In ei man a kai nak cu Kawlram ih mi harsa pawl nunram a har thu WFP in sim March 16, 2021

In ei man a kai nak cu Kawlram ih mi harsa pawl nunram a har thu WFP in sim

March 16, 2021

Leitlun pulhnat ruangih harsat nak a tuar rero tu Kawlram ih mi harsa pawl dinhmun cu ralkap pawl February 1 ni a cozah thuneih nak an lak ihsin thok in in ei le dat sii tivek man pawl cu a thang ruangah harsat an tuar rero thu, WFP pawlkom in march 16 ni 2021 ah an sim. February 1 ihsin thok in an hril mi cozah thlak nak, hotu Daw Aung San Su Kyi kaih nak, ralkap ih thuneih nak an lak ihsin thok in Kawlram sung remdaih lo nak pawl a cang. Cumi ruangah mipi pawl duhphorh nak pawl le ralkap ih Aana lang ank dodal ih duhphorh nak pawl, thupek thlun loih cangvaih nak pawl in sumdawn nak khal a cawl ter.

            Thilri bawm nak cawl nak, tuahmawhnak in in, ei le siiti, datsi tivek man pawl parah harsat nak a um ter ih rinlopi ah a thang thu, himi thu cu nikhat tuan mi, nikhat ei farah pawl nunram ah tha lo zet in a siat ter thu, WFP pawlkom Kawlram thawn pehpar mi aiawh tu Stephen Anderson in tlawngkai ni hnih ah a sim. Covid 19 nat suan awk nak khal sangzet in a thleng ih hivek in thilman a kai vivo asile, Aana laksak nak dodal in duhphorh nak neitu pawl lawng siloin, a farah bikmi le nat a ol zet mi nunram ah in ei daih lo nak thawn an tong aw ding.

            Innsang pawl ih in ei ding pawl khal kopkham in an nei lo ding. WFP Agency in February thla ihsin thok in Yangon hmun tinkim ah siiti man cu zatek 20 a than thu, fang man pawl cu Mandalay ah kan dung kar thum lai ihsin zatek 4 a than thu, Kachin ram then sak lam ih myone malte ah fang man zatek 35 tiang a than thu, ram pi ah February 1 ihsin thok in dat si man cu zatek 15 a thang ih, Yakhaing ram then sak lam ah datsi man zatek 33 a thang ih siitiman khal January ihsin February tiang zatek 27 tiang a than thu theih a si. Hitivekin in ei man le dat si man a kai vivo asile bank hnatuan nak a cawl ding. Paisa thleng nuam te nak le paisa ngah nak rikhiah nak pawl a tam vivo nak pawl a zaten a pehpar awk thei thu, Anderson in a sim thu pehbet in amah in himi ram buai nak a um hlan ihsin covid 19 nat suan awk nak ruangah cetzung tampi khar nak, feh vah nak kham nak pawl ruangah mi farah cetzung hnatuan pawl hnatuan cawl, hnatuan neilo ih an um thu, cuihleiah "ramdang ihsin paisa thleng tlak nak, himi dinhmun a rei vivo asile sumdawn nak buai nak a that lo vivo thei thu a sim. WFP ih an sim nak vekin pulh nat hlan innsang 10 ah 6 cu harhdam nak (Nutrition) tlak sam nak, covid 19 ih thil cang mi vekin farah nak than nak, a liam zomi kum hnih hrek hrawngah Kawlram ih innsang 5 ah 4 cu pulh nat suan caan sung an sumpai lut mi ih zatek 50 hrawng an sung thu le remdaih nak le thurel tlang nak an hong asile rilrawng ih um nak a tum vivo thei timi cu WFP in tha ten an thei" timi cu Anderson in ralring nak pe in a sim. Himi thuthang cu Vatican thuthang ihsin kan don mi a si.

Photo credit to Vatican News

https://bit.ly/3rZgIS6