Amah hi kan fapa a si ti kan thei; cule mitcaw in a suak ti kan thei.

²¹Sikhalsehla ziangti in atu-ah khua a hmu thei ti le a mitcawtnak hi zo in a damter ti khal kan thei lo. Amah sut uh; upa a si ve thlang ih amah in a lo let thei ko hai ding,” tiah an ti.

²²A nu le a pa cun cutiin an sim, ziangah tile Judah mi hotu pawl an ṭih ruangah a si. Judah mi hotu pawl cun: zokhal Jesuh hi Messiah a si tiah ka zum a timi poh cu sinakok ihsin suah siseh, tiah lungkimnak an rak nei zo.

²³Curuangah a nu le a pa in, “Upa a si ve thlang ih amah sut uh,” tiah an tinak cu a si.

²⁴Mitcaw pa cu a voihnihnak an ko sal ih, “Thudik ka sim ding tiah Pathian hmaiah thu kam aw! A lo damtertu pa hi misual a si hrimhrim ti kan thei,” tiah an ti.

²⁵Cupa cun, “Misual a si le si lo kei ka thei lo. Asinain pakhat cu ka thei: ka mit a rak caw nain atu cu khua ka hmu thei zo,” tiah a ti.

²⁶Annih in, “Ziangtin so a lo tuah?” tiah an sut. “Na mit cawtnak cu ziangtinso a lo damter?” tiah an ti.

²⁷Anih in, “Ka lo sim zo hai nain nan ngai duh lo. Ziangah so a theih sal cu nan duh? Nannih tla amah thluntu si nan duh ve maw si?” tiah a ti.

²⁸Cutikah annih in cupa cu an camriam ih, “Nangmah sawn hi cupa ih dungthluntu na si. Kannih cu Moses thluntu kan si.

²⁹Pathian in Moses hnenah thu a sim, ti kan thei; sikhalsehla kha pa cu khuitawkin a ra ti hman kan thei dah lo!” tiah an ti.

³⁰Cupa cun, “Hi thil cu a va mak so! Nannih cun khuitawk ihsin a ra ti nan thei lo, a sinain kei cu ka mitcaw i vanter!

³¹Pathian in misual pawlih ṭongkam a ngai dah lo ti kan thei; a sinain amah a upattu le a duhnak a tuahtu pawlih ṭongkam cu a ngai a si.

³²Mitcaw ciaih a suakmi khua a hmuter theitu an um ti hi leilung hramthok ihsin zohman in kan thei dah lo.

³³Hi pa hi Pathian hnen ihsin rami a si lo ahcun zianghman tuah theimi a nei lo ding,” tiah a ti.

³⁴Annih in, “Sualnak sungah a suak ih sualnak lakih a ṭhang mi pa nang lamlam in maw thuzirh in tum ve?” tiah an ti ih sinakok inn ihsin an dawihlo.

Thlarau Mitcawtnak

³⁵Cubangtuk thil hmuahhmuah cu Jesuh in a theih tikah cupa cu a hmu ih, “Milai Fapa hi na zum maw?” tiah a sut.

³⁶Cupa cun “Bawipa, cupa cu zoso a si? Amah ka zum theinak dingah i simhnik aw!” tiah a ti.

³⁷Jesuh in, “Amah cu na tong zo ih atuih a lo bia rerotu hi a si!” tiah a ti.

³⁸Cupa in, “Bawipa, ka zum!” ti phah in Jesuh hmaiah cun a khuk a bilh ih a biak.

³⁹Jesuh in, “Hi leilungah hin thuṭhen dingah ka ra; cumicu mitcaw in khua an hmu ih khua a hmumi pawl in an mit a cawtnak dingah a si,” tiah a ti.

⁴⁰Farasi mi ṭhenkhat cutawkah an um ih cutiih a simmi a theitu pawl in, “Kannih khal hi mitcaw nan si ve in ti duhnak a si maw?” tiah an sut.

⁴¹Jesuh in, “Mitcaw rak si uhcila mawhthluk nan si lo ding; sikhalsehla khua kan hmu thei nan ti ruangah hin mawhthluk nan si ih nan sualnak cu a taanglai a si,” tiah a ti.