Ramkhel cangvaihnak ih a tel tu pawl hnenah Catholic Brother pawl le Sister pawl in Surgical Mask ( Kaahuhnak) le manhlap tuk caan ih hman ding thilri pawl an zem. March 3, 2021

Ramkhel cangvaihnak ih a tel tu pawl hnenah Catholic Brother pawl le Sister pawl in Surgical Mask ( Kaahuhnak) le manhlap tuk caan ih hman ding thilri pawl an zem.

March 3, 2021

          Mandalay khuapi, lamzin 35 ah February 28, 2021 ah St. Joseph kaing( Congregation) sungtel Catholic Christian Sister pawl, St. Francis Xavier kaing ih Sister pawl le Catholic Christian Brother pawl hrekkhat in covid humhim dingah kahuhnak dingih a ong a tel mi Mask, hriamhma a ngah tu pawl hrangih hman dingah hmatuamnak plasta (Hansaplat) le chochin(mawthai) pawl an fun ih ramkhel cangvaihnak ih a tel tu, lamzin ih a vak tu pawl hnenah covid-19 natnak khal hngilh lo dingah sim phah in le ralrinnak pe phah in an rak zem.

           Covid khal a reh hrih lo ih mipi lak ih feh tikah Mask hngilh lo dingah hi vek thilri pawl pe dingah an tawl rel. Hi thil pawl cu a hlu tu pakhat in hmun hlapi ihsin a rak hlu mi a si.Kan nih cu duhdawtnak thutak lamzin tha pe tu pawl kan si ruangah kan ti thei mi tete pawl in tu vek ih kan bawm thei hi kan lung a si zet “Kawlram ah zamrang ten remdaihnak um hram seh” tiin a hlawm tu Sr. pawl sungin St. Joseph kaing sungih Sr. Teresa in a rak sim“Kan zem mi pawl a la tu an um vek in mihrek cun la lo in upat nak thawn an lu kun ih an feh hi upat tlak zet mi a si. Mihrek cun ei in kan zem ah an ruat ih la lo in ‘ai….Mask a si hi!’ tiah ra kir sal in a la tu khal an um,” tiin a bawm tu Catholic Christian Brother pakhat a si mi Bro. Patrick in a hmuhton mi pawl a rak sim.

Kawlram ah 2021, February 1 ni ah ralkap in uk nak a rak long. Cu mi a lungkim lo tu duhphorh tu pawl Kawlram hmun tinkim ah tui ni tiang an um rero lai.Hi duhphorhnak pawl ah hriamhma a ngah tu pawl an um vek in nunnak a liam tu pawl khal an um.Kawlram Catholic Christian Pawlpi ih Puithiam pawl, Brother pawl, Sister pawl le kohhranpi pawl khal in a cang rero lai mi ramkhel dinhmun cu mipi pawl thawn hmunkhat ih an um thu langter in thlacamnak, remdaihnak thawn thlacam phah ih duhphrohnak pawl le a hlu tu pawl ih bawmnak pawl thawn a thi zo tu pawl ih innsungsang pawl hnemnak, thlacamnak thawn an ti thei tawk in hlawmnak pawl khal an tuah rero a si.

Hi thuthang cu RVA Myanmar Service ih kan don mi a si.

https://bit.ly/3sHB6XI