Hong Kong Catholic Diocese in Tiananmen tualrawn ih Missa sumnak tuah thei dingah an zuam May 29, 2021

Hong Kong Catholic Diocese in Tiananmen tualrawn ih Missa sumnak tuah thei dingah an zuam

May 29, 2021

          Kum tin kum kim ni tinten June 4, 1989 ah China ram ih Tiananmen tualrawn ah Tuluk acozah a dodal tu mipi pawl thazaang hmang ih tuahmawh nak cu Hong Kong ram ah kum tin ten hngilh lo nak caanserh an rak tuah theu. England ram ih Colony ram ih nemhnget mi Hong Kong cu Tuluk ih an rak ap kum ihsin hok in hi hnglih lo nak caanserh cu Hong Kong ih Tuluk acozah dodalnak langternak ah a rung cang vivo.Tui kum ah cun hi hngilh lo nak ni cu covid-19 ruangah tuah an on lo. Caanserh tumpi an rak tuah thei lo nain Hong Kong mipi pawl in cui ni ah phayawngtaing pakht ciar vang in cui doawknak ih nunnak a liam tu pawl hngilh lo nak an rak tuah.

          Cui cangvaihnak cu kumdang hnak in thinlung a do ter sinsin. Ziangah tile Tuluk ram acozah in humhim nak tiin Hong Kong cu a neh sawh tum ringring. Kan dung kum June 30 ah cui lungkim lo nak ruangah mipi tam zet kaih an rak tuar. Kaih a tuar tu pawl sungin Media ih tarlang nak pawl ruangah mipi ih theih tam zet mi cu Jimmy Lai a si ih a mah cu Catholic pakhat a si.

          Kan dungkum October thla duhphorhnak ih a rak tel ruangah tui Zarh, tlawngkai nikhat ah thla 14 sung thawngthlak dingah an nemhnget. Democracy dil in minung lo vek ih thah tuar nak duhphorhnak kum kim a nai thlang vek in Hong Kong Catholic Diocese pi in a luan zo mi kum 32 ih buai nak a rak cannak tualrawn ah nunnak a rak hlan tu tlawngta pawl le a dang duhphorh tu pawl an hngilh lo thu, June 4 ni ih a thleng ding mi kumkim ah Catholic ramthen 7 in Missa raithawinak an tuah sak ding a si.

          Thil dangdang ruangah cui thuhla pawl cu zalen zet ih rak pholang a si lo nain thuanthu ih hngilh a ngah lo nak thu cu nunnak hlan ih din mi hi Missa sumnak ah thuanthu ih Bawi in thudik hrangah hi buainak ih nunnak a rak hlan tu pawl zaangfah hram she tiin Hong Kong Diocese ih thudik le remdaihnak commission ih cahmai ah an rak ngan. Hi thuanthu cu Hong Kong Diocese hrangah Bishop thar dinhmun ah Jesuit Fr. Stephen Chow an than hnu Zarh khat hnu lawngah a rak suak. Bishop thar cu December thla lawngah Archbishop dinhmun in a tuan ding. Tui dinhmun ah Tuluk ram ih um Jesuit Puithiam pawl kaihruaitu in hi kum kim hngilh lo nak thlacamnak thawn pehpar in a mah cu 1989 ah Democracy ngah nak ding hrangih nunnak a rak liam tu pawl hrangah a rak dil sak ding thu, ‘a hlan ah hi thlacamnak ah a rak tel lo nak khal a um.  Asinain, a feh thei lo nak dinhmun khal a rak um. Curuangah China ram hrangah 1989 ih rak cang mi ram buai nak ih nunnak a rak hlan tu pawl hrangah khal thla a cam sak ding thu, tui kum ah a feh thei ding le ding lo daan ih lungkim nak parah a bun aw tiah a sim.

          Cui caanserh hrangah lungkimnak dil nak ah Hong Kong acozah in a tluan ih din nak le phayawngtaing vannak a on lo thu cu tlawngkai nili ni ah a rak sim. Cui a lungkim lo nak thu khal covid nathrik ruangah a si. Cui hmun in thuthang ca pakhat a si mi South China Morning Post thuthang ih ngan mi vek a si le Hong Kong ah tui kum sung covid-19 suan mi a um lo tiin tarlang a si. Hong Kong Catholic Diocese ih thudik le remdaihnak commission ih tuanvo nei tu Porson Chan ih sim mi cu ralkap pawl oh kham nak in an caanserh a kham thei lo ding ti a si. Ziangah tile ‘Catholic Diocese pi ih Missa raithawinak cu Biaknak lam raithawinak caanserh a si. Ramkhel lam cangvaihnak a si lo. Covid-19 kham nak upadi vek a si le Biakinn pakhat ah minung 30 zateek kham thei nak zateek a um thu tarlang a si. Hi thuthang cu Aleteia thuthang ih kan ngah mi a si.

Photo courtesy of The Architectural Review 

https://bit.ly/3fTPubV