Vatican hmuan sungah Pope ih hoha dingmi Rosary thlacam nak program May 27, 2021

Vatican hmuan sungah Pope ih hoha dingmi Rosary thlacam nak program

May 27, 2021

            Covid 19 pulhnat cem thei nak ding hrangah thlakhat sung pelh lo in Rosary cam nakih a cem nak program cu May 31, tlawngkai ni khat ni ah Pope Francis in Kohhran mipi pawl a hoha ding a si.

Tawnhrem nak in poih sak tu Bawinu Maria

            Pope in thlacam nak ih netabik zan ah Tawnhrem nak in poih sak tu Bawinu Maria zuk hmai ah Vatican hmuansung ah keng in ret dingah a dil. Pope cu Germany ram, Augsbury ih a hramthok a simi cumi Bawinu zuk cu upat nak a pek ringring. Kum zabi 18 laiih tuahmi zuk asiih hridai (Ribon) a rang zawng a poih rero tu Bawinu Maria cu Mithianghlim pahnih in an cawi ih, ruahsannak, zangfahlainatnak le thiltha lo pahsuak thei tu tiih langter tu dingah Bible ih kan hmuh mi pawl in a kulh. Bangaw ih tuahmi zuk cu Augsbury ih a tui Bishop Bertram Johannes Meier in tlawngkai nikhat ah Rome khuapi ah a rat keng hnu Pope hnen a hlan ding a si. Bishop Meier in cumi keng ih thlacam nak hoha in hmuan sungih "scenic spot" ah Bawinu ih zuk ret nak in caanserh on ding a si. Pelh lo ih thlacam nak program pek nak Pope thawn pehpar mi zung ih thannak ah Pope le Kohhran mipipawl cu St.Piter biakinn ih cumkheng pungsan luanglu parah meisa tleu pawl le a danglam zet mi an hmu ding. Leitlun ih myo zaten ih hminsin nak asi mi Rome khuapi cu humhim ding tiin ruat nak hmun a si.

Ahleice thlacam nak pawl

1. Pulhnat sung abesia deuh mi pehtlaih awk nak, mah lawng um nak le ziangih rel lo nak pawl hrangah

2. Hnatuan nei lo pawl ton mi harsat nak pawl, a hleice in mino pawl, nunau pawl le innsang ih hoha tu  pawl hleiah mai hnatuan tu pawl humhim sak ding mi sumdawng tu pawl zaten hrangah

3. Ahleice in innsung ih tuahmawh nak, nunau pawl tuahmawhnak le a tui buainak ruangah a tha lo deuhdeuh mi nunphung lam buainak pawl ihsin a suak mi tuahmawh nak pawl cawl dingah

4. "Minung thangso nak" thawn pehpar in science lam zingzoinak in hmuh mi pawl cu minung zaten, ahleice in tha a mal bik mi pawl le zonzia bik mi pawl bom nak pe thei dingah

5. Catholic Kohhran pawl cu thazang ngah sal in, mai nunram ah a thar mi thangphok nak ngah dingah le mino pawl cu kutsih nak ngah thei in innsang le hmai lam din thei dingah cutivek tumtah nak pawl thawn Pope thla a cam ding a si.

Bawinu zuk ih Siangpahrang Bawinu lukhuh khum ter nak

            Tlawngkai ni khat zanlam ih tuah ding mi caanserh cu Pope Francis in Bawinu zuk hnen Siangpahrang Bawinu lukhuh khum ter nak in a cem ding. Pope thawn Rosary cam nak cu Vatican radio le Vatican thuthang website tel in Vatican media zaten ihsin thlah ding asiih, hnaset le hna tha lo pawl thei thei dingah Italy ih kut thawn theithiam ternak lam khal (Italian Sign Language - LIS) thawn khal thlah ding as si.

            France ram ih Notra Dame de Boulognel, Germany ram ihsin Our Lady of Schoenstatt, Rwonda ram ihsin Our Lady of Sorrows, Chile ram ihsin National Shrine of Maipui, Spain ram ihsin Nuestra Senora de Os Gozos, Scotland ram Corfin ihsin Shrine of Our Lady of Lourdes, Raraguay ram ihsin Basilica shrine of al Virgen de los Milagrosde Caacupe le Italy ram la Spezia parish ihsin Our Lady of Health cutivek ihsin Rosary camnak ah Rome khuapi thawn pehpar in leitlun aiawh in tel ding a si. Himi thuthang cu Vatican thuthang ihsin kan don mi a si.

Photo courtesy of Vatican Media

https://bit.ly/3oZfhSX