Kawlram ah mipi pawl thah nak cawl dingah Cardinal Charles Bo ih dil nak March 16, 2021

Kawlram ah mipi pawl thah nak cawl dingah Cardinal Charles Bo ih dil nak

March 16, 2021

            Zarhpi ni ah Yangon Catholic Archbishop Cardinla Charles Bo in Kawlram ralkap pawl ih hrem nak mawh thluk in remdaih nak a rak dil. An thah nak cu nikhat ah mipi 38 luan an rak thi ih February 1 niih ralkap pawl ih ACozah thu neihnak an lon hnu ihsin thok in Kawlram ih thisen luan tambik ni a rak si.

Suak khat unau pawl

            Zarhpi ni ah Yangon Catholic Archbishop Cardinal Charles Bo in "Kawlram Catholic Diocese hotu dinhmun in Kawlram ih um ram khel party pawl in remdaih nak hawl dingah ka lo forhfial duh" tiin kaih a tuar mi mipi hril mi hotu pawl le ralkap pawl tel in Kawlram mi zate hnenah ca pakhat a rak ngan. "Tui kahawk nak pawl in hi harsat nak pawl a dai ter thei lo ding. Thah nak cu tu rori ah cawl uh. Mi tampi an thi zo. Leilung par ih a luang mi thisen pawl hi ral ih thisen a si lo. Kan ram mipi pawl, kan unau pawl ih thi sen a si" tiah a rak sim.

            Cardinla Bo cu Kawlram Catholic Bishop pawl pawlkom (Catholic Bishop's Conference of Myanmar CBCM) ho tu a siih duhphorh tu pawl sung in a thi tu an tam tuk nak par ih a rak sim mi a si. Duhphorh tu ram mipi pawl in November thla, hrilawknak ih neh nak ngah tu Democracy pawlkom NLD party hotu Daw Aung San Su Kyi cu ralkap in thlah sak dingah a dil rero. A mah thawn hril nak a ngah mi hotu pawl khui tawk ah an ret ti khal fiang ten theih a si lo. Daw Aung San Suh Kyi cu mawh an puh mi tampi a tong rero. Internet harsat nak pawl ruangah tlawngkai ni khat ni ih tuah dingmi thuthen nak zung ih thu theih nak cu March 24 tiang ni an rak thawn thu amai Lawyer in a rak sim.

Nikhat lawngah amalbik mi 38 an thi

            Zarhpi ni ah ram khel le tlawngtla pawl bawm tu pawlkom AAPP in "tuahmawh nak le dik lo ih kaih nak pawl ruagnah tu tiangah hin mipum 126 an thi zo ih tuini a thi tu a malbik in 38 an um" tiin a rak ngah. Thah nak tamsawn cu ramih a tum bik khua pi asi mi Yangon ah a rak cang. Tuluk ram in ralkap acozah cu sumpi lam in a bawm rero tiin mi tamsawn cun an hmu ih cui niah Tuluk pawlih zung pawl khal a rak kang. Cui meisa kang nak ruangah Tuluk ram ih seherh nak a thang ih a tum bik ih an dil nak ah Yangon ih um Tuluk zung in Kawlram, him nak ih ralkap pawl hnenah tuahmawh nak pawl cawl dingah le ram mipi le thil ri pawl humhim nak um dingah a rak dil. AAPP ih simmi vek asile mipi 2156 kaih an tuar ih thuthen nak pawl tuah in mipum 1837 cu an kil lai. Thuneih nak long tu ralkap acozah in Yangon ramkulh ih Myo ne 6 cu ralkap uk nak a rak than.

Sual nak a nei lomi ram mi pawl thlah uh

            Asia Catholic Bishop pawl pawlkom FABC hotu khal asimi Cardinal Bo in ralkap pawl hnen ah tuahmawh nak le mi thah nak pawl cawl dingah a dik lomi lamzin tlan san dingah a rak forhfial. "Sual nei lo mi mipi pawl thlah uh. Nan nih hi kan miphun pawl nan si" tiah a rak sim. Mino pawl cu ruah san nak thawn an nun an khua sak thu a rak sim ih "kannih cu ruah nak nei loih beidong thlak mi miphun pakhat ih can ter a ngah lo" tiin zang fah a rak dil.

Pope Francis thin khat lungkhat ih a um nak

            A kum 72 asimi Salesian kaing sung tel Cardinal in Pope Francis ih sim mi a rak sim sal ih ramsung ih ummi Catholic Diocese hnen ah remdaih nak din tik ah mah le mah ap aw ding in tha a rak pek. February 7 ni ah Pope Francis in zarhpi ni Angelus thlacam nak ah mipi that nak ding hrangih pum pe aw dingah, nunphung thawn pehpar mi thu dik le miphun lam remdaih nak khaisang dingah thinlung takih a duh nak lang ter dignah ram pi ih thunei tu pawl a rak forhfial. A thaizing ah Pope in thu nei tu pawl a sim nak ah Kawl ram mipi thawn nelawk nak a um thu a rak sim ih Acozah thu neihnak lon ruangah Democracy lam tluan ah harsat nak a um thu thawngthlak mi hotu pawl Kawlram ih that nak hrangih thlah sak dingah a ruahsan thu a rak sim ih March 3 khal ah tuah mawh nak cawl dingah buai nak pawl par ih thurelkhawm dingah le ruah daan bang awk lo nak pawl par ih rualrem nak um nak ding hrangah ralkap pawl hnenah zangfah a rak dil. Pope ih thil tuah thei nak le tha pek nak ruangah Kawlram Catholic Diocese cu ramsung khat le khat theih thiamawknak le remdaihnak din nakih bawm dingih tuanvo a neih thu Cardinal Bo in a rak sim. Himi thuthang cu CBCM thuthang ihsin kan ngah mi a si.

https://bit.ly/3bUPg21