Brunei ram ih a hmaisabik an Cardinal nunnak cem May 29, 2021

Brunei ram ih a hmaisabik an Cardinal nunnak cem

May 29, 2021

            Brunei cu "Borneo" tikulh parih a ummi nisuah nak thlanglam Asia ih a fate zet mi ram pakhat asi. Cui ram ih a hmaisabik Cardinal Cornelius Sim cu May thla 29, zarhte niah Taiwan ah a nunnak a rak cem. Pope Francis cu Cardinal ih nunnak cem nak ruangah thinna ih thlacam sak nak ca cu Brunei ram ih Catholic Kohhran mipi pawl hnen cuini zanlam ah a kuat. Cardinal ih Gospel thuthangtha tlun ih rintlak zet ih tetti a khan nak, Brunei Catholic Pawlpi hnen siangzet ih a pek awk nak hna a tuannak pawl le Pope hnen ih rin tlak asi nak ruangah a lung a awi hleice thu, a thlarau hrang thla a cam sak tu Catholic mipi pawl thawn Cardinal ruangih thin na ih a um tu pawl Kohhran mipi pawl hnen thih nak ihsin a tho sal tu rah hmaisabik asimi Bawi Jesuh ih hnem nak le remdaih nak um dingah thluasuah a pek.

            Cardinal a nunnak a cem nak thu cu Fr.Robert Leong in kan dung zarhte niah a rak than. Cardinal cu kum 69 a si zo ih, Brunei mi a si. Cardinal cu Brunei ram ih nunnak cem siloin Taiwan ram, Chang Gung Memorial siizung ah tuamhlawm asi rero lai ah zing 8:28 ah a nunnak a cem. Cardinal cu May 8 ah siizung ah a feh nan thupi zet ih khuai ih tuamhlawm ding ah tuah thei siloin covid nat suan nak ruangah Taiwan ah quarantine hman ah a lut lai. Cumi sungah mi thiamthiam pawl in an theih tawk in an tuamhlawm nan an hlawhtling lo. Cardinal cu nikhat hnu nikhat a tha a mal vivo ih a tha hri pawl khal in hna a tuan nawn loih a nunnak a rak cem.

            Malaysia Kuala Lumpur ah um mi Malaysia, Singapore, Brunei Catholci Bishop pawl pawlkom khalin Cardinal ih a thih nak cu an than ve. Cutivekin Catholic thuthang pakhat asimi "Herald Malaysia" khalin Cardinal cu cancer nat nak tuamhlawm asilai ah a nunnak a cem thu an sim. Cardinal cu (Sep 16, 1951) ah a rak suak ih, unau 6 sungin upabik a si. Amah cu 1971 kumah Malaysia ram, Kuala Lumpur ah Electric Enginner diploma ngah tu a si. Cui hnuah 1978 kumah England ram, Dundee phunsang tlawng British Dutch oil le gas campany ah hna a tuan. Cuihnuah Catholic Puithiam si dingah thu a rak potcat ih, a hnatuan nak in a suak. Amah in Theology fim nak cu America ram, Ohio ram then, Franciscan phunsangtlawng ah 1988 ah a rak theh. A ram ih a tlun hnu Kuala Belait ih St.John biakinn ah hnatuan phah in 1989 May 28 ni ah Decon a rak ngah.

            Puithiam cannak cu 1989, Nov 26 niah a ngah ih Brunei ram ih a hmaisabik Puithiam a rak si. Kum 1995 ahcun Miri Brunei Diocese ih tuanvo nei tu tiin tuanvo pek asiih, 1998 Miri Brunei cu Diocese pakhat tiin Pope St. John Paul II in a then tikah amah cu Diocese tuanvo nei tu tiin khaisan a si. Cutiin a dotdot ten Pathian rian a tuan hnu 2005, Jan 21 ah ahmaisabik Bishop a cang. 2020, Nov 20 ah Pope Francis cu Cardinal thar 13 a khaisan nakah amah khal a rak tel ve. Covid 19 ruangah cui caanserh ah mah rori a feh thei lo. Asinan Cardinal ih thi cu Brunei ah an kuat. 2020 Dec 16 ah Puithiam pawl thawn pehpar mi pawlkomih pawlkom sungtel pakhat a si. Amah cu Cardinal tiin thla 6 cekci hna a tuan.          

            Cardinal cu avai mi Catholic mipi pawl a kilkhawi tu tuukhal pakhat a si. Amah cu Puithiam pathum ih bom nak in Brunei ih Catholic mipi pawl a rak kilkhawi. Diocese sungah a vai ih hna tuan tu 20000 an um. Oil le gas a tam mi ram cu mipum 500000 lawng an um ih, muslim biak tu zatek 70 an si. Cardinal ih a thih nak ruangah a tui cazin ah Cadinal pawl lak ah 125 cu kum 80 tang an si ih, a dang 97 cu kum 80 luan pawl an siih kum 80 luan pawl cu Pope tuantu ding hril sal nak hrangah me a pe thei lo tu pawl an si. Himi thuthang cu Vatican thuthang ihsin kan don mi a si.

https://bit.ly/3uLkjnq