Palm Sunday ( March 24, 2024)

Palm Sunday ( March 24, 2024)

Palm Sunday ti mi cu Thosal puai hlan zarh khat duh zarhpi ni ih hman theu mi Christian pawl ih ni thawn thei mi puai a si. Hi Puai cu Khrih Jesuh in Jerusalem ah nehnak thantar thawn a luhnak hngilh lonak ni a si. Cun Jesuh Khrih in Jerusalem khuapi ih a luh laiah Thlulhfau (Tumko) hnah thlirnak  thawn Hosana ti ih an hmuahnak ni khal a si. Hi mi thu hi kan zoh a sile Christian pawl hrangah cun thinlung zate thawn hmuak in a dungtlun dingah man cia in um dingah ralrin peknak pakhat a si.

Hi Palm Sunday ih a san cu Bawi Jesuh in harsat tuarnak le Thinglamtah ih an tarnak thawn pehpar aw ih thu in simnak (Passion) kan ruahsal nak khal a tel a si.

Palm Sunday cu Easter zarhpi ni thlenhlan ih tuah theu  mi Christian pawl ih Puaipi ni khal a si.Gospel thuthangtha pali sungah pakhat ciar in a ngan ih Jesuh ih Jerusalem khuapi ih nehnak cu hi mi in a sunloih a si. Bawi Jesuh in Thinglamtah parah an thlai ding thu thei na cingin Khuapi sungah sualnak in minung pawl tlen dingah amah le amah a pek awknak khal a si. Palm Sunday cu Thianghlim zarh a thawhnak ni a si ih Khrih ih ni netabik ni sunlawinak hngilh lonak ni khal a si.

Pawlpi hmun tampi ah Jerusalem ih a luhlai ah Khrih hrangih an phah mi puan le an hlir mi tumko pawl cu hmanrua pakhat asi ih Palm Sunday ni ah thlasuah peknak, Thulhfau ko (TumKo) zemawk nakah hman a si.

Kan sualnak ruangah Jesuh Khrih ih raithawinak le zumnak thawngin Khrih ah kumkhua nunnak kha leitlun ih a rak kennak ruangah Pathian thangthat tlang uh si.

(Mt 21: 1-11)

          Jesuh le a dungthluntu pawl cu Jerusalem an naih vivo thlang. Olif tlang ih Bethphage khua an thleng. A dungthluntu pahnih hmaiah a hei thlah ih,  2 hiti in thu a cah. “Nan hmaiih khua ah va feh uhla laakpi an hrenmi a faate thawn nan hmu lohli ding. A hri phoih uhla ka hnenah rak hruai uh.  3 ‘Mi in ziangah so nan hruai,’ an lo tile, ‘Bawipa in a ṭul a si,’ va ti uh. Cuticun hmakhatte ah an lo thlah ko ding,” tiah a ti.
 4 Himi cu profet ih a rak sim ciami kimternak dingah a si. Profet cun:  5 “Zion khawpi khi sim uh, Na siangpahrang cu na hnenah a ra lai; Amah cu mi lungnem a si ih laak parah a to. Laak note parah a to a si, ti uh,” tiah a ti.  6 Curuangah dungthluntu cu an feh ih Jesuh simmi vekin an tuah.  7 Laak le a faate cu an rak hruai ih an zaang ah an puan an dam ih Jesuh cu a to.  8 Mi tampi in Jesuh fehnak ding lamzin ah cun an puan an rak phah ih mi dang pawl in hnahsawl an lak ih lamzin ah cun an phah ve.  9 Jesuh hmaiih a fehmi pawl siseh, a dunglam ihsin a thluntu pawl siseh, an zate in: “Hosanna! David Fapa cu thangṭhat uh! Bawipa ih hmin in a rami cu Pathian in thlawsuah pe koseh! Hosanna! Pathian cu van a saangbik ah thangṭhat uh!” tiah an au ciamco.
 10 Jesuh cu Jerusalem khawsungih a luh tikah a khua pumpuluk in an au celcel ih, “Hi pa hi zoso a si?” tiah khua mi pawl in an sut.  11 Cutikah miseenpi pawl cun, “Hi pa cu Galilee ram Nazareth khuami profet Jesuh a si,” tiah an ti.

(Jn 12:12-19) Sunglawi Zetih Jerusalem Luhnak

 12 ² A thaisun ah Lantak Puai ih a rami miburpi in Jesuh cu Jerusalem ah a ra ding, ti kha an thei.  13 Cuhrangah tuum hnah an lak ih amah hmuak dingah feh phah in, “Pathian cu thangṭhat uh! Bawipa ih hminin a ratu cu Pathian in thlawsuahnak pe hramseh! Pathian in Israel Siangpahrang cu malsawm hram seh!” tiah an au ciamco.
 14 Jesuh in laak note pakhat a hmu ih a parah a to; Ca Thianghlim in:  15 “Maw Zion khawpi, Na thinphang hlah; Na Siangpahrang cu laak note parah to-in a ra lai a si,” tiah a ti bangtuk in a kim a si.
 16 A dungthluntu pawl in culaiah cun hi thu ih tican hi an rak thei lo. Asinain Jesuh kha sunlawinak ih thawhter sal a si tikah amah thu-ah hin Ca Thianghlim in hi bangtuk in a rak sim ih amah hrangah hi bangtuk in an tuah a si, ti kha an vun mang sal.
 17 Jesuh in Lazaras kha thlaan ihsin a ko suak ih thihnak ihsin a thawhter laiih a rak hmu vetu mi tampi in cuih thu cu midang tampi an sim sin.  18 Cubangtuk hmuhsaknak a tuah a si ti kha an theih ruangah miburpi in an rak hmuahnak a si.
 19 Cutikah Farasi pawl cun, “Kan ti tho lo maw; kan kham thei nawn lo hi! Zohhnik uh, leilung pumpi in a thlun zo hi!” tiah pakhat le pakhat an ti aw.

Zechariah 9:9

A Ra dingmi Siangpahrang

 9 Nan lungawi uh, Zion mi pawl, nan lungawi uh! Lungawi in au ciamco uh, Jerusalem mi pawl! Zoh uh, nan siangpahrang a ra lai! Nehtu a si ih nehnak thawn a ra; Asinain lungnemmi a si ih laak parin a ra; Laak note, laakpi ih faate to in a ra a si.  10 Bawipa in, “Israel ram ihsin raldonak rangleng ka hlon ding; Jerusalem ihsin raldonak rang pawl ka lak sak ding ih, Raldonak likhuk pawl cu ka siatsuah ṭheh ding. Nan siangpahrang in mi phunkip pawl thawn daihnak le remnak a tuah ding. Khatlam tifinriat in khatlam tifinriat tiang a uk ding. Eufrates tivapi ihsin vanrang deng tiang a uk ding,” a ti.