Pope Francis cu a tang lam program pawl thawn tuukhla khual tlawn nak a thok zo March 4, 2021

Pope Francis cu a tang lam program pawl thawn tuukhla khual tlawn nak a thok zo

March 4, 2021

            Tuikum tumkhat nak ramleng tuukhal khual tlawn nak cu Pope Francis ih a vei (33) nak a si. Ram in cun Iraq cu 52 nak ram a si. Tuitum Pope tuukhal khual a tlawn nak cu thuhla (5) a um.

1. Ziangruangah tihnung mi nat suannak a um nan a tuvekin a feh.

            Suanawk a rang mi pulh nat ih tihnung nak cu hna a ngam hrih lo. Asinan Iraq cozah cu rampi dinsal dingah nasa zet in an tuan. A thang so zo mi ram pawl cu rawl ei nak dawr pawl, mi feh vah tam nak hmun pawl khar bet vivo dingah an dil rero lai. Asinan Iraq ram ih dinhmun cu a danglam zet. Rampi ih sumdawn nak khal a tla sia ih, Aamahkhan nak pawl khla a um lo. Inn pawl khal an thek darh theh. Ni tlak nak lam ram hrangah covid pulh nat cu harsat nak pakhat asi caan ah Iraq mipi hrangah cun harsat nak tampi lak ih pakhat ti lawng in an ruat. Ziangruangahtile anmah pawl ih a rei zet mi riahsiat nak cu Muslim ram din a duh tu ruah nak luar pawl ih hrem nak an tuar ruangah an harsat zet.

            Iraq cozah in Pope ih tuukhal khual tlawn nak cu a hleice in an u pat. Ziangruangahtile rampi dinsal nak hrangah har nak an tuar ih, Iraq kha midang in thei vivo dingah, cutivek in miphun kip lak, zum nak a bang lomi biak nak pawl lak remdai ten din nak tuah thei dingah khal an tum tah. An tumtah mi cu a tha zet. Hitivek caan tha khal neh hnu kum ziangzat ah an ngah sal ding. A tu vekin caantha ngah dingah kum 20 an hngak. "Iraq miphun cu kanmah pawl in hngak. Anmah cu St.John Paul II cu an rak hngak. Asinan cui ram ih khualtlawng nak a rak feh ngah lo. Curuangah a hngak rero tu pawl cu a veihnih nak beidong dingin tuah lo ding. Himi khual tlawn nak cu thluasuah um mi khualtlawn nak si ding ah thlacam cio uh" tiin Pope Francis in a sim.

2. Iraq ram ih biaknak lam din hmun

            Pope Francis cu Iraq ram ih muslim ram din duh tu ruah nak luar pawlih hmuhsuam nak a tuar tu mi malsawn Khristian pawl hnen ah a feh ding a si. Cuvekin kum 2000 a thoh nak lam ih cazin an lak nak ah Khristian mipum tan khat le hrek an rak mi ih ram mipi ih zatek 6 an rak um. Asinan 2015 nehhnu lam ah cun 300000 tiang in an mal. Ziang ruangah a si. Thah an tuar nak, mai um nak hmun le ram ihsin an tlannak ruangah a si.    

3. Zum nak ih Pa "Abraham" khua "Ur" ih zum nak a bang lomi pawl lak ih thurel tlang nak

            Bible sungah zum nakih Pa Abraham ih a sim mi Ur khuapi ih a um lai ah a rak sim. Cui hmun ah Pathian in a ko ih Pathian hna a tuan thok. Curuangah Pope Francis le a dang biak nak lam upa pawl khal hmun khat ten thlacam nak tuah dingah himi Bible ih a ummi thuanthu a simi hmun a hril nak a si. A tui ton awk nak cu zum nak a bang aw lo nan biaknak khat le khat u le nau thinlung nei vivo in, ruah nak luar mi thinlung le pawlkom pawlih ral khal kham thei ding tiin a zum.

4. Biak nak lam hotu Ali Al Sistani ah a tong ding.

            Pope Francis cu kan dung 2019 ah "minung khat le khat ulenau pawl kan si" tiin hmun pek mi ca pakhat cu Al Azhar in Shia biak nak upa pakhat thawn hmun khat ah leihmat an thu. Hitivek in sim in Ali Al Sistani thawn khal let hmat an thu ding ti nak a si lo. Pope kha lungawi so par ten hmuak nak cu a tha zet mi a si. Ziangruangahtile Khristian pawl cu Iraq ram ih a pahnih nak ram mi an si lo thu lang ter nak a si. Tui tum ton awknak khal ruahnak luar tuk tu pawl pom lo nak thu cah nak a si. Ziangruangahtile Muslim zum tu pawl in an duhdawt ih an upat mi biaknak lam upa pakhat in Pope a hmuak. Thleidang dingah a tul lo thu thu a sim duh.

5. A khual tlawn nak tluan ih program

            Pope cu ninga ni ah Iraq ah vanzam thawn a feh. Khuapi ih thunei tu pawl thawn an tong aw. Cui hmun ah ram khel lam thawn pehpar mi a sim. Cui hnu ah 2010 ah ruah nak luar tuk mi Muslim pawl ih hriamhrei thawn siat suah mi Cathedral ah a feh ding. Zarhte ni ah cun a dang biak nak pawlkom pawl thawn thu an rel ding. Cui ni tho tho ah Ali Al Sistani hnen khal a feh ding. Cui hnu ah thurel nak ah tel ding ah Ur myo ah a feh cih ding.

            Zarhpi ni ahcun Iraq ram sung ih Khristian pawl le ral buai nak a tong tu ram pawl thawn an tong aw ding. Pope cu Erbil, Mosul le Qaraqosh khal ah a feh ding. Mosul khuapi ahcun hmuahsuam nak a tong ih nunnak a cem tu pawl ih thlarau pawl hrangah thla a cam sak ding. Himi program cu covid ruangah ziang vek cangvaih nak hman tuah loin an cawl ding ih kumkhat a rei hnu a pakhat nak khual tlawnnak a si. Covid ruangah khual tlawn nak khar hlan ah netabik a feh nak ram cu 2019 November ah Thailand ram le Japan ram an si. Himi thuthang cu Rome Reports thuthang ihsin kan ngah mi a si.                                                                                                                                                                                                                                                                                                                                                                                                Photo courtesy of: ANSA

https://bit.ly/3riuL4Q