India Khristian pawl covid nat neh thei dingah rawlulh thlacamnak tuahl. May 7, 2021

India Khristian pawl covid nat neh thei dingah rawlulh thlacamnak tuah.

May 7, 2021

            Covid pulhnat ruangah ramih harhdamnak kilkhawinak khal harsat ton asiih, mi tampi khal natsuan an tuar ih mi tampi an thih nak ruangah himi pulhnat ihsin luat thei dingah nikhat sung rawlulh thlacamnak cu India ramih Khristian pawl in an tuah. India ramih Bishop pawl pawlkom (CBCB) ah rawlulh thlacamnak cu May thla ih a hmaisabik tlawngkai ninga ah tuah dignah an nemhnget.

            Bombay khuapi ih Bishop pawl pawlkom ih upa hotu asimi Cardinal Oswald Gracias cu ram sung ih Bishop pawl hnen mai um nak inn pawl ih a um ih Pathian biaknak khan asilole Biakinn ah hmunkhat ah komkhawm in thlacam dingah a dil. Bombay Archdiocese hrangah Cardinal in thlacamnak a rak tim tuah. Cui thlacamnak ah malte sung daiten um in Pathian thu ruahnak, a phunphun thlacamnak, St.Matthai Gospel Cathianghlim ih Bawi Jesuh tidai par a feh nak catlang kha siar in ruahnak le Nu Maria hnen thlacam biaknak in thlacamnak an rak cawl.

Ram hrang thlacamnak pawl

            Leitlun killi nat a karh rero caan ah tihphan nak le thinbangnak a tong tu kan zaten hrangah thla kan cam tiin thlacamnak thok ah an sim. Hmailam ah thazaang suah in hna a tuan tu siibawi pawl, nurse pawl, sii saya pawl le pumpek hnatuan pawl, inn sungsang pawl, rualpi pawl, nel ngaingai lomi rualpi pawl zaten hnen lungawi thu sim phah in humhim in, harhdamnak tha dingah le thazang pawl ngah dingah thla kan lo cam sak. Cuihleiah thu botcat mi pawl tuanvo la in a tuan tu hotu pawl, daan lam ah tuanvo nei tu pawl khal Pathian ih lam hmuh nak ngah in thinlung tha te thawn mai hrang that nak ruat loin hnatuan thei dingah le science mifim pawlkom khal himi pulhnat kham theinak lam pawl hmu thei dingah thlacam nak thawn an hlan. Nu leilungpi cu minung pawl ih tuahtuan nak ruangah siat nak pawl le bangnak pawl ihsin dam sal dingah thlacamnak a hleice in a tul. Thenkhat Bishop pawl khal Rosary camnak le Bible siarnak hleiah Bawi Jesuh thi le sa upat nak tuah dingah a forh fial.

"Khristian pawl ih tuahtuannak"

            Thenkhat Khristian pawlpi pawl khal India Catholic Bishop pawlih program ah an rak tel. India ram sung thawn pehpar mi Pawlpi council le India ram ih Gospel thuthangtha dungthluntu pawlkom pawl cu Khristian mipum tan 50 luan aiawh tu Pawlpi 350 thawn din mi leitlun killi thawn pehpar mi Pawlpi pawl cu rawl ulh thlacamnak ah an tel thu (CBCI) in an rak sim.

            (WCC) le Asia ram ih Khristian pawlkom ah "India ram ih mi tampi ih nunnak cemnak le harsat nak pawl karlak ah nanmah thawn kan thlacam nak ah hmunkhat ten kan um thu" India miphun Khristian pawl ih biaknak lam ca ah an rak tarlang. Tlawngkai ni thum zing lam ah India ram ih Pawlpi pawl in Khristian pawl thawn an riah siat tlang thu le thlacam nak thawn hmunkhat ih um a si thu an lang ter.

            Pulhnat ruangah pungsan a phunphun in nat a tuar tu pawl thazang pe in hnem dingah May 7 niah thla a ra cam tu mi pakhat ciar khal siseh, pawlkom in khal siseh, thlacamnak ah hmang dignah mitthli tlak nak, ruahsannak le thazang a cang ter tu thlacamnak pawl ca tuah in thlacam nak ah a tul mi thilri pawl cu WCC in an timtuah sak.

"Pope ih thlacamnak tuah dingah forhfialnak"

            Pope Francis cu beidong nak harhdamnak dinhmun thalo thawn a tong aw tu India ram ih mi zaten a nel nak thawn hmunkhat ih a um thu langter dingah ca pakhat cu Cardinal Gracias hnen tlawngkai ni li ah a kuat. Pope cu mi na pawl, a thi tu pawl le a tang tu an inn sang pawl zaten Pathian ih damternak, hnem nak thluasuah ngah dignah thlacam sak phah in bang man lo ding khawp in a bawm tu harhdamnak lam hnatuan pawl, bomnak a pe tu pawl cu Pope in hminsin in a lom thu le rian tuan nak zaten ah duhdawt nak lang ter in hmunkhat ih umpi nak ruangah Catholic Pawlpi hnen a lung a awi thu a sim. Nun tu daan le hnatuan nak pawl a hlan vek dinhmun thleng sal thei dingah le pulhnat a zam rang thei bikin cem dingah Bawinu in Pathian hnen dil sak dingah Bawinu thla asi mi May thlaah India ram ih Khristian pawl hmunkhat ah komkhawm nak thawn hi thla cu leilungpi thawn a pehpar awmi thlacamnak tuah dingah Pope in a nemhnget.

            Leitlun killi ih Bawinu ih tual rawn hmun 30 kha hmangin cumi pakhat ciar ih a ummi Kohhran mipi pawl in nikhat ciar thlacam nak hoha dingah le cui thlacam ni tinkim cu a dang lam mi tumtah nak pawl bet dingah a si. Pope cu Rome ih a um mi St.Peter tualrawn ih Basilica biakinn ih "kumkhua bomnak" tiih kawhmi biaktheng ah May 1 niah "Rosary Maraton" on puai a rak tuah. Rosary camnak program cu zanlam nazi 6, Rome tikcucaan zanlam nazi 4 ah Vatican thuthang ihsin an thlah. May 7 ah Philippines ih ti par ih khualtlawn nak pawl ah ahleice ih bawm tu remdaihnak ih Bawinu tual rawn ah Rosary cam nak an tuah. Himi thuthang cu Vatican thuthang ihsin kan don mi a si.

Photo courtesy of : AFP or Licensors

https://bit.ly/3xTpzYR