Myanmar ram hrangah Rome ih Myanmar Catholic innsang thawn Pope Francis Missa raithawinak a tuah ding

Myanmar ram hrangah Rome ih Myanmar Catholic innsang thawn Pope Francis Missa raithawinak a tuah ding

            Pope Francis cu aralai dingmi May 16 ah Rome khuapi ih a ummi Myanmar Catholic innsang thawn ahleice Missa raithawinak a tuah ding. Pope thawn Missa raithawinak ah um thei dingah Jesuh kaing ih Myanmar Brother pakhat asiih Rome ih um Myanmar Catholic Siangbawi, Sister pawl pawlkom ih vice president asimi Brother P.V. Joseph Buan Sing SJ in Myanmar innsang aiawh in ca ngan ih a dilnak in a tuvek ih caan tha ngah nak a si.

            Brother ih a dil hnu April 28 ni ah cun Vatican ihsin phone in an biak ih Bawi Jesuh vancung ram a kai puaipi May 16 ni zarhpi ni zinglam Rome tikcucaan 10:00, Myanmar tikcu caan sun 2:30 ah Vatican sungih St.Peter Basilica biakinn ah Pope thawn Missa raithawi theinak ngah a si thu thuthang theih a si.

            "Thinnat riahsiat nak a tong mi Myanmar ram hrangah Pope thawn Pathian hmaiah khukbil in thlacam a tul thu, Rome khuapi ih ca a zir tu Myanmar Catholic Puithiam, Sister mi 50 le Budish biaknak telin Rome ih hna a tuan tu Myanmar pawl cutivek zaten mi 100 hrawng an um ruangah a tuvekin Pope thawn Missa raithawi thei ding cu thinnat nak karlakah hnemnak ngah thei ding a si thu, cutiin caan ngah thei ding asile Missa raithawinak sung tuah ding mi thuhla a phunphun khal tuanvo an lak ding thu le Pope in zangfah nak thawn ziangtik ni khalah fale pawl anman cia thu cutiin ngan in a dil" tiin a dil tu Brother in sim.

            April 25, zarhpi ni khalah Rome khuapi ih St.Peter tualrawnah Pope Francis thawn Angelus thlacam tlang dingah a ra thleng tu khawmzawh tu mipi karlak ah Myanmar Catholic Siangbawi pawl, Sister pawl cu "Pray for Myanmar, Grazie Myanmar ram hrangah thla in cam sak uh.Kan lungawi" timi ca keng in an tel.

Photo courtesy of: MCII FB page