Tleunak in Thimnak a nehnak le Thiltha in Thil thalo a nehnak

Diwali Puai thuhla

Diwali Puaipi Thuhla

RVA a ngaitu duhdawtmi nu le pa, u le nau pawl tuini October 28 ni cu kawlram huap in Diwali puaipi hman ni a si ih  curuangah tlawng siseh, zung siseh rampi huap ih kan khar nak a si. 

Diwali Puaipi timi cu meisa vanpuai ti’n khal an ko ih Hindu biaknak, Sikh biaknak le Jain biaknak pawlih sunglawi zet ih kum tin an tuah theu mi puaipi pakhat a si. Hi puaipi hi ni 4, ni 5 rei ih hman theu a si ih, tui kum ahcun, October 27, zarhpi ni in a thok. 

Diwali Puaipi ih a langter mi le a khihhmuh mi cu tleunak in thimnak a nehnak le thiltha in thil thalo a nehnak timi nehnak ropi a si ih curuangah inn tin, biakinn tin, dawr tin, le mipi tamnak hmunpi tin ah tleunak ih khat theh ding tiangih meisa an vannak a si. 

Kannih Christian zumtu pawl hrangah cun, kan tleunak taktak cu Jesuh Khrih a siih, amah cu kan nehnak taktak khal a si. Curuangah, Jesuh Khrih cu kan tleunak a si ti langternak ah, Easter Vigil kan timi Thawhsal hmuah zaan ah Jesuh Khrih tleunak a khihhmuh tu phayawngdenpi ta meisa cawng in kan vannak a si.

Diwali puaipi hmannak thawngin, leilungpi ah Jesuh Khrih ih tleunak cu Ni bangin tlang seh la, hmun kip ah siseh, minung pakhat cio hringnun ah siseh, thatnak in thatlonak neh hram seh tiah RVA Falam Service in thlaza kan cam a si. 

 

Add new comment

1 + 2 =

Please wait while the page is loading