US Bishop pawl in Capitol ih buai nak parah mawhthluk nak le thlacam dil nak an nei January 7, 2021

US Bishop pawl in Capitol ih buai nak parah mawhthluk nak le thlacam dil nak an nei

January 7, 2021

            US Bishop hmuah hmuah in lungrual zet in kan dung January 6 tlawngkai ni thum ih United States Capitol ih a cang mi buai nak hi thil tha lo zet pakhat a si timi lang ter nak thu an suah. Cuih thu buai ah minung pa 4 an thi ih minung tampi in hliamhma an ngah. US Bishop pawlkom USCCB hotu, Archbishop Jose Gomez cun buai nak a suah theh vete'n "Tuini United States Capitol ih cang mi thubuai hi thil tha lo a si tiih a hnong tu thinlung tha nei mi pawl hmuah hmuah ka lo tan pi a si" tiin thu suah nak a nei cih.

            Cule, Congress sungtel pawl, Capitol ih tuanvo nei tu pawl, police pawl le mipi humhim nak ding le thu buai rem thaat sal nakih tuanvo latu pawl hrangih thla a cam sak rero thu khal a tar lang. Tuitum US Capitol ih thu buai hi President Donald Trumpi tan tu mipum za ziat hang lo pawl in Capitol innpi ah duh phorh dingah finkhawm aw tahrat in Donald Trump President hril awknak ih a tlin lo kha lungawi lo in a ling let ih cok let sal an tum ruangih cang mi a si.

            Police lam cun hi thubuai ruangah mi pa 4 an thi ih mipa 1 cu meithal ih kah ruangih thi mi an si thu le a dang pa 3 cu hliamhma dang ruangih a thi mi an si thu an sim. Cun hi thubuai ah mi 52 kaih an si thu khal an sim. Archbishop Jose Gomez ih a sim bet mi cu "buai nak um lo teih thu neih nak sawng awk nak hi kan rampi a thoh suah tu thil thupi zet lakih pakhat a si ve. Curuangah Pathian ih thuneih nak tang ih a tlangleng mi miphun pakhat dinhmun in lungrual te'n ding khawm tlang uh si" ti hi a si.

            Washington khuapi ih Archbishop Wilton Gregory khal in thubuai a um ruangah thusuah nak a nei ve. "US Capitol cu hmun thianghlim le khua hlihlan ihsin dingfel zet ih duhphorh nak hmun asi ih ruah nak dangdang khihhmuah tu khal a si. America mi kan zaten kan daan le duun pawl rak relkhawm nak le thu an rak botcat nak hmun sunloih ding hrimhrim kan siih a upat lo tu le a baal ter tu pawl an um khal a sile duh lo ding hrimhrim kan si" tin tuitum thubuai par ih a ruah nak a tar lang. Culawng siloin, hitivekih thu buai a um lai fang ah daih nak hrangih thlacam cio dingah le ram khel thu lam ih thenthek nak a suak ter tu tongkam pawl khal thleng a tul thu a sim bet.

            Chicago khuapi ih Archbishop Blase Cupich khal in Catholic pawl le thinlungtha a nei mi hmuahhmuah in remdaih nak a um thei nak dingih thlacam cio dingah forhfial nak a nei ve. US hi democracy ukawknak ih that nak a simi buai nak um lo te le dingfel te ih thuneih nak sawngawk nak upat mi thuanthu tha nei tu ram a si. Tuitum ih thil cang mi ruangah leitlun mi tampi in oloksong le tih phan nak thawn in zoh rero a si" tin a social media hman mi ah a tarlang. Himi thu cu Vatican thuthang ihsin kan don mi a si.

https://bit.ly/39eqozZ