Myanmar ram hrangah Blessed Martyr pakhat kan ngah zo ti mi thuthang.

Myanmar ram ih hmaisabik Blessed Martyr Alfredo

Myanmar ram hrangah Blessed Martyr pakhat kan ngah zo ti mi thuthang.
Hi mi thuthang hi Vatican news in kan ngah mi thuthang a si. Myanmar ram hrangah Blessed Martyr pakhat kan ngah zo
October 19, 2019
Myanmar ram, Taungngu Diocese sungah kum 30 zikte Pathian hnatuan ih pum a rak petu Italy ram mi Siangbawi Alfredo Cremonesi cu, October 19, 2019, Tlawngkai 6 ni ah, Blessed dinhmun ih nemhnget le cohlan a si zo. Fr. Alfredo Cremonesi Blessed dinhmun ih nemhnget le cohlannak (Beatification) cu Italy ram saklam, Lombardy peng ih um, amaih suahnak khua a simi Crema Parish ah Missa Raithawinak thawn sunglawi zet ih tuah a si.
Blessed kan timi cu a thi zo mi zumtu pakhatkhat hi Saint timi Mithianghlim dinhmun ih Pawlpi ih a cohlan le a nemhnget hlan ih kawh daan pakhat a si. Mi pakhatkhat Blessed dinhmun ih nemhngetnak cu Beatification ti’n kan ko ih, Saint dinhmun ih nemhngetnak cu Canonization ti’n kan ko. Zumtu pakhatkhat Saint dinhmun ih nemhnget hlanah step tampi a um ih cumi step ih zir in kawh daan khal a dang ve. Hmaisabik ah Servant of God, a sangtu ah Venerable, cuihsin Blessed ti’n le netabik ah Saint ti’n a sangsang ten kawh daan a um.
Mi pakhatkhat Blessed dinhmun ih nemhnget dingah mangbangza hmuhsaknak pakhat a tul ih Saint dinhmun ih nemhnget dingah cun, mangbangza hmuhsaknak pahnih a tul. Blessed kan timi pawl cu an maih hmun le ram (Local Church) level in upat sunloihnak pek theih a si ih, Saint kan timi pawl cu, leitlun huap (Universal Church) level in upat sunloihnak pek theih a si. Canonization kan timi Saint dinhmun ih nemhngetnak cu Pope in a thi zo mi zumtu pakhatkhat hi Vancungram ah a thleng zo taktak a si ti’n a sual thei lo mi a thuneihnak hmangih a nemhngetnak a si.
Tuitum ih Blessed dinhmunih nemhnget mi Fr. Alfredo Cremonesi cu PIME (Pontifical Institute for Foreign Missions) society sungtel pakhat a si. Amah cu 1925 kum, November 10 ni ah missionary pakhat dinhmun in Myanmar (Burma) ram ah a rak thleng. Cumi a ra thlen lai ah, a kum hi 23 lawng a si hrih.
Leitlun ralpi 2nak (World War II) a daih hnu, Myanmar ram sungih ramsung ral a rak buai rero lai ah, mission hrangih duhsaknak tumpi a rak nei tu Fr. Alfredo Cremonesi cu a khua le ram ah kir sal men lo ten, a tuurual pawl thawn harsatnak a phunphun a rak tuar pi a si.
1953 kum, February 7 ni ah, Karen hriamhrei kai pawl cimit theh dingih a zuam rero tu kawl ralkap pawl cu Fr. Alfredo Cremonesi umnak Donoku Parish ah an rak thleng. Kawl ralkap pawl cun, Fr. Alfredo Cremonesi le Donoku khuami pawl cu Karen hriamhrei kai pawl bawmtu le thohsuahtu an si ti’n mawh an rak phurh ih, Fr. Alfredo Cremonesi tel in, khuabawi siseh, khua sungmi nupinu 2 siseh, meithal thawn an rak kap that a si.
Mission hnatuan ih pum a rak pe zet tu Fr. Alfredo Cremonesi cu rinsan tlak tuukhal tha dinhmun in, Pathian ram hrangah le a tuu pawl hrangah siang zet le raltha zet in a nunnak a rak liam tu, upat sunloih tlak Martyr pakhat a si. Hi mi thuthang cu Vatican thuthangih kan ngah mi a si.
A sim tu-Mai Siangte
A let tu Rev. Fr David Mangte

Add new comment

1 + 0 =

Please wait while the page is loading