Kawlram hrang thlacam nak a tuah tu Pope Francis hnen Kawlram mi pakhat in lungawi thusim nak ca kuat June 21, 2021

Kawlram hrang thlacam nak a tuah tu Pope Francis hnen Kawlram mi pakhat in lungawi thusim nak ca kuat

June 21, 2021

            Catholic Kohhran ih lubik Pope Francis cu remdaih nak hnatuan nak pawl cawl loin a tuah tu biak nak lam hotu pakhat asi timi cu leilungpi in a theih pi vekin Kawlram hrang aw suak in thlacam sak nak a tuah tu Pope Francis cu Kawlram mi pakhat asimi Mi Tha Cian Heng, Mit Ma Kha in alung awi thu le thla in cam sak ringring dingah zangfah dil nak ca pakhat cu a facebook ah a tarlang.

             Pope Francis in Kawlram ih raltlan harsat tuar pawl hrang siseh, biaknak lam thilri pawl upat dingah khal siseh dilmi ca cu cunu in June 21 ah a siar thu le thazang a um vekin thinnat nak asi thu, Pope Francis cu duhdawt ank tumpi a nei tu biaknak lam hotu a si ruangah kaih tuar tu Kawlram ih Buddha biaknak ih an phungki pawl hrang khalah zangfah dil sak bet dingah Kawlram mi pakhat in zangfah a dil thu a ngan.

Mi Tha Cian Heng, Mit Ma Kha in Pope hnen zangfah a dil nak,

            Duhdawt, zanggah nak tumpi nei tu Pope Francis kei cu Kawlram ihsin harsat a tuar tu mipisungin mi menmen mi pakhat lawng ka si. Ka ca hi zangfah nak thawn in siar sak hram aw. A kaih lo mi ca fang a um asi khal le in ngaithiam dingah ahmaisa ah zangfah ka lo dil. Bawipa nangmah in ralkap council hnen inn le lo tan in a tlan tu mipi pawl, in ei harsat nak a tong tu mipi pawl hrang bomnak an pekmi pawl an ngah thei nak dingah le biak nak lam thawn pehpar mi hmun, thilri pawl upat dingah ralkap council pawl zangfah dilnak ca cu June 21 ah ka siar. Cumi ca ka siar veten thin na lungawi nak thawn ka tha a tho Bawipa, Biak nak lam hotu pakhat in harsat tuar tu Kawlram mipi pawl par zangfah nak thawn zangfah dil nak khal kan co ih lungawi nak khal kan nei.

            Bawipa nangmah hi kan mipi pawl hrang ralkap council pawl hnen ahmaisa bik zangfah in dil sak tu biak nak lam hotu na si. Keimah cu Buddha mik a si nan a dang biak nak a bia tu zo khal siseh, miphun bang aw lo mi zo khal siseh upat nak thinlung nei tu ka si. Curuangah biak nak lam thilri pawl ralkap council pawl ih kap nak, siat suah nak, ur nak pawl nasa zet in a dodal tu khal ka si.

            Ralkap council ih hmuhsuam nak ruangah harsat nak a tuar tu pawl hrang Bawipa le Bishop Charles Bo hnen lungawi nak, ahleice in zangfah dil duh nak thinlung thawn hi ca hi ka ngan a si. Kan ram ah ralkap pawl in mipi pawl ih inn pawl an ur nak thuthang thawn biak nak lam thilri pawl khal ur nak, meithal kap in siat suah nak pawl an tuah rero lai timi khal na thei ko ding.

            Ka theih tawk in sim ding asile ralkap council in an kap that mi mipi 873 an um zo ih, thudik lo in kai in thawng an thlak mi thawng nga luan cu thawng inn ah an um ih, ralkap thawng inn le palic thawng inn ah kaih tuar tu thawng li an luan. Cuihleiah inn le lo a tan tu ting 2 luan an um zo ih, inn ur sak in siat suah nak a tuar tu khal thawng 1 luan an um. Cuihleiah thudik lo in kaih tuar tu Buddha phungki 21 an um.

            Ralkap pawl ih thil dik lo an tuah mi an colh hlan lo thla in cam sak ringring ding ah le thawng inn ih kaih tuar tu pawl Buddha phung ki 21 hrang khal thla in cam sak ding in zangfah di in bom nak ka lo dil. Nangmah in Kawlram mi pawl par zangfah duhdawt nak thawn peh bet in in kilkhawi ding khla rinsan phah in ka ruah san. Kawlram in bawm aw. Pope Bawipa a nun khua sau hram seh.

https://bit.ly/3wVguha