Mino Mithianghlilm thar ngah sal dingmi mangbangza a um tiin sim July 14, 2021

Mino Mithianghlilm thar ngah sal dingmi mangbangza a um tiin sim

July 14, 2021

            Kum 21 ah a nunnak a cem tu Italy Catholic mino pakhat cu Mithianghlim tiin khaisang thei nak ih tuanvo nei tu pawl in zingzoi nak pawl an tuah rero. Ziangruangahtile cui mino ih thlacam sak nak ruangah mangbangza pakhat ngah asi timi ruangah a si. Cumi mino cu Nicola d'Onofrio a si. A nauhak lai nan a nundam lai ah a nuntu daan cu a danglam tuk ruangah Mithianghlim tiin khai sang dingah tuah tuan nak cu Pope Francis in (2013, July 5) ah a on zo a si. A danglam mi nuntudaan cu Mithianghlim tiin khaisang dingah a hrampi pakhat a si. Cuihnuah a thlacam sak nak ngah in mangbangza hmuh a si. Mangbangza thiltithei nak cu a menmen mi hnakin a danglam mi a si ding.

          A tuah a thlacam sak nak ruangah mangbangza hmu tiin kuat mi thil cang cu zingzoi in suh rero a si. Curuangah himi mino pate ih Mithianghlim khaisang nak thu ah pehbetin tuah rero a si thu Italy tong ih suahmi ACI Atampa, CNA thuthang pawl ah a um. Cui mangbangza cu ziang thil, ziang vek dinhmun pawl ah a cang timi cu sim an sim lo. Chile nunau pakhat in cun 2008 ah thluak lam nat nak a tuar thu, d'Onofrio ih thlacam sak nak ngah a si ihsin a dam thu a sim. d'Onofrio amah rori khal nat nei asiih, cuinat nak cu phun zai loin a tuar nak ruangah a mah a upat.

Mithianghlim tuan tu dingih a nauhak lai thu

          Nauhak lai ih a rualpi pawl in amah cu "Nicolino" tiin an thei. Amah cu 1943 kum Abruzzo hmun, Italy thlanglam Villamagna ah a rak suak. Cutawk hmun cu kum zabi 16 ah Pathian hnatuan tu pawlkom asimi Camillian Siangbawi tlawng a din tu St.Camillus ih a khua le ram Lellis thawn a hla tuk lo. Camillian pawlkom sungtel pawl cu korfual dum parah a sen zawng a simi thinglamta a um mi in Mithianghlim tuan ding tu cu a hip thei. Cutiin amah cu Camillian pawlkom ah a lut ih 1955 ah Rome ah a rak thawn. Amah in kum laitek thukam nak cu 1961 ah a rak tuah. An thukam nak cu midang pawl vek in 3 lawng asilo.

          Tuar theinak, thianhlim nak le sup awk nak pawl hleiah midam lo pawl kumkhua kilkhawi ding khal a tel. Asinan 1963 ah cancer nat nak a neih thu an thei. Culaisan ah cancer tiih ti asile dam ter nak aii thei lo, a um lo ruangah mitthi tiin ti an si. A tui san khal ah siilam fim nak a thangso tuk ti a sinan tikcu khel in theih lo asile nunnak runsuak thei dingah a har zet. Cutivek nat a nei ti theih asinan amah cun hnangam ten a um ruangah a rualpi pawl an mang a bang. Amah cu mithmai tha zet in cancer nat a tuamhlawm.

          Cutiin 1964 May ah a tlun ih upa in a hnen ah caantha pakhat a pe. France ram, Loudes khuapi ih Bawinu hnen khawmzawh in harhdam nak thluasuah a dil ter. Pawlkom sung tel pawl khalin a hrangah thla an cam sak ding thu tha an pek ih a nih cun "thla cam uh. Asinan ka dam sal nak ding hrangah asilo. Pathian duhmi pom thei ding lawngah thlacam uh" tiin a sim. Khawmzawh a feh nak ah amah cu naute Jesuh ih St.Theresa ih khua le ram a simi Lisieux khalah a rak feh. Cui khuapi ihsin a nu le pa hnen ah ca a kuat. Cui ca ah "ka nauhak lai ih nat nak malte ka tuar hi ka di a riam. Ziangruangahtile a thabik cu Pathian hnen hlan thei mi thil a si. Ka duhdawt mi ka nu le pa nan fapa Siangbawi ka cang thei nak dingah thla in cam sak uh. Cuihnu ah hna tampi tuan thei dingin thla in cam sak uh. Asinan Bawi Jesuh in himi thlusuah in pe loin a dang duh mi a nei asile Pathian hmin thangthat si ko seh. Bawipa ziang ka tuah timi na thei bik. Ka hrangah a tha bik mi in pe aw. Ziang a tuah timi kan thei thei lo. Bawipa lawngin a thei" tiin a ngan tiin an sim. Himi thuthang cu CNA thuthang ihsin kan don mi a si.

https://bit.ly/3rv7Ion