Pope Francis Iraq a thlen hnu in Iraq ih Christian zumtu pawl ih tihphannak a hloral ti'n Cardinal Sako ih a sim April 15, 2021

Friday, April 16, 2021

Pope Francis Iraq a thlen hnu in Iraq ih Christian zumtu pawl ih tihphannak a hloral ti'n Cardinal Sako ih a sim

April 15, 2021

Iraq rammi Cardinal Sako cu Middle East Council of Churches (MECC) pawlkom pi thawn Pope Francis ih tuukhaal khualtlawnnak ih rahsuahmi thu rel khawm dingah tonawknak an nei.

Cardinal Sako hi Babylon khuapi ummi Chaldean miphun zumtu pawl hoha tu tuukhaal Patriarch pakhat a si ih a hminpum cu Mar Louis Raphael Sako a si. Tui tum ih Cardinal Sako le MECC sungtel pawl online meeting tuahnak ih a tel mi pawl cu General Secretary, Dr. Michel Abs le a mah bawmtu Assistant Secretary General, Father Dr. Nicholas le department director dang dang pawl khal an tel ve.

Hi thurel khawmnak ah Pope Francis in Iraq a tlawn nak ih a tumtah mi pawl hlawntling ter dingah MECC pawlkom in ziangtin tuanvo a lak ve ding ti mi le hi Pope ih khualtlawnnak in Iraq ram ih Christian zumtu pawl parah ziangtin thathnemnak a pek ti mi pawl tla an tel.

Cule zumnak dangdang hlawmawknak le Iraq ram le a sung ummi kohhran pawl in remdaihnak le rammi tha sinak karhzai ter dingah ziang vek tuanvo an nei timi thu pawl khal an rel tlang.

Cardinal Sako in an thurelkhawmnak ah Pope ih Iraq a ra tlawn ruangah Iraq ih ummi Christian zumtu pawl ih tihphannak a ziangmral ter ih ralthatnak in pe a si ti'n a sim.

Cui hleiah, Iraq mipi hmuahhmuah in mitthli tla ih thu a sim tu Pope Francis tong dingah an ra. A hleice in Biakinn 4 ISIS pawl in bomb ih an rak puah nak Mosul khuapi ih Hosh Al-Baya Biakinnpi ih a thlen ah mipi tampi in an rak hmuak ti'n Cardinal Sako in a sim bet.

MECC pawlkom cu 1974 kum ah Cyprus ram Nicosia khuapi ih rak din mi a si ih Beirut le Lebanon ah hram bun mi a si. Cule World Council of Churches (WCC) pawlkom pi sungtel khal a si.

Hi thuthang cu Vatican thuthang ih kan ngah mi a si.

https://bit.ly/3geNKdE