John Lennon ih phuahmi “Imagine” timi hla laarzet thawn pehpar in Catholic Bishop pakhat ih hmuhdaan. July 25, 2021

John Lennon ih phuahmi “Imagine” timi hla laarzet thawn pehpar in Catholic Bishop pakhat ih hmuhdaan

July 25, 2021

           Japan ram, Tokyo khuapi ih Olympics Puaipi onnak ah pop hla siava bik lakih pakhat an sak: A si, ka sim duhmi hla cu, nauhak tampi le hminthang tampi in choir thawn an sakmi John Lennon ih ‘Imagine’ timi hla hi a si.The Beatles band le Lennon thapetu fan pakhat dinhmun ih himi thu vun rel ding cu ka thin a nuam lo nasa. Hmansehla hihi thu dik a si: hi hla ih melody le arrangement tuahdaan cu a mawi zet ko nain, a cafang pawl hi cu moral le politic lam zawngin thubuai suaktertu pakhat a si. A hla toknak hi vun ruat hnik: ‘Vanram a um lo timi na thinlung sungah vun ngaihtuah hnik/ na zuam ahcun a ol ko/ kan hnuai lam ah hell timi a um lo, kan tlun khal ah van lawng a um/ Mi hmuahhmuah hi tuini (tuisan) hrangah an nung rero ti’n vun ngaihtuah hnik. {Imagine there's no heaven. It's easy if you try. No hell below us. Above us, only sky. Imagine all the people. Livin' for today}

        Hmaisong lo te ih sim ding cun, hi hla hnakih a zual sawn mi thil a um ding ka ruat ban lo. Vanram a um lo, hell khal a um lo vun ti cu, thil tha le thil sia thleidan nak dingih hman dingmi tahfung a um lo ti thawn a bangaw. Cuti ih kan ti cun, thil dik le thil diklo karlak ih danglamnak kha, sullam nei zet ih vun simfiang ding daan a um lo ti thawn a bangaw ih, mi pakhat ih thil tuahmi hi a dang pakhat ih tuahmi hnakin a tha sawn vun ti dingah a tuahtu ih ruahnak lenglam ah standard(thlundingmi) a um thei lo tinak khal a si. Roman Catholic bishop pakhat ih ruahnak hi a dik tiih na zum lo a si ahcun a luanzo mi kum zabi ih thilcang mi hi tha tein vun zoh hnik hman aw: ‘kan hnuai ah hell a um lo, kan tlun khal ah van lawng a um, vanram a um lo’ timi  ruahnak a pom tengteng tu pawl ih ruangah minung ruak hi a thawng sawmsawm rori’n siar cawk lo khop ih an um kha.

        Tuini (tuisan) hrang ih nun timi {livin’ for today} teh ziang tin na ruat? Tuisan hrang lawngih kan nunsan dingmi leilungpi timi cu ‘utopia’ kan timi kan thinlung sung lawng ih kan ngaihtuah theimi famkimnak hmun hi a si ko lo maw? A si ko ding, hmansehla, utopia timi ih duhsan taktak hi hmun pakhatkhat a si lo, thinlung ih duhnak pakhat men a si. Cuvek hmun hi kan thinlung te cun kan ruat thei ko nan, kanmaih zuamnak men ih cang thei mi thil a si lo timi theihthiam theinak ruahnak tha kan neih ding a thupi. A taktak ahcun, Leilungpi parah kanmah te’n vanram kan din thei ko timi ruahnak thawn kan cangvaih tikah Leilungpi par ih kan suahpi mi taktak cu hell thawn a bangaw sawn theu. Cumi cu a luanzo mi kum 200 sungih revolutionaries le dreamers (sunmang man tuk pawl) pawl ih nun kan zoh tikah hmuh theih a si.

        Cumi hnu ah himi hla sungah ziang a ti bet timi vun zoh hnik uh si. {Imagine there's no countries; It isn't hard to do; Nothing to kill or die for; And no religion, too.} “Ram timi a umlo nak hmun hi na thinlung sungah vun ngaihtuah hman aw; hihi tuah harsa a si lo. Zianghman thah rero le thihpi tul a umlo nak hmun; biaknak timi khal a umlo nak hmun hi.” Ram dangdang ihsin Olympics Puaipi a ra teltu pawl a tlartlar ih an feh thlurhthlo hnu, choir sungtel pawl le hminthang pawl in hi hlafang te an sak vun theih tikah hnih lo bak cu tuah ding dang ka thei lo si mai. Ram dangdang timi um nawn lo dingih vun siatbal thluh ding timi ruahnak cu, milai pakhat le pakhat danglamnak siatbal tum thawn a bangrep ko. Ram bangawlo celcel ih umnak hi thupoi a si lo; a caancaan ah, diklo tuk ih hringhronak tivek a um tik ahcun, maih ram hrangih raldo le nunnak liam a tul caan khal a um. Hi milai ih sinak dik pakhat humhim ding kan timi hi ruahnak nei lo ih miphun tan tuk nak (nationalism) thawn an bangaw lo. 

       Biaknak hnon ding timi hi a zual sinsin. A silo bik in, kum zabi 3 sung cu secularists timi biaknak lam dodaltu pawl in leilung tlun ih buainak a suak ter tam bik tu hi biaknak a si ti’n an pom tlangpi. Hmansehla, thil umdaan vek rori ih vun zingzoi tikah, kiangkap ih thilcang mi buainak ih zatek 6 lawng hi biaknak ruangih cangmi a si ti hmuhfiang a si. A tam sawn cu, miphun tan tuk nak, sumpur leilawnnak lam ih zuamawknak, phunhnam zawngih thubuai, ram var duh ruangih buainak le a hleicein, Pathian ziangih siarlo mi ruahnak ruangah an si bik. Hminthang pawl in hi hla netnak lam an vun sak ka theih zawng hrimhrim tla cu ka hnih sup a har sinsin: Neihmi zianghman umlonak timi hi vun ngaihtuah hnik hman aw; Na ti thei le thei lo cu thei hlah. Duhham khal tul lo, rilrawn khal tul lo nak hmun; Unaukhat sinak hnuai ih tlanlennak hmun. {Imagine no possessions; I wonder if you can; No need for greed or hunger; A brotherhood of man}

       Phuur zet ih hivek ruahnak a langter tu pawl hi kan zoh tikah, sumsaw thilri tampi neimi milian pisirh hlir an si ti’n ka ti ngam. Hi pawl in an neihmi hmuahhmuah midang hnenih an va zem thluh taktak tikah cun kannih khal in kan zem thluh ve a tul ngai ko ti’n ka hmu. Sinan, himi cang ngaingai ding cun hngakhlap lo mai sehla a tha bik ko.(an tuah ngaingai zik lo tinak a si mai) Sumsaw thilri neihnak men hi thilpoi a silo, kan neihmi thilri hnak in mipi thatnak a thupi sawn timi moral vision kan neih theilo mi sawn hi a poi mi a si timi kan fiang a tul hrih bet.

        Hlafang netnak ih ‘Unaukhat sinak hnuaiih tlanlennak’ thawn pehpar in vun sim sehla, hihi kan thinlung te ih ngaihtuah tlak zet thil pakhat a si. Sihmansehla, a cang thei ngaingai mi thil sawn ih kan thinlung kan thum a tul. Milai hmuahhmuah hi unaukhat sinak hnuai ih umtlang thei ngaingai ding cun kan zate’n tawmawkmi Pa pakhat kan tul timi khal kan ruah a tul. Pathian pakhat ihsin hram a to khawmmi kan si lo ahcun, unau kan si thei lo ding. Theih ol bik zawngih kan sim ding cun, vanram siseh, biaknak siseh, Pathian siseh, himi pawl um lo cun, milai ih unaukhat sinak timi hi a cang thei dah lo ding tinak si mai. Curuangah hi hlate hi, a awte cu ngai ko uhla, a hlafang ih ti duhsan mi lawngte cu zum duh hlah uh. 

          NB: Himi kan run tarlang mi hi, Bishop Robert Barron in, tuikum Japan ram, Tokyo khuapi ih Olympics puaipi onnak ah an sakmi John Lennon ih phuahmi “Imagine” timi hla thawn pehpar in a ruahnak(Comment) a pekmi a si ih, theihthiam ol ding zawngin kan run let mi khal a si. Bishop Robert Barron hi Los Angeles ih auxiliary bishop pakhat a si.

https://bit.ly/3rG9y5T