Rev. Fr. Pedro Pablo Opeka cu Noble Peace Prize ngah dingah telh a si zo. (February 11, 2021)

Madagascar ram ih rongbawl rero tu Catholic Missionary Siangbawi pakhat cu hnawm pen lak ih khua a sa mi mi farah pawl a rian nak ruangah tui tum ih Noble Peace Prize ngah dingah telh a si zo.

February 11, 2021

          Fr. Pedro Pablo Opeka (72) cu Madagascar ram ah kum 30 lenglo, mi farah pawl thawn hna a tuan rero mi Argentina ram mi siangbawi pakhat a si. A nih hi hnawm hlon nak lakih um mi mifarah pawl lak ih farahbik pawl bomnak ding ruahsannak thawn 1989 kum ah akamasoa humanitarian association ti mi pawlkom a rak din tu khal a si. Hi pawlkom hmin in rualtha ti mi sullam a nei ih inn le lo nei lo mi hrang ah ukkhe ih dawl mi inn 4000 a sak sak zo ih nauhak le mino mipum 13,000 lenglo khal fimthiamnak a pe zo a si.

          Fr. Pedro Pablo Opeka hi Argentina ram, Euenos Aires khua ah 1948 kum ih rak suak mi a si. A nu le pa cu Slovenia ram ihsin beunak hawl ih rak thawn mi an si. Kum 18 a kim ah San Miguel khuapi ih um “Seminary of the Congregation for the Mission of St. Vincent de Paul” ti mi Siangbawi tlawngah a rak lut. Cu le kum hnih a rei hnu ah Europe lam pan in Slovenia ram ah Philosophy a zir ih France ah thrology a rak zir. Cui hnuah Madagascar ah missionary dinhmun in kumhnih sung Pathian hna a tuan.

          1975 kum ah Basilica of Lujan ti mi Biakinnpi ah Siangbawi cannak a ngah ih 1976 kum ah Madagascar ram ah a kir ih tui sun ni tiang cu tawk hmuh ah a um ta. Antananarivo khualipi ih farah nak tumpi a hmuh tikah le hnawm hlon mi lak ah vok pawl thawn rawl a cuh rero mi nauhak pawl a hmuh tikah Fr. Opeka cu a um thei nawn lo ih mifarah pawl hrang thil pakhat khat tuah dingah a thinlung a botcat. Ramdang bomnak le Madagascar ram mi pawl ih bomnak thawn khuate pawl, tlawng pawl, ralkhawlnak pawl, hnatuannak fate pawl le siizung tiangin mifarah pawl hrangah Akamasoa Association ti mi pawlkomnak hmin in a rak din suak thei a si.

          Tui tum ih pulhnat caan khal ah hi natnak ruangih a harsa hleice mi mifarah pawl hrangah nasa zetin tan a rak lak pi rero. Madagascar ram hi leilungtlun ih farah bik lakih tel mi ram pakhat a si. Curuangah ramlian pawl in ram farah pawl ih an baak mi phuba pawl olh sak dingih Pope Francis ih zaangfah a rak dil nak parah Fr. Opeka in a lungawi zet thu a rak sim dah nak khal a si. Fr. Opeka hi 2012 kum khal ah Noble Peace Prize ngah tu dingih hril mi sungah a rak tel dah zo.

          Tui kum Noble Peace Prize ngah tu dingih hmin telh mi tampi lak ah Hong Kong ih pro-democracy cangvaihnak a rak dintu Catholic Lawyer pakhat a si mi Martin Lee Chu ming (82) khal a tel ve. Anih hi Hong Kong ah universal suffrage timi hrilawk nak ih vote pek thei nak covo hrangih kum 40 zikte a rak cangvai rero zo tu khal a si. Kan dung kum ih Noble Peace Prize ngah tu cu the United Nations World Food Program a si.

Himi thuthang cu CNA thuthang ihsin kan ngah mi a si.

https://bit.ly/3qjZ5eG