Pathian rinsan nak thawn Philippine ramih Hidilyn Diaz in thilrit khainakah sui tacik ngah 

Pathian rinsan nak thawn Philippine ramih Hidilyn Diaz in thilrit khainakah sui tacik ngah 

            "Himi sui tacik laksawng cu Bawi Jesuh le Bawinu zum nak hminsin nak pakhat asi" tiin tui kum 2021 Japan ram ih tuahmi Olympic leknak puai ah sui a ngah tu Philippines ram ih lek tu Hidilyn Diaz in lungawi nak thu sim phah in Catholic zumnak tetti a lang ter. "Faith is not just believe, but play (work)" zum nak cu zum men in ziang hman asilo, zum vekin tuah taktak lawngah man a nei timi theih a theih.

          Laksawng a lak lai Olympic ah a neh mi tacik sunloih nak cu kaiphah in Bawinu a duhdawt thu le Bawi Jesuh hnen zum nak aiawh in a dang laksawng pakhat khal a orh ringring. Amah cu covid ruangah Olympic lek nakhi tuah le tuah lo ding a fianghlan ihsin tha nau loin zum nak thawn tikcu reipi pratice a tuah. A nunram ihsin harsat nak a tong tu Khristian pawl hrang thluasuah le zangfah nak khal zum nak thawn a um timi a lang ter.

          Bible sung ahcun Bawi Jesuh zum in a dung ihsin a thlun tu kum 12 sung thi dok nat nei tu nu cu "ka fanu, na zum nak in a lo dam ter zo. Dai tein va fe aw, na nat nak cu dam ta sehh" tiin Bawi Jesuh in a ti. (Mk 5:34) A zum nak vekin Bawi Jesuh dai lo theih lo ih a dai ruangah a nat nak dam in nunnuam in a um sal. Siibawi pawl ih dam ter thei  lomi pulhnat damter tu Pathian a si. Zumnak thawn Pathian hnenih thlacam tikah mah le mah lawng siloin mi dam lo pawl khal theih tawk in tuamhlawm a theih.

          Tuini tui caan ah keimai ka ton mi khal ka sim duh. A hlan lai ah Tuluk ram ri ah hna ka tuan. Cumi caan ah Catholic ka si thu zum nak lang ter dingah Thinglamta ka orh ringring vekin ka mawtaw hmai khal ah "Jesuh, Maria le Joseph" zuk ka ben. Mawtaw sung khalah Rosary ka  thlai. Paisa hawl phah in sumdawn nak ka tuah rero asinan ka nunnak Pathian hnen ap in Pathian hnatuan tu Siangbawi, Sister, Brother le Pathian thusim tu saya pawl motor to man la loin ka phur ih hleiah lamzin ih an rawl man khal ka pek sak. Curuangah harsat nak pawl cu zumnak  thlarau lam thazang thawn ka tuah ruangah thluasuah ka ngah caan a tam.

          "Ziangah ka tuah bet lo" tiin rualpi thenkhat in in sut. Asi. Leipar ah paisa neih lawngah a famkim timi ka ruah nak sual cu nuam teten ka thei. Veikhat veihnih ruah nak sual ruangah minung pawl cu duhham nak, thilsual tuah nak thawn paisa ngah asile a tawk timi thinlung thawn khat le khat tuahmawh nak, hmuhsuam nak, duh lo cing in kai hrem nak, thawngthlak ih that awk nak pawl tuah nak pawl hi kiangkapah hmuh a theih. Curuangah thuhman thawn duhdawt nak hmaiah ret in duhdawt nak thawn Pathian ih thu thlun in mi hrang nunnak pe in rian tuan nak Pathian in lam a hmuh sak. Ka nunnak hi mi hrang ah pe phah in kan um nak cu thih hnu ngah mi vancungram a si. Leipar ahcun midang that nak le Pathian ih thawmhuham hrang tuah ringring aw. Khritian "kawhnak" ah khui tawk lam zin hril asi khal le mai hril mi lam ah thluasuah kha a thabik ih hmang tu Philippines ih lek tu ih thusim mi thawn thlarau thazang la cio uh si.

          Philippines ram ahcun hivek Bawinu ih sunloih nak "The Miraculous Medal" cu hngawng ah thaten a orh. Ahleice in Bawinu duhdawt nak thla asimi October ah "October Medal" October tacik tin khal in kawh a si. Bawinu Maria parih ret mi kan duhdawt nak le upat nak thawn October tacik cu mepian zawng tacik ben a si.

          Ahleice in kan lo sunloih pi. Zumnak thawn sui tacik ngah tu Hidilyn, Pathian cu nangamah lawng siloin duhdawt nak nei tu kumkhua Pathian kha zum in Bawinu a upat tu pawl zaten thlarau lam thluasuah pe hram seh. Amen.

- Catholic News Agency