Anglican Bishop Gavin Ashenden cu Catholic Kohhran ah a Lut ding

Anglican Bishop Gavin Ashenden

  

Leitlun huap ih a laar zet mi, Anglican Kohhran ih bishop rak tuan dah tu le England Siangpahrang Bawinu Queen Elizabeth II hrangih chaplain (biaknak/thlarau lam ih a tulsam mi bawmtu) rak tuan dahtu, Gavin Ashenden cu tui zarhpini (4th Sunday of Advent), December 22 ah Anglican Kohhran tansan in Catholic Kohhran ah a lut ding ti thu theih a si.

Bishop Gavin Ashenden cu Shrewsbury khuapi ih Bishop Mark Davies in tui zarhpini ah Catholic Kohhran sungah conhlannak a neih sak ding. 

Bp. Gavin hi 2017 kum Scotland ram ih Pathian biaknak sungih Koran (Muslim pawl ih Cathianghlim) an hman a dodal hnu ihsin leitlun media pawl lak ah a rak laar vivo mi a si. Scotland ram, Glasgow khuapi ih St. Mary’s Cathedral Biakinn pi ah Feast of Epiphany timi Mifim Pathum Puai ni ih an siar mi Koran sungih capawl hi Muslim pawl in Jesuh Khrih ih Pathian sinak an pom lo nak thu pawl an si.

Koran hman a dodal hnu in Bp. Gavin cu Queen Elizabeth hnen ih a chaplain rianttuannak khal in a cawl ih cuticun a saduhthah in Anglican Kohhran sungih zumnak pingpeng pawl rem dingin a rak cangvai thei. Cuih hnuah zumnak fek zet ih kaihhnget duh ruangih Anglican Kohhran ihsin a suak mi pawl ih ttoh mi Christian Episcopal Church timi Kohhran ah missionary bishop ttuan dingah hrilnak a rak ngah.

Bp. Gavin ih Catholic Kohhran sungih a luh ding thu thawn pehpar in Shrewsbury Bp. Mark Davies cun: “Catholic Kohhran sungih a inntlun nak lamzin tluanah a netnak kekar a simi tuitum ih thil a cangmi ah Gavin Ashenden kan telpi ngah  ding hi lungawi za ngaingai a si”, ti’n a sim. 

“Anglican biaknak hin leitlun daan ih hawpnak pahsuak theilo ih a sungkhaan muarmo tiang hi cu, Anglican zumnak aupi suak thei dingin caanttha ka nei ti’n ka rak ruat dah”, ti’n Gavin Ashenden cun Church Militant media ah a rak sim. St. John Henry Newman ih lam a rak hmuhsak mi par khal ah a lung a awi thu khal a sim fiang bet. 

Catholic Kohhran sungih lut dingih a tultu thil 3 an um thu khal Gavin Ashenden cun media tampi hnen ah a rak phuang dah. A pakhatnak ah, 1963 kum Garabandal (Spain) khua ih  nauhak pawl le Nu Mary an tonawknak thu a si. Gavin Ashenden ih a rak sim mi cu: “Child psychologist timi nauhak pawl thinlung umtudan a theithiamtu ka raulpi pakhat thawn himi Nu Mary langnak thu zaihmi film kan zoh tlangih ka rualpa cun, ‘nauhak pawl hnenih a cang mi thil hmuahhmuah hi thuphan an si thei lo; ziangruangah tile, nauhak hnenah hi vek thil cangmi hi zo vek nauhak hmanin an phuahcop thiam hrimhrim lo ding’ a rak ti dah. Cuih si thok in, kum zabi 3 lai ih Gregory Thaumaturgus hnen ih langnak ihsin thokin, tui kan san tiang hmun dangdang ih Nu Mary ih langnak a hmuhsak mi pawl hi zum lo theihlo mi thil an si thu thuk zet in ka vun hmu fiang” ti a si. Tuah cun Gavin Ashenden hi Rosary thlacamnak a rinsan zet tu pakhat a si.

A pahnihnak Catholic Kohhran sungih a tultu thil pakhat cu, Eucharistic miracles timi Bawipaih Thi le Sa ih mangbangza langnak a hmuhsak mi pawl an si. “Hiti vek Bawipaih Thi le Sa thawn pehpar in a cang mi mangbangza thil pawl hi Anglican biaknak sungah a cang dah lo timi thu in thil thupi zet pakhat in zirh. Bawipaih Thi le Sa tuahnak Missa timi cu amah Missa ngaingai ih tuahnak Kohhran sungtel si tluk ih hnangamnak pe theitu thil dang ziang hman an um lo” ti’n Gavin cun a sim bet.

Culawng siloin, “Tulai san ah hin, zumnak namnuai tu thil tampi a um rero lai ah, Kohhran pakhat sungah Anglican zumtu dik tak pawl hmunkhat teih finkhawm thei ding nak lamzin ka hmuh lo tikah, Catholic Kohhran sungih i hruailut tu a pathumnak thil pakhat a rung pawtsuak; cucu, Magisterium a si” tiah Gavin in Catholic Kohhran sungih a lut ter tu a pathumnak thil a phorhsuah. Magisterium timi cu Catholic Kohhran sungah zumnak thawn pehpar in zumtu pawl hmuahhmuah hrangih zirhnak thuneitu pakhat a si. 

Gavin Ashenden cu kum 20 sung rori Anglican Kohhran ih General Synod sungtel a rak si ih, 2008 kum ah Queen Elizabeth ih chaplain tuan dingah hrilnak a rak ngah. Nunau pawl siangbawi sinak pek le bishop sinak pek hi Bible zirhnak le Dungthluntu pawl ih zirhnak thawn a kalhawmi thil pakhat a si ti a vun hmuh fiang hnuah, 2017 kum ah a hnatuan in a rak cawl.

Anglican Kohhran ihsin Catholic Kohhran ih a lut tu minung tampi an um ih cumi pawl lakah, bishop le siangbawi khal tampi an rak tel. Cumi pawl lakih a laar bik tu cu tui kum October 13 ni ah Pope Francis in Mithianghlim ih a nemhngetmi St. John Henry Newman a si. Anih hi 1845 kum ah Anglican ihsin Catholic ih a rak lut mi a si. Catholic Kohhran ih a luh hnuah, Cardinal tiang a rak tuan. A cauk suah mi pawl khal tuini tiangah an laar nasa lai. A tongfang lakih laarbik pakhat cu: “Thuanthu thuuk zet ih na theih ngah cun, Protestant sinak ihsin na bang vukvi ding” (To be deep in history is to cease to be a Protestant) ti a si. 

 Minung kan si cun mai suahkehnak thuanthu theih ding a thupit zet vekin, zumnak lam khal ah kan thuanthu hi theih fiang a thupi ngaingai a si. Kan zumnak hi khui tawk ihsin a ra timi kan theih sinsin le kan zumnak khal a thuk in a sang sinsin a si. Jesuh Khrih khal milai sinak a lak tik ah Abraham ihsi thok in Joseph le Mary tiangin a sangsang ih thuanthu nei in a rung suak a si (cf. Mt. 1:1-17). Thuanthu nei lo Pathian men a si lo. Cutivek tthiamtthiam in Christian kohhran dangdang pawl khal thuanthu nei cio an si. Na Kohhran ih suahkehnak  zingzoi that aw la thudik khal na thei fiang deuhdeuh ding. Thudik kan theih ngah tikah cuih thudik in luatnak le zalennak in pe a si (cf. Jn 8:32).

  

Add new comment

3 + 0 =

Please wait while the page is loading