Germany ih Christian pawl in Christian pawl khat le khat thurel khawmnak hrangah tim an tuah April 27, 2021

Germany ih Christian pawl in Christian pawl khat le khat thurel khawmnak hrangah tim an tuah

April 27, 2021

            Germany ih Christian pawlkom pawl an mai a voithum nak thurelkhawmnak hrang tim an tuah rero lai. Cui caanserh cu May 13 in 16 tiang Franakfurt ah an tuah ding a si. Asinain, covid-19 ruangah online lawngin an rel tlang ding. Limburg ih Germany Catholic Bishop pawl pawlkom ram ih um Christian pawlkom pawl thawn pehpar mi Council ih hotu a si mi Bishop Heinrich Bedford-Strohm pawl in tui veikhat nak tonawknak puai ah Catholic le Khristian pawlkom dinhmun in ‘technic thawn zumnak langter dingah’ tha an neih thu an sim.

            Kan dung Zarh ah online ihsin Bishop pahnih tonawknak ih thusuhnak ah tu vek ih tuahnak cu ‘an lak ih bang awk lo nak hnak in Christian pawl khat le khat zumnak thu tette khan dingah a si’ tiin a sim.Tui kum ah khal Martin Luther Nu Pawlpi ih a suah nak kum 500 kim kum khal a si. Tu vek in Christian pawl khat le khat thurelkhawm nak ih a thupi zet mi thanso nak lam ih thlengawknak tep a theih. Hi tonawknak ruangah ‘khat le khat zumnak a rak karh thu’ a rak sim.

            Matin Luther dinhmun in Khristu hawlhmuh sal a tul thu, 2017 ih kom mi a phuaih cu Martin Luther ih tulsam mi hawl hmu dingah a hleice in an tuah ding.Tui a veikhatnak tuah ding mi thurelkhawmnak in “Khristu cu a laifang ah re in thazaang a tam zet mi hmuhton mi phorh suak nak a si. Kan hrangah a thupi zet. Ziangah tile hi mi cu kan pawlkom in an darh a tul’ tiin Bishop Bedford-Strohm in a rak sim.

            Reltlang ding mi thuhla pawl cu Germany ram kiangkap ih hmuhton mi Theology le pawlkom thawn pehpar mi zirhnak peng pawl le cu mi ruangih otn mi harsatnak pawl ziangtin zawng in simfiang ding ti mi thupit in an reltlang ding a si. Covid-19 a karh rero lai ruangah nunphung lam ziangtin a siatsuah ding ti mi thuhla thawn pehpar in “Nu Pawlpi dinhmun in hi mi dinhmun ah thatho zet ih tel ve ding a tul thu le hi mi ih tel nak in Pawlpi ih tharthawhnak khal tuah cih dingah caantha a um. Ziangah tile Pawlpi pawl dinhmun in nunphung pawlkom pawl parah thathnemnak a um ding a si. Hi dinhmun tha zet ih karhhruainak thawn thlarau lam ah thazaang tampi a nga ih hmailam caan cu zumnak famkim thawn a cangvaih a tul.

            Ziang vek khal si sehla tu vek in leitlunhuap pulhnat sia ton caan ah Christian pawl khat le khat tonawknak in hi harsatnak cu Biaknak lam ti dan pawl thawn pahsuak thei dingah a phi a hawl duh thu a hmuh ruangah a tha zet mi caanserh a si thu Bishop pahnih in an rak ruat. Hi thuthang cu Vatican thuthang ih kan ngah mi a si.

https://bit.ly/3eHdHjV