Biakinn hnatuan

Falam RC Biak inn pi March 12, 2019 ni ah Pawl pi zaten hnatuan nak an nei.

 

            Falam RC Biak inn pi cu a thar ih sak sal nakah Pawl pi sungin minung 80 hrawngin Biak inn thar zial an burh a si. Biak inn thar cu a sau lam pi 120 a kauh lam 60 kau in sak sal tum mi a si.

            Biak inn thar sak sal nak san cu Biak inn hlun hi cement tel lo in sak mi a rak si ruangah thli le ruah a rat can ah tih nung a um ruangah Fr. Francis Lan Sawn ih hoha nak in a thar ih sak sal tum mi a si. Cun Biak inn sungtuan Pawl pi upa pawl, Nubu le Mino pawl kom in a sak nak sum le pai khal cu mah le thazang tel ih an sak re ro lai mi khal a si. Biak inn pi hi kan Christian nun ah hin a um lo thei lo mi khal a si vekin Pathian cen nak inn pi a si hleiah kan Christian hrangah cun thu dik um nak hmun khal a si ruangah lungtha tho ten sak an tum nak khal a si. Biak inn pi sak nak dingah ramleng um mi ulenau hrek khat pawl khalin an mai siantawk ten an rak bawm ve.

            Cun tualsung kawhhran  mipi pawl khal in Cozah hnatuan tu pawl in an mai ngah mi kum khat sungih thla khat thlahlawh an khuan ih pursum nak a tuah tu pawl khal in an mah le neih tawk an sum lakluh nakih zir in an thawh  ve a si. Bible Ca kan zoh a si le Solomon Siangpahrang le Israel mi phun pawl khal in an Pathian cen nak ding hrangah tha tho ten Jerusalem Biakinn pi an rak sakih an mai neih mi sui le ngun tangka khuan in an rak sak ti khal cu kan thei. Curuangah lungtho ten hi mi Biak inn pi khal tha tho ten an sak re ro lai a si.   

Add new comment

11 + 6 =