Philippines ih a tumbik mi Biaknak lam puaipi cu covid ruangah tuah daan kel in ropi zet in an rak tuah thei lo. January 9, 2021

Philippines ih a tumbik mi Biaknak lam puaipi cu covid ruangah tuah daan kel in ropi zet in an rak tuah thei lo.

January 9, 2021

          Philippines ram cu Asia continent ah pakhat lawng a si mi Catholic kohhran tambiknak ram a si. Curuangah Catholic ram tiin khal an ko. Philippines ram ah Parik Naute Jesuh upat nak a tum zet mi ram pakhat a si. Biaknak lam ih a hngetkhoh zet mi Philippines miphun pawl in tlawngkai ninga tin ten upatnak an tuah theu.

          Hi Puai cu kumtin ropi zet in an rak tuah ih tui kum ah cun covid-19 natnak ruangah voikhat raithawinak tuah a si le minung 400  lawng tel on a si.Tui kum ah khawmzawhtu taan ruk hrawng in a tlar ih Pathian Biaknak an nei. Tui kum ah cun a tlar ih heel nak tel lo in Puaini ih Missa sumnak cu Manila khuapi ih um Naute Jesuih Basilica Biakinnpi lawngah rikhiah tuah mi nazi tem in voi 15 raithawinak tuah a si.

          Missa raithawinak ih a tel thei lo tu pawl in online ih live thlah mi in tel a si ding. Missa sumnak cu Naute Jesuih Biakinnpi ih an tuah ih a kiangkap ih um Biakinn pahnih le ca zirnak tlawng pakhat ah raithawinak an tuah sak ding a si.

Sintuh ih thuanthu

          Biakkhawmnak ih a laifannak ah mi pakhat can hrawng a si mi Thinglamtah a phur rero mi Bawi Jesuh ih sintuh upat nak an pek. 'Black Nazarene' tiih kawh mi hi sintuh cu sendup yawng (pianzia)a nei. A tuah tu khal theih a si lo. Asinain, kumzabi 16 ah Mexico miphun papuh saya pakhat in a rak tuah ih Philippines ram ah 1606 luan ah Pathian rian tuan tu pawl in an rak keng.

          Hi upat nak khal cu tik lai ah Diocese rak hoha tu Pope Innocent 10 nak in 1650 ah a rak lungkim pi. Hi sintuh cu Manila ih um Quiapo Biakinn ih ret mi upat nak pek a si. Biakinn ur a rak tuar ko nain, sintuh cu a rak kang lo. Voihnih rori linghninnak, typhoons thlisia tuarnak, a voihnih nak leitlunhuap ralpi thawh nak sungah bomb puahnak a rak tuar ko nain sintuh cu meisa kang in a rak luat.

          Hi vek tihnungza ih rak luat nak cu hi sintuh ruangah a si tiin an zum. Sintuh khaisan ih lamzah ih vel nak cu Philippines ram mipi pawl ih zumnak a thuk ter thu, hi a tlar ih vel nak cu Bawi Jesuh Calvary tlangpar a kai nak ruat ih tuah nak a si thu, kohhranpi pawl khal in Bawi Jesuh harsat zonzaih nak lamzin a feh lai ah Pathian hnenih pakhat khat lungawi rulhkir sal an duh thu Msgr. Clemente Ignacio in Ameria ih a um tu Catholic thuthang zung pakhat a si mi CNA thuthang ah a rak sim.

          Hi thuthang cu January 9, 2021 ah Aleteia thuthang ih kan ngah mi a si.

Photo courtesy of: AP/Associated Press/East News

https://bit.ly/2LqUwQD