Pope Francis ih Asia ram Thailand le Japan khual tlawn nak thuthang

Pope Francis ih Asia Ram khual a tlawn nak

Pope Francis ih Asia ram Thailand le Japan (November 21 - 26, 2019) khual tlawn nak

           Pope Francis cu Asia ram a khual tlawn nakah “Daih nak le kiangkap kilhim nak” ti mi thu luu thawn Thailand le Japan a tlawng a si. Pope ih vei 32 a tuukhal khual tlawn nak a si. Thailand ah, Thai mi pi pawl in hlunghlai zet in hmuah nak an nei. Thailand ah, Thai minister le khua nu khua pa pawl, tuan vo nei upa pawl cu Government house Bangkok ah ton nak a neih hnuah, Thai Siangpahrang  khal a tong a si, Buddish hotu Phungki a ton hnuah St. Loius Hospital, St. Loius Sizungpi ih tuan vo nei pawl le minaa pawl a ton hnu ah Sizung pi kum 120 kim nak puai tla a hman pi ta a si. Cuhnuah zan lamah National Stadium Bangkok ah (public mass) mi pawl hrangah mass raithawi nak a nei a si. Cui hnuah Siangbawi pawl, Sister pawl le Saya pawl le Siangbawi tlawng kai lai mi (Brother) pawl a tongih Christian pakhat si nakih a rak suah mi ti daan tete pawl sim nak a nei. Cui hnu ah FABC (Federation of Asia Bishop's Conferences) Bishop pawl a tong. Cun, Thailand ih biak nak mino pawl hrang missa raithawi nak a tuah sak hnu ah Pope Francis cu Japan ram lam ah khual tlawng nak a peh sal a si.

           Cun Japan ram a thlen hnuah, Japan ih Bishop pawl a tongih thu sim nak a neih hnuah, kum zabi 16-17 ih Nagasaki ih martyr ih thih nak a tuar pawl huang ih thlacam sak nak a nei a si. Cui hnuah baseball Stadium Nagasaki ah Mass raithawi nak a neih hnuah amai hoha nak in Hiroshima's peace memorial ah daih nak hrangah Japanese biak nak lamih hoha tu pawl thawn thu rel nak an nei a si. Cui hnuah nuclear bung a puak lai ih thi tu pawl hrang ah, zuunngaih par hlan nak le thla cam sak nak a nei a si. Cui hnuah Triple Disaster timi 2011 kum ih Fukushima khua pi ih ling hnin nak ruang ih vansiat tong tu pawl a ton hnuah, Japan ah kum 1549 ah a hmaisabik Christian si nak a rak keng tu St. Francis Xavier hngih lo nak hmun an tuah mi a feh. Mino pawl ton nak a nei hnuah, Japan ih Emperor a tong ih, Tokyo Dome Stadium ah Mass raithawi nak a tuah a si.

            Cuihnuah kum 2011 ih Fukushima nuclear le tsunami, linghnin nak a tong tu pawl hnem nak a neih hnuah cozah lam tuanvo nei tu pawl a tong asi. Tokyo khuapi ih St. Mary Cathedral ah tlawngta pawl a tong ta ih, ni li nakah Japan in Italy ram lam pan in a tlung sal asi. Pope ih a tuu khal khual tlawn nak vei 32 nak cu tlawng ten a feh thei tin Vatican news, in thu thang kan ngah a si.

Add new comment

8 + 6 =

Please wait while the page is loading