Catholic le Orthodox Khristian pawl Paschal puai ngamhnget tlang dingah Vatican ih Cardinal in pom March 12, 2021

Catholic le Orthodox Khristian pawl Paschal puai ngamhnget tlang dingah Vatican ih Cardinal in pom

March 12, 2021

            Khristian pawl lungrual nak thawn pehpar mi Pope zungih hnatuan tu Cardinal Kurt Koch in Catholic le Orthodox Khristian pawl Paschal puai nikhat ni ih tuah ding thu cu an pom. Leitlun Khristian Pawlpi pawl council ah Constantinople ih Khristian pawl aiawh tu pakhat in Khristian zaten Paschal (thosal) puai ni cu nikhat ih tuah tlangnak cu Khristian pawl lungrual nak ah a cang tiin a sim.

            Telmessos ih Orthodox Archbishop Job Getcha in 2025 kum cu Khristian pawl remdaih nak hrangah Nicea khuapi ah aveikhat nak tuah nak 1700 kum kim ni khal a si. Curuangah a tuvekih ruah nak pek nak vekin tuah thei asile a tha tuk ding tiin a sim. Swiss thuthang zung Kath.ch ih thusuh nak a san nak ah Cardinal Kurt Koch in thu suah mi a lom thu, Nicea thurel tlang nak kumkim ni khal a si ruangah san a nei cuang mi thleng awknak tuah dingah a tul thu a sim. A hmaisabik Nicea thurel tlang nak cu 325 kum ah tuah a rak si. Cui thureltlang nakih thu pot cat nak cu thal a thok nak thla ih thlapi thul ni ahmaisabik zarhpi ni ah tuahdingah a si. Cui caan cu March 22 hrawng a si thei ih, ziang asi khal le April 25 hnu tuah lo dingah a si.

            A tui Orthodox Khristian pawl cu Julian Calendar kha thlun in Paschal (Thosal) puai tuah ding ah ni an tuat. Catholic Khristian pawl cu 1582 kum ah a thok mi Gregorian calendar an hmang theu. Leilungtlun khalah hman tam mi calendar khal a si. Julian calendar hnak in ni 13 a tam. Pope ih zung tuanvo nei tu Cardinal in Archbishop Job von Telmessos than mi thu cu a lam thu le tuah tuan nak ih leh rul nak phun a suak ding tiin khal a ruah san thu, a ol ding a bang nan tuah ngaingai ahcun na sa deuh in relkhawm a tul ding. Asinan a tha hnem mi tuah nak khal a si. Himi ruah nak pekmi cu Pope khal in a duh tuk vekin Coptic Bishop Tawadros khalin a bang aw mi ruahnak a cang ter. Orthodox Archbishop Getcha in hi mi thu cu 1997 hrawng ah leitlun Khristian Pawlpi council in thu an suah zo thu, asinan Nicea thurelkhawm nak ih an than mi vek in thlun ding lawng in an potcat. Curuangah an tuah ngaingai lo. Himi thuthang cu CNA thuthang ihsin kan ngah mi a si.

Photo courtesy of: Daniel Ibáñez/CNA

https://bit.ly/3tvLJNS