kawlram_catholic_in_covid_nat_hrik_hlo_dingah_zuam

Kawlram Catholic khal in covid hlo zaang dingah a zuam

July 15, 2021

          February 1 ni ihsin thok in Kawlram cu hriamhrei keng in thuneih nak a long tu ralkap le mipi karlak ah kum reipi remawk lo nak dinhmun pawl an tong rero. Catholic Pawlpi in cui dinhmun ah ramsung Puithiam pawl, Sister pawl, mipi pawl ih nunnak an hlan rero nak besia zet in a cang rero mi covid pulhnat sia kham thei dingah a zuam rero lai.

Tha a tam zet mi thlisia pakhat

          Kan dung tlawngkai nithum ah UN in Kawlram ih besia zet mi pulhnat karhnak thawn pehpar in ‘thlisia’ pakhat thawn a thim ih ram tin ih bawmnak a tul thu, tui Kawlram dinhmun tikcu khel in kham thei lo a si ah cun nisuahnak thlanglam Asia ah covid karhnak tu hnak in a besiat theu thu a rak sim.Covid pulhnat a karhnak in Kawlram ih harhdamnak a tlaksiat ter deuhdeuh. Mipi pawl dinhmun khal in ralkap council thawn pehpar in ziang vek ih tuah mi khal an zum thei nawn lo.Hi dinhmun pawl cu a tak tak ih hniksaknak a si ih ram ih a thupi zet mi harhdamnak kilhim nak pek thei lo a si ah cun Kawlram mipi pawl ih nunnak tampi a sung ter thei tiah UN ih tuanvo neitu pakhat in a rak sim.

          A mah in ralkap council ah minung pawl oih hram thoknak pawl, mifim mithiam pawl in tu dinhmun cingfel thei ding a tul. Ram tinkim pawlkom pawl dinhmun in covid pulhnat sia cingfel ding cu ralkap, acozah thawn pehpar lo mi pawlkom dang thawn cingfel ding a tul thu, cingfel nak ah Kawlram mipi pawl in rin zet mi humhimnak siivai pawl dawt nak caanserh khal tel a tul thu a rak sim.

Kalay Catholic Archdiocese

          Kalay Catholic Arhdiocese dinhmun in tui a thupi zet mi harhdamnak cingfel dingah committee pawlkom a din. Cui Committee cu Oxygen pawl, siivai bawmnak pawl, humhim thei dan ding tidan pawl a cang thei bik in a bawm rero. Siikhaan pakhat khal a din ih covid nathrik cek awk nak le a dang natnak pawl cek awk sak nak khal a tuah sak rero lai. Kalay diocese sungah Sagaing taing hrekkhat le Chin ramthen, saklam tiang a kau ih India thawn khal a nai te. A veithum nak covid cu Kawlram ih pehtlaih awk nak harsatnak hmun ah May thla in a rak cang thok.

Oxygen um lo nak

          Kalay Diocese, St. Mary, Kalay Parish ih Parish Puithiam, Fr. Dominic Savio Thang Suan Langh in tui dinhmun cu seherh a tul mi dinhmun a si ih covid nathrik suan a tuar mi mina pawl an tam deuhdeuh. Oxygen ngah nak dingah mina pawl ih innsungsang pawl zingpit ten an va hngah thu, volunteer pawl ih a hlu pek mi pawl a um ko nan a daih thei cuang lo. Cu vek in mipi pawl in natnak khal an tih, natnak suan a tuar mi innsungsang in an mah an kilhim vek in innsungsang pumcawm nak lam ruah a har zet thlang.

          Oxygen tul samnak sumpai lam ti thei lo tu pawl an um vek in sumpai nei cing in lei thei lo in zianghman tuah thei lo in an nunnak a cem rero tiin UCA thuthang zungah a rak sim. Diocese ih mino commission in Yangon le Mandalay pawl ah cun thil man a khun tuk ruangah an daih awk lo. Catholic mino pawl khal in covid ruangah nunak a liam tu pawl ih ruakvuinak pawl ah tel in an bawm rero.

Pulhnat ruangah a thi tu pawl cazin

          Kalay Diocese sungah Catholic Puithiam pali covid ruangah an nunnak an rak hlan ih, paruk cu natnak an ruat rero lai. Puithiam pakhat le Sister pakhat cu tu ah cun oxygen thawn an um rero. January thla in July thla zarh hmaisabik tiang Kalay khuapi sung covid ruangah a thi tu Khristian dangdang in rian tantu 60 an um ih cu pawl sungin Puithiam pali khal an tel. Covid ruangih a rak thi tu Khristian dang dang in mipum 300 hrawng an um ih Catholic Kohhran mipi 14 hrawng an um thu Catholic hram thawh nak in theih a si.Tui dinhmun ah ralkap council khal in an mai thuneihnak lon nak le minung bang lo ih hringhronak, kaihnak, hremnak, thahnak a cohlang lo tu mipi pawl in mai neih hriamhrei thawn humhim aw in lehrulhnak ah Kachin, Chin, Karen le Kayah ramthen pawl ah ramsung ralkap meisa pawl a alh rero. Cui hmun pawl ah a um tu tam sawn cu Khristian pawl an si. Biakinn pawl, Biaknak lam inn pawl ih an um nak hmun ah ralkap council pawl in minun lo vek in hriamhrei hmang in an kah hnu ah an siatsuah bet.

Harhdamnak tlaksamnak

          Ralkap council in thuneihnak an lon hlan ah covid pulhnat sia thawn pehpar in Kawlram ih harhdamnak cu a harsa zet. Cu vek ih a can lai ah ralkap in thuneihnak a rak long ih harhdamnak kilhimnak cu a siat theh. Ziangah tile mipi pawl parah ralkap thunei tu pawl ih minung bang lo ih thahnak le ruahnak luan pawl ruangah a si. Thawng za leng lo mi siibawi pawl, volunteer pawl, mipi rian tuan tu pawl dik lo in tuah mawh ih thuneihnak a long tu ralkap council a cohlan duh lo ruangah CDM cangvaihnak ih a rak tel tu mipi lungrualnak acozah ih simrel thei nak a nei tu, siivai lalm doctor pakhat a si mi Dr. Sa Sa a mah rori in a rak sim. Kawlram ih ramkhel lam thawngtla pawl thawn pehpar mi pawlkom, Thailand ram ih um milai nunnak humhimnak a khaisang tu pawlkom ih lak mi cazin vek a si le mipi 911 thah an tuar ih 5257 kaih an tuar thu tlawngkai nithum ah thuthang an kuat.

          Cui ni ah ralkap council ih kaihhruai nak ih um mi harhdamnak le lehpannak zungih covid mina le thih leh hloh nak cazin vek a s le covid mina hmuh mi 4047 an um. Curuangah tu ah cun nat suan  mi mina zaten 201274 an um ih a thi tu 4036 an um tiin thuthan an rak suah. UN ih thuthanglatu in UN le a dang ram tin kim pawlkom pawl in Kawlram harsatnak thawn pehpar in bawm dingah a man cia. Asinan, ralkap council par ih thuneihnak ih huap mi Kawlram kiangkap ram pawl in ram kiangkap tha si nak thawn tui a thupi zet mi dinhmun cu tikcu a lak ah hmang men lo in bawm a tul thu a rak sim.

          Hi thuthang cu Vatican thuthang ih kan ngah mi a si.

https://bit.ly/3y0VshG