Kum nauhak, fim nak a nei mi America ih kum nolai fimnak a nei mi fala,tlangval pawl cu kumkhua hrang Pathian hnen ap aw. January 28, 2021

Kum nauhak, fim nak a nei mi America ih kum nolai fimnak a nei mi fala,tlangval pawl cu kumkhua hrang Pathian hnen ap aw.

January 28, 2021

            2020 kum ah kumkhua thukam nak a la tu America ih mipa, nunau Pathian hnatuan pawl cu fimthiam nak a nei mi sung in an si. Cutivekin Catholic innsangih a hnget khoh mi an si. Pathian kawh nak khal upat lawngah siloin nauhak lai ihsin ruah tu pawl an si thu (CARA) tiin a tawi zawng in kawh mi kawhhran lam pawlkom ih cazin vekin theih a si. Himi pawlkom cu America Catholic Bishop pawl pawlkom ihsin tuanvo pek an si. Himi ca cu kumtin Feb 2 niih tuah mi "Pathian hnatuan pawl ni" thlen hlanih an lak mi cazin vek a si. Himi ca hrangah a pehpar aw mi pawlkom 747 pawlkom ah pe in 549 pawlkom in tuanvo nei tu upa pawl in an kuat sal. Cui ca vekin 2020 kum sung kumkhua thukam nak a la tu pawl cu Sister 55 le mipa Brother, Siangbawi 57 tel thu theih a si.

            Pathian kawhnak lam zin khal thlun dingah tha pek nak khal co tu an si. Cazin vekin kumkhua thukam nak a la tu Pathian hnatuan mipa, nunau pawl ih an kum tlang pi cu 34 asiih, thenkhat cu cu aiih nauhak khal an tel. Pathian kawh nak thlun ding ah a thawh caan cu kum 19 hrawng a si zo. Zatek 75 hrawng cu nulepa Catholic an siih, zatek 84 cu an suah pek in Catholic innsang ihsin an suah. Zatek 89 lak ah thenkhat cu Pathian kawh nak thlun dingah thapek nak an ngah dah thu, thenkhat cu Siangbawi ih tha pek nak siseh, thenkhat cu rualpi pawlih thapek nak, thenkhat cu nunpek awk nak nunram a co tu pawlih tha pek ih sawm nak, then khat cu rualpi pawl ih tha pek nak le a malsawn cu nu ih thapek nak ruangah an la tiin an sim.

Mifim pawl an si

            Cazin vekin 2020 kumsung kumkhua thukam nak a la tu pawl lakah a tam sawn cu mifim tampi an tel thu, thenkhat cu sister tlawngih an luh hlan ihsin buaih an ngah zo. Zatek 75 hrawng cu Sister tlawng ih anluh caan ah Bachelor buaih kha an ngah zo. Cutivekin thenkhat cu hnatuan kum thum kum li khal an si zo. Miphun thawn pehpar in 10 ah 7 cu Caucasian pawl, Europe America miphun, zatek 13 cu Asia Pacific, Hawaiian tikulh hmun ih zatek 7 cu Africa Continent ihsin an siih, zatek 5 cu Spain miphun pawl an si. Cazin lak nak asim sal tu pawl lakah then li then thum cu America ih suak ih thlanglian tu pawl an si. America ram leng ih a suak tu a tamsawn cu Vietnam ram in a si.

Bawi Jesuh ih duhdawt nak

            "Leitlun Pathian hnatuan tu pawl ni asilole leitlun Pathian hnatuan tu pawl hrangah thlacam sak ni" hrang St.John Paul II in 1997 ihsin a rak nemhnget thok. Cui puai cu Feb 2 asiih, cuini cu "Bawi Jesuh Jerusalem Biakinn ih hlan nak puai ni" a si. Cuini cu phayangtyi thlasuah pek puai tiin khal an ko. Ziangruangahtile Bawi Jesuh cu leitlun tleu nak a si timi man sal nak in cui ni ah phayangtui thluasuah pek nak caanserh khal a si. Curuangah Pathian kawh nak lamzin ah a feh rero tu Pathian hnatuan pawl khal Bawi Jesuh Khrih ih tleu nak a keng tu ding tleu nak keng tu pawl nunram khal vonmang sal dingah a si. Himi thuthang cu Vatican thuthang ihsin kan ngah mi a si.

Photo courtesy of: ANSA

https://bit.ly/3ja8hje