Sweden ram ah Catholic Biakinn thilri an siatsuah (Nov 17, 2020)

Sweden ram ah Catholic Biakinn thilri an siatsuah (Nov 17, 2020)
Sweden ram, Gothenburg khuapi ih ummi Christ the King parish ih Biakinn sungih biaktheng cu November 13, tlawngkai ni 5 ah zo a si ti theih lo mi in a siatsuah ih hi thilcang mi hi khihhmuh mi nei ih tuah hrim mi a bang ti'n Christ the King parish hotu Fr. Tobias Unnerstal in a sim.
November 13 ni ah Fr. Tobias Unnerstal cu a biakinn a va feh ih cokcaw lailet ih ummi pulpit le a lawng riahriah mi biaktheng a va hmu. Cauk retnak ih hla cauk pawl le tohkham pawl khal hmun thianghlim ihsin hlon hlo theh an si. Cule tui kum sungih  a thi mi pawl hngilhlonak ih retmi pangpar kual pawl khal siatsuah theh an si.
"Hiti ih a siatsuh tu in teh Christian biaknak ih hminsinnak thil pawl ih umtuzia hi tha te'n a thei maw thei lo ti ruah ding a um; ziangah tile, tui tum ih thil cangmi hi a maksak tuk ce. Kum khat voi khat Good Friday hlan te ah kan biaktheng hi lawng riahriah in kan tuah theu. Hi thil siatsuah tu hin zumtu pakhat hrangih tih a nung zet mi kumkhua daih Good Friday a tuah duh teh si ke maw ziang henha" ti'n Fr. Tobias Unnerstal cun CNA thuthang ah a sim. 
Fr. Tobias in hi thuhla cu police hnen ah a ap zo nan tu tiang zo in a siatsuah ti theih a si hrih lo thu a sim. Christ the King parish sungih zumtu pawl cun bomnak an pek rero thu khal a sim bet. 
Phone ih i biak tu le email thawn ca i kuat tu khal tampi an um ti khal in a sim. Cui hlei ah, ka lung i hmui ter bik tu pakhat cu hi thil siatsuah tu hrang ah thla kan cam sak ding a ti tu tampi an um ih thatlonak thawn lehrulh duh zo hman an um lo mi hi a si ti'n khal Fr. Tobias in a ti.
Zarhte le Zarhpi sung Biakinn luhnak sangka a khar lo ding thu le zumtu pawl biakinn ah feh in thla an cam ding a duh thu khal a sim. Ziangah tile, biakinn ih thlacamtu minung kan um tikah biakinn siatsuahtu ding pawl khal a kham tiah a rak sim. Hi mi thuthang cu CNA thuthangin kan ngah mi a si.

 A nep nawiih theih na duh le link ah rak zoh aw.

Photo courtesy of Diocese of Stockholm

https://bit.ly/3pNgRr5