Ziangruangah a thianghlim mi zarh kar ni kumtin thleng a si nak san. March 17, 2021

Ziangruangah a thianghlim mi zarh kar ni kumtin thleng a si nak san.

March 17, 2021

            Kumtin thianghlim tlawngkai nili, ninga, niruk le Paschal (Tho sal ni) pawl ih ni cu thleng a si. Egypt ram ah sal nunram ihsin luat nak hminsin nak tiin Judah miphun pawlih tuah mi biaknak lam puai thlen hlan Jesuh in cui puai cu tuah dingah a dungthluntu pawl a finkhawi ih Gospel Cathianghlim ah netabik zanriah ei nak puai tiin a cekce rori ih tuah mi Judah miphun pawlih Paschal (Tho sal)  then zik te a thi tu Jesuh ih thuhla pawl a hrampi ah ret in Catholic kawhhran in Paschal (Tho sal) ni ah an nemhnget.

            Moses daan vekin Judah miphun pawlin thal caan ih hmaisabik thla thlapi thul ni tiin a thok mi Nisan thla ih 15 ni, cui puai cu kumtin a thar ih tuah a si. Khristian Pawlpi a thok lam ah Paschal(Thosal) puai tuah ni a phunphun a rak um. Netabik ahcun, Kawhhran pi in Paschal (Tho sal ni) cu nikhat lawng tiin an tleng. A hmaisabik council Nicea cu kum 325 kum ah an tuah ih Paschal ( Tho sal) cu thal caan equator a phiat caan thlapi thul hnu a hmaisabik zarhpi ni ah tuah dingah a tuan bik March 22 le a tlai bik April 25 niah tuah dingah thu tuahnak an rak nei a si. A tam bik in Paschal (Tho sal) puai cu April thla ih a hmaisabik kar asilole a kar hnih nak ah tuah a si.

            Tui san ah cun, Orthodox Khristian pawl in 1582 kum ah an thok ih leipar ih mi tamsawn ih hman mi Gregorian Calendar hnak in Julian Calendar cu Paschal (Tho sal) ni tuah dingah an hmang. Asinan Julian Calendar cu ni tam deuh dingah an tuah ih a tu ah cun Gregorian Calendar hnak in ni 13 a tlai. Himi thuthang cu CNA thuthang ihsin kan don mi a si.

Photo courtesy of / udra11 via Shutterstock.

https://bit.ly/3qW3c0c